蒙特梭利, 我未有BB前都有留意過呢個教學理念, 以我自己認知, 就係....  一直主張以小朋友為中心, 任由佢地响安全環境中探索, 尊重孩子選擇, 老師同家長响學習過程中只係一個引導角色, 把握小朋友敏感期再加以啟發, 深信每個小朋友都係一個獨立個體, 唔會限定3歲一級, 4歲又一級, 大大細細ge小朋友都一齊上堂, 互相學習 媽呀~!! 根本小朋友就應該咁教呀!!!! 完全顛覆香港幾十年來死記爛背, 老師講咩你記晒寫得返就考第一ge填鴨式教育, 身為一隻沙田填鴨, 我確實係極度希望有朝一日自己有仔女時, 可以幫佢脫離呢個制度, 想當年我中三選科只可以揀文理商是但一樣時已經萌生呢種: 我死都唔要第時仔女只得文理商呢3條路行!!!! ge念頭   有咗之後, 我呢D怪獸家長梗係再深入研究啦~!! 仲買埋書tim~!! 不過我呢D蟻民, 睇完都係跟住做, 做得啱唔啱, 好唔好, 都係一味靠估, 加埋好根深柢固ge填鴨式教育, 搞到好半天吊, 自己又唔知點, 米豬就更加唔知我想點啦, 所以一路都好希望有機會可以入到學校親身體驗一次蒙特梭利教學, 只係一次都好!! 終於, 今年BB展我有機會喇~~ 入場見到有蒙特梭利booth, 就即刻衝咗埋去了解吓~ 咁啱有位靚仔老師就同我講coupon book有free trial voucher a~ 你同小朋友試吓上啦~~ 機會嚟喇飛雲~!! 本身冇買coupon book ge我即刻去CS買返本, 即刻上網登記試堂, 冇幾耐之後就收到email約實上堂時間同地點, 就係今星期6响北角campus上喇~~   學校响0個邊呀媽媽~~    留意返, 因為希望家長同小朋友專心上堂, 同埋唔好影響其他小朋友上堂, 課堂期間嚴禁拍攝, 所以今日係齋字ge~ (確實係媽媽金魚般記憶大考驗)   由入學校講起啦~ 11點上堂, 我地10點7已經去到, 老師們話可以由得米响個hall度玩, 0個度show咗D小朋友平時ge作品, 同埋佢地會用到ge書本, 初初見到有textbook時我係有點shock的, 因為我心目中ge蒙特梭利就係冇textbook吖~~~ hall度有個小舞台, 又有個play area, 有一座室內滑梯, 比小朋友未上堂前响度warm up吓, 身為一隻慢熱米, 玩咗10分鐘已經當正自己主場, 向每一位路過ge老師同同學仔同家長say hello了~~ 今日連埋米豬總共有4位小朋友一齊上堂   到差唔多11點鐘, 其中一位老師(HK)講解咗一陣上堂有咩要留意, 其實除咗唔好影相之外, 最最最重要係再三提醒陪同入班房ge家長(每個學生只限一個家長陪上堂), 呢度係以小朋友為主導, 小朋友揀咗佢想要ge教具, 老師同家長只係輔助角色, 如果小朋友完成唔到, 唔好勉強去幫佢做, 示範多幾次, 如果小朋友再冇興趣, 同小朋友一齊收拾好教具, 放回原位, 再去拎其他教具, 對於我呢D填鴨家長嚟講, 真係要好忍手~!! 講完上堂要留意ge地方之後, 就由另一位老師(外國人)帶所有家長同小朋友參觀學校~~    (真係好憑記憶, 盡寫) 首先有2個大班房, 我見D教具唔係好BB, 應該係for大小小ge小朋, 雖然係mix age class, 但都有分infant(9-16M), toddler(16-24M), PN(20-36M), 同kindergarden(3y-6y+), 大朋友們ge班房有國旗, 填顏色, 有個mini kitchen, 老師會响呢個mini kitchen度同小朋友一齊整野食, 小朋友係會落手落腳批皮, 切件, 清洗食材, 唔係一份份prepare晒你mix晒佢就收工0個d, 仲有一間好大好大ge班房 (但呢個moment米豬扭要落地我miss咗........)跟住就到學校reception, 然後另一邊就有2間小班房, 今日米豬就响其中一間小班房, 上我地人生第一堂蒙特梭利喇~~~~~~~~ 每一個班房都有一個洗手盤比小朋友清潔小手的~~   同爸爸byebye之後(爸爸同其他2個家長自己坐响reception等我地), 我地就除鞋仔入班房喇~ 今日有4位老師啊~! 2個香港老師加2個外藉老師, 全英語授課, 媽媽要轉明珠台~!!   米豬豬的page~ 每日都update~ 歡迎各位like&follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/   蒙特梭利試堂記: 學媽媽 - 蒙特梭利試堂 - 校舍篇 學媽媽 - 蒙特梭利試堂 - 課室自由explore篇 學媽媽 - 蒙特梭利試堂 - 小組唱歌篇