不知不覺間原來已經全母乳十一個月了！   好開心呢段時間得到媽咪同老公支持 令我係唔開心既時候、失落既時候都有個依靠， 亦好多謝佢地既安慰同體諒。 多謝你地呀‌！   全人奶既呢段日子或者我係算得上比較幸運既一個， 可能相比其他奶媽易過少少  因為我好慶幸自己無試過塞同發炎， 仲可以「逼爆」雪櫃既冰箱， 但亦好多謝 小JM 啜得叻食得好 ， 只要小JM 需要我我就會餵 ， 見到小JM 健康快樂我就開心滿足 ， 為左小JM 幾辛苦都抵 ！    小JM,  你好叻豬呀 令到媽咪張成績表好靚呀， 多謝你！   小JM既體重成長紀錄： 出世     5磅半  兩個月 10.3磅  四個月 13.3磅  六個月 15.3磅  1歲        TBC （好緊張呀）   雖然小JM未至於肥到好似米芝蓮咁， 但一直體種都係保持係中游位置， 令媽媽都覺得好驕傲，至少你唔係 「瘦奀茄」。   提到餵母乳，好多人都會覺得要保持奶量會有一定壓力， 但其實「壓力」從來都係自己俾自己， 只要媽媽多啲放鬆心情， 保持心情開朗愉快、多休息， 真係可以做到長餵長有架！   今次就等我 小JM媽媽為大家介紹 簡易泌乳湯水 及多款炒米茶來為各位人奶媽媽打打氣啦！   先來介紹，坐月媽媽必備良品    －「炒米茶」   簡易 炒米茶 製法：  －    先洗淨白米，待乾 －    再用白鑊將米炒約十分鐘至微微金黃色即可     ＊白鑊，即係無任何油鹽糖既調味＊   待炒米攤凍之後就可以用器皿盛載，以便日後用來沖「米水」之用， 所以建議有時間可以一次過炒定多啲， 唔駛要用先炒咁麻煩。   ＊＊另外亦可自行加入 紅米、黑米或糙米，以增加功效。＊＊ 米米們的功效：  紅米 －養心、補血 黑米 －補腎 糙米 －健脾補脾   炒米茶坐月要成日飲， 當然就會想要多啲口味同變化， 以保持新鮮感啦， 就等我為大家介紹下我坐月至今所飲過既唔同口味既炒米茶啦！   ＊＊我係用炆燒壺整炒米茶，而唔係煲架 ＊＊   果皮炒米茶 材料： 果皮    四份一個 或 半個 炒米    兩湯匙   做法： －    先將果皮浸軟，並刮除果皮上既瓢， －    再將已炒既米及果皮放入茶包中 －    以熱滾水泡浸即可     （最好岩岩煲好既，以確保夠熱） ＊＊陳皮有健脾及行氣既功效，而且較為正氣，皆適合順產及開刀媽媽們＊＊   紅棗圓肉杞子炒米茶 材料： 紅棗    四 至 五粒 圓肉    四 至 五粒 杞子    適量 炒米    兩湯匙 （可按需要改用南棗亦可）   做法： －    先將紅棗、圓肉、杞子洗淨 －    將紅棗去核，切開一半，備用 －    將材料置入茶包中 －    再以熱滾水泡浸即可   功效： 紅棗 －補脾胃、養心安神、補血 圓肉 －止血安神、益心脾、補氣血 杞子 －補肝腎、益精氣、改善面色、明目安神 南棗 －補中益氣、養血安神   紅棗當歸圓肉炒米茶 材料： 紅棗    四 至 五粒 圓肉    四 至 五粒 當歸    四 至 五片 炒米    兩湯匙 （有需要亦可加入杞子或其他材料）   做法： －    先將紅棗、圓肉、當歸洗淨 －    將紅棗去核，切開一半，備用 －    再將所有材料置入茶包 －    再用熱滾水泡浸即可   功效： 當歸 －補血、增強免疫力 ＊＊當歸唔識合惡露未清時飲用＊＊     首烏紅棗炒米茶 材料： 紅棗    四 至 五粒 首烏    數片 炒米    兩湯匙 （有需要亦可自行加入其他材料）   做法： －    先將紅棗、首鳥洗淨 －    將紅棗去核，切開一半，備用 －    將所有材料置入茶包 －    再用熱滾水泡浸即可   功效： 首烏 －    有助改善產後脫髮   因為好多時媽媽們坐完月返到公司就未必會再飲米茶， 一來可能飲厭左，二來可能覺得係公司整米茶唔方便， 但其實一直以來我都有係公司沖米茶既習慣， 所以都好慶幸開頭返工都無跌到奶量。   因為想返工沖米茶可以方便啲既關係， 我係 "十二蚊店" 買左茶包袋 （見下圖） 只要將材料預先放入袋中， 再放入保鮮密實袋，成袋就咁拎返公司！   咁就可以隨時都可以沖來飲啦！得左！     除左以上呢四款炒米茶之外， 最近開始煲一款 簡易泌乳湯水。   因為早幾個星期自己打敗仗 －病左， 再加上「姨媽駕到」（M Come）， 所以奶量由原本好OK變到少左幾安。。。 再者，媽媽我都有啲懶， 由開頭返工Keep住一日四泵，減到而家一日兩泵咋， 所以要即時作出補救方法， 就係要煲返啲 泌乳湯水補補佢！     泌乳湯水 材料： 王不留行    三錢 杞子        三錢 通草        三錢 黨參        兩錢 黃芪        兩錢 當歸        兩錢 紅棗        六粒 圓肉        六粒 甘草        兩片   做法： －先將材料洗淨 －紅棗去核備用 －將材料放入煲中煲滾即可   因為想方便飲用既關係，我會預先煲好一大煲， 再將湯水放入保溫壺及炆燒杯中保溫， 以便飲用，而唔需要再花時間翻熱。   另外，坊間亦有好多湯水可以幫助增奶架，就好似以下呢幾款： 1.）木瓜鰂魚湯 ／ 木瓜魚尾湯     主要材料：     木瓜            一個     鰂魚 ／ 鯇魚尾    一條     鹽、薑片        適量   2.）通草豬腳湯（可按喜好配幾其他瓜果一齊煲）     主要材料：     通草     豬腳 （洗淨，切成小塊）   3.）木瓜章魚花生雞腳湯 （配豬????亦可）         主要材料：     木瓜    一個     章魚乾    一至兩塊     花生    適量 （鍾意食既可以放多啲）     雞腳    六至八隻     豬????    一舊       飲後報告： 飲左呢個泌乳湯水幾日， 的確係有多返幾安奶， 我亦可以唔駛咁擔心小JM唔夠糧食， 真係好好彩。   不過呢個泌乳湯水係有少少甘甘苦苦既味道既， 如果怕苦既媽媽可能就需要加多啲紅棗同圓肉啦！   希望以上既米茶同泌乳湯水可以幫到媽媽們上奶啦。   係度預祝各位奶媽們         長啜長有         長泵長有兼常滿     ♫ ESDlife靚太Club 。 星級榮譽會員 ★sleepyceci  ♬ ♩BK Milk。親子語。駐站Blogger  ★傑。斯與晴  ♪ ♫ Mami Buy香港媽咪幫。駐站Blogger ★傑。斯與晴  ♬ ♩Ohpama。Oh爸媽。駐站Blogger  ★傑。斯與晴  ♪   歡迎追蹤 小JM 既Fanspage 「傑。斯與晴」：   如有任何查詢/合作，歡迎聯絡我同小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯   與   晴 （Jolie Babe。小JM の 成長印記）