最近去開香港區，就帶咗和牛B同妹妹去香港西區戶外地方放電~   呢到有成5,900平方米，仲有維港海景睇~       如果好天氣的話，睇日落係一流呀!! 可惜我哋當日天陰，多雲仲有霧，所以冇日落睇...     不過都唔緊要啦，因為和牛B一樣玩得好開心!!     我哋今次去嘅係位於西環嘅卑路乍灣海濱長廊，全日24小時免費開放!       而且交通都方便，可以喺港鐵堅尼地城港鐵站 A出口，沿土美菲路向海邊步行，大概5分鐘路程，轉入城西道，卑路乍灣海濱長廊就喺堅尼地城巴士總站隔離。除咗港鐵之外，亦可以乘搭巴士 18P, 18X, 113, 904等，於堅尼地城巴士總站落車。     呢到空間大，最特別就係有好多藍色卡板俾大人、小朋友搬嚟搬去玩~~     仲可以利用卡板砌出迷宮、起返個小花園、小隧道亦都得!!   ^ 卡板小隧道   ^ 卡板迷宮   公園入面仲有之前聖誕原素(雪車)、新年嘅賀年全盒裝置。     ^ 賀年全盒裝置一次可以容納好多小朋友，辛苦大人合力推動全盒~等全佑可以旋轉360   ^ 仲有特式嘅移動心心椅~   ^ 雪車款嘅車仔~打卡、一家大細坐喺上面稟走公園都唔錯~   海廊長廊公園沿海路段唔算長，但係就可以欣賞到西九龍、昂船洲大橋和青馬大橋。     夜晚嘅時候，仲會亮起欄杆上嘅特式光管，夜晚嚟打卡相信都會好靚呀!!     公園入面仲有寵物公園區，如果有養狗仔嘅你，仲可以帶埋寵物一齊去玩去放電呀~   地方雖大，入面仲可以玩滑板車、滑板、滾軸溜冰等。 所以小朋友進行玩樂嘅時候，大人都要睇實小朋友，以免碰撞受傷哦。     公園入面設有洗手間，不過廁格唔算多，所以唔好拖到最後一刻先去廁所呀~~     ＊＊溫韾提示＊＊ 疫情期間，記得戴好口罩、勤洗手、勤潔手，唔好摸眼、口及鼻，亦唔好多人聚集。 此外，場地近海邊風較大，記得帶定外套，以免著涼。   -------------------------------------------------- 歡迎聯絡我&和牛B: chungying56@hotmail.com MeWe專頁: https://mewe.com/p/和牛b的成長日記 Facebook專頁: 和牛B嘅成長專頁 Instagram: wagyubmami                -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。