【 感受大自然。輕鬆休閒的兩日一夜 】 今年的結婚週年紀念日無得去旅行，爸爸提議去Staycations慶祝，帶住兩個小朋友就無得浪漫架喇，唯有揀間好玩的親子酒店啦！   我哋今次入住馬灣的「挪亞方舟度假酒店」，之前去過挪亞方舟主題公園玩，兩個仔仔都好鍾意，所以我哋就決定去玩番兩日一夜，可以慢慢玩，感受下寧靜悠閒的馬灣。   今次Book左特級豪華客房，有2張大雙人床，我哋一家四口瞓得好鬆動，仲有一個大露台，小朋友可以係出面玩波波和吹泡泡，整體來講都好乾淨和舒服。（不過露台係公眾地方，所以夜晚和出街時就要鎖好門窗。） 講番呢兩日一夜有咩節目先，我哋當日好早就到酒店，放低行李就先到隔離主題公園內的「躍動天地」玩，哥哥今次好叻呀！成功挑戰到第二高的滑梯，一玩就上癮。弟弟都有多條短滑梯可以玩，足夠佢哋兩兄弟盡情放電。   Lunch @馬灣沙灘Cafe Roma，餐廳户外有提供沙灘玩具，小朋友可以自己玩，大人可以享受下美食和靚景。    頭先食飯時玩沙玩唔夠？唔緊要，酒店隔離就係沙灘，5分鐘路程就到，玩完就啱啱好可以番酒店拎房沖涼，勁方便！酒店大堂有一些兒童玩樂設施，有時間都可以去玩下。   主題公園內有高卡車和兒童單車玩，$60可以玩20分鐘，但我哋選擇上Trip.com買一張$95的入場券，咁哥哥就可以憑門票任玩喇，勁抵！   因為上次我哋已經參觀過主題公園內的展覽館，所以今次就無再去，反而係方舟花園內影左好多相，估唔到兩兄弟對唔識郁的動物都幾有興趣。 第二日係酒店豐盛閣食自助早餐，選擇唔多但都夠食既。   食飽飽就番房休息多陣，11點check out後再去公園玩多轉。 Lunch我地去左RIVA灣 Bar & Grill，餐廳同樣有提供沙灘玩具，小朋友又有得玩沙喇！而且食物仲非常好味，食得好滿足。   食完Lunch 我地仲去左馬灣公園，有種去了外國旅行的感覺，綠油油的大自然環境，加上藍天白雲，好似置身係外國的花園一樣，勁靚！   園內有好多位置俾人影相打卡，當中最受歡迎的一定係花花拱型隧道，任何季節影都各有特色。   而家仲多左個大型蝸牛藝術裝置，係蝸牛殼裏面，如果有陽光射入，影相好夢幻架，會顯示出多種色彩，媽媽我瘋狂幫兩個仔仔影相   去完馬灣公園先回程番屋企，呢兩日一夜非常充實，大人小朋友都玩得好滿足和開心呢！ ————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記 E-mail : AnnieMamaDiary@gmail.com