首先，老老實實，你認唔認同全職媽媽辛苦先？（呢句係同隊友們講嘅）如果你唔認同，我諗你要反思一下先（笑）所以我覺得第一句可以安慰到全職媽媽嘅說話應該係認同全職媽媽辛苦嘅說話，簡單嘅一句「辛苦曬你喇」「辛苦曬」「辛苦你喇」（小心你嘅語氣喎），媽媽條氣都GUR啲架！   第二句，「有冇嘢我可以幫下你架？ 」「不如我幫你吖」「等我嚟啦」，就算媽媽真係話唔使都好啦， 佢知你有個心幫， 都已經好窩心。    第三句，「我睇住BB， 你去恰陣/沖涼先啦」「我凑佢地，你出街行下」幾耐都好，畀老婆抖五分鐘都好過無， 媽媽感覺到有人去分擔，真係咩壓力都減少好多架！   第四句，一句佢做咩決定都全力support嘅說話，「好吖」「同意」「我支持你」「我唔識，但跟你意思做啦」「OK，我全力配合」，尤其喺餵人奶定奶粉，BLW定TW，尿片定尿布呢啲比較具爭議性嘅題目上。要明白媽媽都係想畀最好嘅嘢BB，奈何當中有好多困難，好多十五十六揸唔定主意嘅時間，媽媽好似會五時花六時變，又或者明知山有虎偏向虎山行咁（例如：明知尿布洗餐死嘅，又要揀環保尿布；埋身又話BB咬佢，追奶追到崩曬潰），但係都係為咗BB好，所以無論點都好隊友請你地乖乖配合吧。   （如果隊友識呢四句，一定少好多磨擦）   —————————   冬甩冬薑媽媽—全職奴婢，照顧一家兩大兩小兩隻貓，昔日無飯太太現自居合格廚娘。兩位寶貝女分別係：冬甩姐——四個月大時由全泵轉全埋身的樂天馬騮，冬薑妹——以逾4公斤重磅登場的感性吃貨紅髮胖胖豬妹子   想知更多冬甩冬薑的日常趣事，歡迎 follow 【小貓奴冬甩冬薑】 IG 和 FB 喔！ www.instagram.com/gingerdonutandcats | www.facebook.com/gingerdonutandcats