最近睇到好多報導都提及到有左BB既人會遺棄貓貓，話因為貓貓入面既弓形蟲會傳染比孕婦，令孕婦好容易流產/產生畸胎，所以好多人有左BB會選擇將隻貓拎出去比人領養，或者係唔要佢。 每次聽到呢個理由都會覺得好心痛，養寵物係一個一生一世既承諾，貓貓生命中只有你一個人。 做媽媽當然會好緊張小朋友既健康，但當大家從科學小小既角度去分析，貓貓對我地係無威脅架，有既都只係弓形蟲！ 貓咪點樣先會感染到弓形蟲，再傳染比孕婦？ 1. 貓咪經常食生肉，及經常外出捕獵會較易受到感染。一但受到感染，貓咪終生都會有抗體，唔會再復發。一般居家既貓貓，食乾糧、罐罐，就無感染既可能。 2. 孕婦係懷孕期間，進食過生肉，就會有感染機會。但如果係懷孕前已經感染過而又好返，終身都會有抗體。 3. 如果貓咪真係係懷孕期間先受到感染， 同時準媽媽們接觸到貓咪卵囊已孵化便便。卵囊並非立即具有傳染性，而是需要1-5日既時間孵化，一般日日換貓吵， 感染到卵囊既機會較細 4. 孕婦接觸到具有傳染性既便便之後，無洗手既情況下掂到口。或者有直接錫貓貓既行為，先有機會感染。    建議準媽媽們將「剷屎官」呢份工交比另一半／家人幫手。如果真係要自己剷，最好都帶返手套，同埋剷完要用洗手液洗手。 如果都仲係好擔心，可以做埋以下既方法！ 1. 帶貓咪去獸醫到做返個健康檢查。 2. 唔好餵生肉 3. 定期幫貓咪沖涼、剪指甲   唔好因為擔心弓形蟲，而令貓咪唯一信任既人都要失去。寵物唔似人類，唔識表達、唔識搵錢養自己，佢地一生靠既、信任既都係我地。如果作為主人，因為恐懼、唔清楚而拋棄佢地，叫我地將來既小朋友點樣以我地為榜樣去學習呢？ 歡迎媽媽們一齊交流／了解更多90後做媽媽既點滴！將會有更多有趣，扮靚、健康、育兒等等既心得分享！ Facebook：https://www.facebook.com/90sMummy/ Instagram: https://www.instagram.com/minarainlo/