喺生仔其中非常重要一環就係請陪月姨姨 咁到底點解咁重要呢？ 個個都請，我係咪一定要請呢？ 各位準媽媽可以了解下自己既需要，同陪月姨姨可以做到既野嚟考慮係咪有呢個需要 陪月姨姨的職責就係照顧剛生產的媽媽同寶寶 基於呢個原則，你可以期望陪月姨姨上到嚟你就可以將BB交比佢安心休息 陪月姨姨實際上會做啲咩呢 首先照顧BB方面，食奶換尿片沖涼，洗好BB奶樽換洗紗巾衣物尿墊床單等等 照顧媽媽方面，坐月飲既代茶，買菜煮早午晚餐下午茶糖水，補身肉汁，上奶的湯湯水水，沖涼的薑水 仲有陪媽媽去母嬰健康院，甚至會幫忙催乳，紮肚都有聽過 基本上，坐月期間，姨姨會盡力協助媽媽所有需要，當然家務除外啦 咁又可以想下自己需要陪月姨姨嗎？ 想想媽媽和奶奶懂得坐月嗎？ 因應身體狀況煮不同食材用不同中藥補身，開刀順產坐月方法都唔同， 想想有人手幫忙照顧初生BB嗎？ 生產完媽媽体力很差，非常需要休息，初生BB食奶換尿片，3小時一次，仲有夜奶 假如決定餵人奶，可能需要泵奶追奶等等都很花時間精神 想想新手爸媽懂得照顧初生嬰兒嗎 怎換尿片，怎沖涼，怎沖奶粉，怎樣替嬰兒換衣服等等 我們再想深層一點 媽媽和奶奶真的識坐月？係咪只係上左陪月課程？ 有無實戰經驗？上次湊B係咪講緊廿年前湊你？ 坐月姨姨一天兩湯加代茶，媽媽奶奶認為的坐月與你期望的一樣嗎？ 最重要，你同媽媽奶奶溝通得好嗎？假如遇上意見不合時，可以輕鬆開口溝通嗎？ 我想你心中都有答案：） 個人嚟講，係建議請陪月姨姨，一個好既陪月真係幫輕好多 避免婆媳糾紛又可以完全休息，仲有好多野食 完約既時候直情係眼濕濕唔捨得姨姨添 但陪月姨姨人工咁貴，又估下估下唔知係咪真係好都好冒險喎 正因為咁，我地更加要用盡方法揾個好的陪月姨姨 我地請陪月既重點係要唔！中！伏！ 唔使請個最ichiban無得頂既，因為一定好貴，貴又唔擔保一定好 人工最平又唔一定超值，可能係無咩經驗， 所以第一步係及早請。 通常一確定有BB就要開始揾陪月姨姨 講緊係8週6週睇左第一次醫生都已經可以開始揾， 越早揾便越多選擇，陪月姨姨既期真係唔多架 我是滿左3個月先找，問3個陪月姨姨只有1個有期，真係一額汗 第2步: 請朋友推介陪月 介紹非常重要！請發散朋友姨媽姑姐問下有無介紹 怕未滿3個月BB小器唔講得？咁可以私下婉轉地問既，大家都明白的 記得叫老公都要幫手，多一邊朋友差好遠架 一問之下通常都有一大堆陪月姨姨出現 不過唔好開心住，要問清楚小小，要地區岩，又要有期先得 唔熟既朋友介紹都唔重要，起碼要知道她曾經被朋友顧用過， 咁用過又介紹得你，就知道呢位陪月姨姨唔會差得去邊 但係如果係朋友既姨姨 / 媽媽係幫人做陪月而非親身顧用的話就唔好喇 唔係一定唔好，而係自己人一定會讚自己人， 半生不熟有咩意見都難開口，咁中伏既機率又會增加 老實講呢一步好重要，甚至比面試更重要 面試可以講到天花龍鳯，但你需要既係一位實幹的陪月姨姨 假如可以，同推介果位陪月姨姨既媽媽傾下問下，咁就最穩陣 中介介紹同網上盲揾唔係唔好，不過又係會增加中伏機會 我最後最後陪月姨姨手上名單，都係朋友用過的陪月姨姨中選擇 真係無咩幾多個選擇架，都怪自己太遲先揾陪月姨姨啦 第3步 ： 面試 真係面對面面試前，請電話傾下先 問下啲基本顧用條件，人工，計薪方法，睇下自己OK唔OK先 再收窄咗名單，咁就再約陪月姨姨見下面傾下計， 睇下陪月姨姨既陪月證書，以往既推薦信等等 人工嚟講就睇餸食飯啦，我無咩錢決定請8 HR， 人工RANGE都幾闊，由17K - 3XK，仲有位係時薪計， 抹去平到嚇親及貴到嚇親就見咗中間既幾位陪月姨姨 面試可以參考吓網上既面試題樣本 我自己比較注重陪月姨姨既經驗同埋岩唔岩咀形 有些比較氣勢強悍既我都怕怕，話曬對足一個月，能好好溝通媽媽先會心情好 你可以問下陪月姨姨點樣幫生產後的媽媽調理身體？如何上奶？ 會唔會幫忙催乳按胸？會準備炒米茶？BB衣服用手洗機洗？湯水日日煲定係煲大煲飲2日？ 聽聽吓，你都可以分辨陪月姨姨合唔合乎心意 第4步 ： 簽合約 小心魔鬼細節 面試後唔需要即刻簽合約，見曬所有陪月姨姨再想一想 簽合約前一定要了解魔鬼細節！！ 首先，月薪係指一整個月計算？ 有時一個月係30日，有時一個月係31日 合約請寫清楚係如何介定一個月 通常係講緊工作26日，會清楚寫係合約 另外，特別工作日子如何計算 特別工作日係指紅日假期及星期日 由其係準備順產既媽媽，你唔會知道生產完回家第一天係平日定假日 如果係新年初一，係中秋節需要陪月姨姨工作又如何計算呢 通常係無分別，只係最好事前溝通清楚 亦有聽過紅日工作係計雙工，合約最好都係寫清楚點 仲有夏天打風黑雨點計算都最好清楚寫明 最後超時工作如作如何計算 月薪的陪月姨姨每天大約工作8小時，但總會有超時的機會，尤其剛開始的時候 超時係補錢定係揾其他日子早放工來填補，最好合約先講明 剛開始真的非常需要陪月姨姨幫忙，到滿月的時候就會好一點，熟悉如何照顧寶寶了 先講好避免陪月姨姨一夠鐘就急急腳走，可彈性處理 仲有仲有，按金的處理，解僱的處理！！ 通常簽約後都會比按金，留番個期 按金比幾多真係個個唔同，我係比$500， 我見有些人係比10%，20%都有，呢點都可以傾 但我傾向可以比小點就比小點，因為簽約到生產之間仲有好長時間 喺呢段時間充滿好多變數，可以無啦啦生之前陪月話有事做唔到架 然後介紹佢佢個朋友比你，你就會比佢食住，夾硬僱用一個不知來頭的陪月姨姨 亦有啲係做左幾日，可能夾唔到可能佢唔想做，就會離職甚至需要解僱 呢下真係頭都大喇，不過煩係急忙混亂再找人之餘 解僱的話你有機會需要付整個僱用期既薪金，要睇清楚合約喔 有些人既做法係需付7日通知金，有些人係做幾多日就係幾多日 ANYWAY，簽約前請先溝通好，避免人財兩失 陪月姨姨對新手媽媽真係好重要，可以令你輕鬆坐好月養好身體， 但請到個唔好既會令你激心勞氣，貼錢買難受 錢事少，生產完真係好需要休息需要人支持同幫忙， 生理同心理層面都很虛弱 我的陪月姨姨真的很好，每天我都很期間她來 她到了，交BB給她，我就完全放鬆去瞓覺，起來就是吃吃喝喝 自己管理好泵奶事情就好了，陪月姨姨連假期的飯菜都會先弄好 老公就放去蒸一蒸就3餐搞掂，完全一個大放鬆， 休息夠，心情才會好：） 陪月姨姨煮好姨照顧BB仲要照顧剛生產媽媽的情緒，其實她工作都不輕鬆 錢銀先講清楚，過得人過得自己，再慢慢磨合，大家都開心 媽媽們一起加油：） ---------- https://www.instagram.com/gamblepig/
