歷奇，好多人都知係刺激嘅活動，叫得歷奇王國，咁入面嘅活動當然都會刺激架啦！今次嶠媽一家同埋兩姐弟契爺契媽，一行六人去左位於愉景灣北商場地下嘅 EpicLand 歷奇王國玩，務求要大人細路都放爆電！去愉景灣可以係中環搭船，係碼頭再轉巴士 T4 / T9，總站落就係北商場，其實夾埋搭船唔洗一個鐘就到達！ 去到要先填 Waiver Form，但進入智能手機時代，大家亦可以係 App Store download「EpicLand」，直接禁 Waiver Form，再填寫所需資料，之後就會收到確認電郵，再 show 比職員睇就ok！ 之後必做，除鞋放鞋櫃！因為全個歷奇王國範圍都只可以著住襪來行走。 首先我地玩左哩個彩虹滑梯，但小朋友要注意，安全理由，未夠一米高係禁止參與！唔好睇佢好高，如果你條褲質地唔夠滑，其實滑落黎都會好慢！ 挑戰完彩虹滑梯，夠膽量就可挑戰黑洞滑梯，我真係唔敢玩！但嶠爸同契爺玩左一次，玩到手都擦損左！我真係聽到聲都驚！都係要注意，黑洞滑梯要1.2米高先可以參與架！ 嘩！芊嶠著哂裝備做咩呢？ 原來係要挑戰哩個小型攀石場，芊嶠真係好大膽，媽媽都覺得好驕傲！叻女！ 場中間，仲有個小型高球場，好多格，有難度高，都有難度低，契爺契媽好用心咁教芊嶠玩，芊嶠玩到唔捨得放手添！ 另外，唔少得嘅兒童玩樂區，啱哂劻霖哩啲未夠一歲嘅小朋友玩！有兩款滑梯，有機械狗車車，仲有迷你搖搖板，芊嶠同細佬真係好鐘意玩搖搖板，睇佢地玩得好開心！ 係小寶寶爬行區，都有好多新奇刺激嘅設施玩！最特別都係哩個波波池，下面真係有水架！坐係上面彈下彈下，大小朋友係上面跳呀跳，感覺都好正架！ 之後哩個位真係夠哂累，我陪芊嶠玩左3、4次，我成個人被放電，流左好多汗，累到一個點。真心佩服小朋友們，精力點解可以咁旺盛！ 波波池區，不得了！有波波噴射槍玩，不過要好小心，千其唔好向住其他小朋友射呀！另外，螢幕係新置嘅，拎住波波掉向螢幕，會有爆炸畫面出現架！ 仲有個小型籃球場，芊嶠咁細個都可以入樽！ Jump Jump 跳彈床，絕對係放電處，芊嶠都入左去跳左無限次！ Air Trek 空中漫步，真心佩服芊嶠契爺契媽嘅勇氣，敢上去玩已經好叻！你又有冇咁嘅勇氣呢？注意，小朋友要夠1.3米高先可以參與，沒有例外！ 大人版攀石場，嶠爸同契爺都出盡力去攀，佢地都話好辛苦好累，我心諗：應該係年紀問題！ 原來係後面，仲有另類籃球射籃體驗，嶠媽試玩過，好易入到籃架！ 仲有，冒險樂園必玩「氣墊球」，哩到免費任玩，玩到夠都得！ VR 射擊體驗，$25/次，好抵玩！ 玩完 VR 射擊，過來玩坐係到嘅 VR 體驗，兩個大男人，梗係玩恐怖野啦！每次 $25/人頭，即是兩個人一齊玩就盛惠$50。 仲有哩個超刺激 VR 體驗，契媽玩左 VR 過山車，成舊野仲會打斜，斜得好勁下，都只係 $30/次，我睇到都覺得刺激！ 玩得累，可以去餐廳醫下肚先，有各款包類食品，漢堡、熱狗、三文治。仲要有 baby highchair 提供，好貼心！另外，唔少得咖啡類飲品，同埋其他飲品和水供購買。 另一貼心設備，就係有大人小朋友拖鞋提供，等你去廁所都唔怕會整濕對襪仔！小朋友個款仲要係阿Brown，芊嶠真係勁鐘意著，想著埋走添！ 最後，我地玩左差唔多四個鐘，就決定走啦！比啲貼士大家，出返北商場，惠康附近有部八達通機，拎八達通卡去拍一拍，回程坐 T4 / T9 巴士出返愉景灣碼頭，個程巴士就會免費，所以玩完記住要去拍一拍先上巴士。 另外，去到愉景灣碼頭附近，係 D’Deck 嘅指定餐廳食野，一人食滿 $120，最多5個人，可以去免費郵輪服務台，拎埋你嘅八達通，咁就可以免左回程嘅船錢！即是我地5位，食左$614，每人夠$120，去申請，咁就可以免費搭一程，計埋剛剛巴士拍左卡免費，我地回程車錢都慳左$44.4啦！5個人慳左$272，好抵！想玩得開心啲，跟住我地咁做啦！ ======================= 歷奇王國 EpicLand 地址：愉景灣北商場地下 開放時間：09:30 – 19:30 (星期一至日) 電話：2441 0098 入場費：星期一至五 (公眾假期除外)：$148 (12歲以下，已包一成人)，$168 (成人)；周末及假日：$188 (12歲以下，已包一成人)，$200 (成人)。 Facebook：https://www.facebook.com/epiclandhk/ Website：http://www.Epiclandhk.com/