小JM出世個陣我同老公無第一時間為小JM申請護照， 一來唔想抱住小JM拎完出世紙又要好趕咁去整護照， 二來亦無打算頭半年會帶小JM出國，所以一路都未整。 直至十月份，爸B媽咪去完個日本就發覺原來唔帶小JM係會好痛苦架， 係一陣陣既 "相思之苦"！ 成日都會好掛住小JM，會諗小JM做緊、有無乖、有無食飽... 之類之類 正正因為呢種"苦"，所以我同爸B決定要為小JM整返本護照， 等來緊十二月可以一齊去台中探朋友兼過結婚週年添！（三人行既結婚週年） 其實為小JM申請護照唔算難，只係需要網上預約同做啲簡單既手續就可以， 所以真係好方便架，最緊要就係預先上網做定預約， 咁就可以節省好多輪候既時間架啦。 網上預約知多啲 網上預約申請護照服務 （含連結） ＊預約服務分為兩類，而所需要既資料亦會有少少唔同架，所以預約既時候就要小心啦！ ＊一般可以預約既日期為二十四個工作天，所以要自己預返日子同時間啦，同時星期六會比較難預約到架！ ＊如果預約後需要更改或取消，亦可以係網上作出修改架！ ＊除左網上預約，亦可以透過電話進行預約：2598 0888 類別一）： 所有人士適用，但由出生翌日起計至第四十二天的新生嬰兒除外 類別二）：在香港出生翌日至第四十二天的新生嬰兒適用 如果係為小B申請而小B已大於42日既話， （以小JM為例），就應該以類別一既分類去做網上預約。 進行預約既時候會需要輸入以下資料： － 申請人既HKID號碼 （如果小B未有HKID，就要輸入爸B／媽咪既HKID號碼作） － 申請人既HKID簽發日期 － 小B既出生日期 ＊見下例參考圖 查詢號碼係由自己而定既，輸入四位數字就可以架啦， 可以方便之後再查返紀錄嘛！ 完成資料輸入部份後， 就可以揀預約既辦事處，再揀埋日期同時間就可以遞交預約申請架啦！ 預備申請文件 完成網上預約後，就需要為小B準備申請文件， 仲要帶小B去影相鋪影返張靚靚相添！ 申請文件如下： （以下資料以小JM為例，小JM係無HKID架！） － 表格ID 842 （適用於16歲以下兒童的本地申請書） － 表格ROP 3 （適用於無HKID既小B們，另需要多一張相片，即總數兩張） － 表格ID 641 （副署師項表格；需要貼上小B照片，及由父母以外既第三者簽署，而簽署必須跨越照片） － 出世紙正副本 （如忘記印影可於辦事處影印架！） － 爸B 及 媽咪既HKID （前後總其需要 3 張相） ＊＊注意＊＊ 必須係遞交申請當日 或 領取證件當日帶同小B同行 （其實一次就可以了） 護照相片規格及注意事項 相片規格： －相片大小為 40cm (W) X 50cm (H) －需要清楚展示申請人既正面 －白色背景 注意事項： － 相片中既申請人必須位置於相片既正中 － 頭髮不可擋住眼睛 或 眉毛 － 不可太光、太暗、有陰影或反光 － 如果有戴眼鏡既話，眼鏡盡可能唔可以擋住眼睛架 － 如果小朋友要紮辮既話，就要用黑色橡筋，及 不可配戴頭飾 ＊ 基於照片有得到規格，為左方便起見，建議帶小B去特定攝影專門店影 有啲專門店甚至會有Package，提供埋數碼相片檔案添架， 當然，價錢就可能比普通相片貴少少啦 （小JM今次都係去左專門店影，因為門市太多野吸引小JM啦，真係要花好多時間先捕捉到小JM望鏡既時刻） ＊我地今次Join左Package，要埋數碼相底，大約HKD 85 就有一隻CD連 8 張證件相啦！＊ 遞交申請當日既流程 及 收費 當日流程相當簡單， 只要係預定時間內到達辦事處排隊， 並到指定窗號 （1、2號窗）遞交申請文件， 遞交文件後將會獲得籌號。 之後既時間就係等工作人員叫籌號， 再簽名同核對資料， 當然工作人員亦會對照一下小B既樣同張相係咪同一個人啦！ 完成晒之後就只需要等嗌名俾錢， 咁就完成晒架！ 俾完錢之後就會得到一張領證通知 （如下圖） 爸B 媽咪們就要記得收好張收據啦， 唔係一陣唔見左無得拎就唔好啦～！ 收費如下： 小B們的護照有效期限為五年 （十六歲以下兒童） － 三十二頁 HKD＄185 － 四十八頁 HKD＄230 因為小B們大得比較快，所以我地只係幫小JM申請左 32頁既護照咋。 順帶一提，申請護照後會有埋HKID俾埋小B架，所以爸B媽咪唔需要另外再為小B申請。 趁著仲有半個月時間，等媽咪我為小JM打點一下旅行既裝備同日用品啦， 最緊要就係帶小JM鍾意既小食，睇來，又係時候準備為小JM入貨啦。 >>> 看更多親子旅遊分享 <<< 如有任何查詢／合作，歡迎聯絡 我 同 小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯 與 晴 （Jolie Babe。小JM の 成長印記）
