相信大家都記得幾個月前，張馨予行康城影展紅地氈着嗰條傳統東北棉襖大花圖案拖尾裙，畀網民惡搞，而 Keicy 亦都跟住股熱潮，將我 DIY嘅港版童裝大花裙着上身，仲大玩「萬能 key」！ 而呢次張馨予將會着住行紅地氈嘅白色裙，亦都喺短短幾個鐘獲得過千評論，不過今次係一面倒大讚佢係女神！ 據講呢條裙係黎巴嫩設計師品牌 Ashi Studio 嘅旗下服飾，設計師話靈感係嚟自 2009 年電影《Grey Gardens》。 Keicy 同我都覺得呢條裙好靚，於是又癮起，趁呢個週末 DIY 一條！ 首先係整羽毛嗰部分。準備一卷尼龍繩，剪一條長嘅，再整幾條短嘅。 將短嘅穿落去長嗰條度，打個結。 跟住攤開佢，搣開變成幼條。 做好 6 至 7 串後，放埋一邊。 跟住做裙身，因為條裙係白色，所以用有皺紋嘅大畫紙圍一圍就得，好簡單！ 而個手袖位，首先係度啱手臂長度，然後再圍成一個圓筒，因為原裝都係拋拋哋嘅，所以圓周要大啲啲。 將頭先整好嘅尼龍繩，一層層咁黐落裙身度，咁就完成喇！係咪好靚呢？^^ Keicy 成個過程都有幫手，我用較剪剪咗一條之後，Keicy 就跟住我畀嘅長度逐條剪，打結仲一教就識，咁就整咗一晝喇！ 其實呢類手工藝可以訓練小朋友嘅手指同手部嘅肌肉，幫佢哋寫字好啲之外，同時亦都訓練佢哋嘅集中力，因為有好多條尼龍繩要整，又唔可以整爛，所以 Keicy 就好乖，一步步咁樣整，成個過程都好專心、好集中咁去整，真係抵讚！^^ 要有張馨予條白色裙嘅效果，尼龍繩唔可以只整一串，總共要整 6 至 7 串先得，整埋一扎之後，感覺好似啦啦球。^^ 其實我都諗咗好耐，先諗到點樣整到一條條羽毛豎起，最後就諗到用尼龍繩呢樣又平又靚嘅材料，製作過程除咗兩母女一齊玩好開心之餘，仲可以訓練小朋友嘅手部肌肉，一舉兩得，睇到 Keicy 滿意嘅笑容就知佢好鍾意啦！ 大家都不妨喺屋企試吓整吖！:) 溫馨提示：用完嘅畫紙唔好嘥，畀小朋友畫畫呀！^^ *** 重溫：港版童裝棉襖大花裙   FB: KeicyKK