小JM雖然已經踏入全人奶11個月， 但回想起初初小JM降臨既時候， 媽媽我真係有啲「拿手唔成勢」既感覺， 始終係初為人母， 有好多野都係「第一次」做同試， 真係又新奇又緊張， 特別記得當我遇上小JM第一次厭奶期既時候， 簡直就似由天堂再次跌落地獄一樣 真係可以用「來回地獄又折返」來形容 （小JM係我返工前已經自行戒夜奶，Skip左半夜三點個餐，可以由夜晚十二點食完奶訓到第二朝七點） 到底「厭奶期」係咩一回事？ 點解可以令到媽媽們咁恐懼？ 不如又一齊討論下研究下呀～ （諗返起都覺得眼訓，半夜不停醒） 咩係「厭奶期」？ 「厭奶期」其實係指小B們大左之後唔再專注飲奶， 會成日八掛周邊事物，攪到食下又停下咁， 好易受到周邊既人和事而影響到進食。 係厭奶期既時候，媽媽們或多或少都會察覺得到小B們既食量明顯比平常少左， 但媽媽們請放心，呢個情況係正常既。（但變相小B會需要食返密啲） 厭奶期唔會維持好耐，過一段小時間小B就會自自然然恢復往日既進食態度架啦！ 厭奶期會幾時出現架？會有咩徵狀架？ 一般來講，小B們會有兩個階段有機會出現厭奶既徵兆， 第一階段： 三、四個月左右 第二階段： 六、七個月左右 厭奶期出現既特徵： －唔太識餓（但精神度同活躍度依舊） －餵奶時都會將頭扭開／用手推開 －餵奶時會用脷將乳頭／奶咀頂返出來 －不願意吞嚥 －不專注，會四處望來望去，易被外來事物吸引（即 曾經我亦因為「厭奶」問題而係小JM四個月個陣問過健康院姑娘可以點處理， 我有同姑娘講過小JM食奶個陣突然變得好容易分心， 只要有屋企人同小JM打招呼／傾計， 小JM就會即刻將奶咀吐出； 為此，姑娘都建議我係餵奶個陣要俾小B「面壁」 結果又真係好啲。 所以媽媽們真係唔需要太擔， 因為係呢個時期媽媽們只要餵返密啲就可以了。 不如又一齊睇下研究下點樣同小B們一齊渡過「厭奶期」啦！ 點樣可以輕鬆過渡「厭奶期」？ 其實想要輕輕鬆鬆咁同小B一齊渡過厭奶期都唔係一件難事來既， 祕訣我就無乜啦，我都係向健康院姑娘取經， 再自己同小JM進行「實戰演練」而得來架咋， 希望可以幫到各位新手爸爸媽媽啦！ 1.） 定時餵奶，但不強迫 媽媽們必須遵照以往定立既餵哺時間餵小B， 即使小B不願進食也必須跟從， 但媽媽可以按小B需求將餐與餐時間拉近少少。 小分享： 小JM曾經厭奶厭到直頭自己skip左一餐，無論點餵都唔要，樽餵都唔得， 所以只好等下一餐早半個鐘至一個鐘餵小JM係啦， 結果下一餐又真係好好地乖乖埋身／樽餵都食晒！ 其實個陣有時都會好擔心小JM會餓親，但久而久之媽媽已經變到見怪不怪了！ 2.） 幫小B們放電 即係同小B們玩多啲，消耗小B們多啲既體力， 從而增加小B們既肚餓感覺，以幫助改善進食。 小分享： 小JM都上過「被放電」，有時放完電都唔一定會食，但就一定會訓， 爸爸試過係小JM半夢半醒個陣餵，係真係成功既。 不過爸爸媽媽們就要好小心去餵，以免濁親小B呀！ 3.）改善餵哺時既環境 媽媽們餵哺時可以選擇較為寧靜既房間，將燈光調到柔和一啲、暗一啲， 等小B們可以專心一致咁進食。 同時媽媽可與家人商量，當小B進食既時候盡量不要打擾， 以免小B因為受到外來干擾而打斷左進食。 小分享： 因為小JM厭奶期真係完全唔可以專心進食既關係， 結果媽媽我就唯有帶小JM一齊去面壁！ 情況的確有改善， 最重要係要家人都唔打擾先可以完全專心進食。 真係一律嚴禁無啦啦Say Hello／傾計！ 4.）（如樽餵）檢查奶咀口szie岩唔岩小B 爸爸媽媽們要記得每3個月左右就要檢查一下小B們既奶咀， 以確保奶奶可以好順暢咁流出， 因為奶咀洞太細既話小B就會自然食得好辛苦，就會唔想進食架啦！ 小分享： 要定期檢查之餘亦要留意奶量流出情況， 以免有過慢或過急既情況出現， 因為過急小B就會食唔切，會有濁親既機會，從而嚇怕左小B； 而太小呢就會令小B食得辛苦而唔想進食 5.）餵食前可幫小B按摩／沖涼 爸爸媽媽們可嘗試係小B食奶前約半個鐘至一個鐘為小B沖涼／按摩， 因為沖涼／按摩會對小B起到一定既放鬆作用， 可以令小B放鬆啲，再同小B輕鬆咁玩一陣先再餵哺都唔錯架！ ＊通常夜晚個餐沖完涼先餵小JM既話，小JM都會好乖咁食完就訓， 媽媽就可以有自己既時間做自己野！ 總括而言，其實只要小B們夠濕片、有Bubu／放屁 既話， 爸爸媽媽們都唔需要太擔心既， 一時既「厭奶期」係唔會令小B對日後都厭奶既， 厭奶期只會存在係一段短時期而已， 只要順利過渡到就無問題架啦！ 當然，如果小B持續唔願進食，又唔夠濕片， 同時又好似成日無氣無力無精神既話， 就真係要帶小B見一見兒科醫生啦， 以便盡早發現有無其他疾病既存在而影響到小B嘛！ ♫ ESDlife靚太Club 。 星級榮譽會員 ★sleepyceci ♬ ♩BK Milk。親子語。駐站Blogger ★傑。斯與晴 ♪ ♫ Mami Buy香港媽咪幫。駐站Blogger ★傑。斯與晴 ♬ ♩Ohpama。Oh爸媽。駐站Blogger ★傑。斯與晴 ♪ 歡迎追蹤 小JM 既Fanspage 「傑。斯與晴」： 如有任何查詢/合作，歡迎聯絡我同小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯 與 晴 （Jolie Babe。小JM の 成長印記）
