副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

多囊卵巢患者想懷孕無有怕!

Hello大家好!呢篇係我係呢度既第一篇文,同各位媽媽分享我同小朋友既生活點滴前,我想同大家分享下我擁有兩個寶貝前既懷孕史!話說係擁有佢地之前,我曾經流產3次! 點解? 因為我曾經患多囊卵巢綜合症(以

Hello大家好!呢篇係我係呢度既第一篇文,同各位媽媽分享我同小朋友既生活點滴前,我想同大家分享下我擁有兩個寶貝前既懷孕史! 話說係擁有佢地之前,我曾經流產3次! 點解? 因為我曾經患多囊卵巢綜合症(以下簡稱多囊)。 多囊(poly cystic ovary syndrome: PCOS),是一種生殖功能障礙與糖代谢異常並存的内分泌紊亂综合症,也是生育期婦女月經紊亂的最常見原因。患者經超聲波掃描後,會發現卵巢滿佈微小的囊腫,排列如珍珠項鏈狀的不成熟卵泡達10個或以上。形象化D咁講即係正常女性每個週期會排一粒又靚又成熟既卵子,而患多囊女性就會將力量分散左,嘗試同時生產好多粒卵子,結果因為力量唔夠集中導致無粒卵子靚。最麻煩係卵泡未能及時被身體吸收,搵到累積係卵巢度,影響埋下次排卵,導致卵子質素每况愈下。 而我流產既原因就係我既質素唔好既卵子遇上了精子,形成一粒唔健康既授精卵,所以佢會自己慢慢萎縮,自然排出。不幸之中既大幸係我三次都係自然流產,無需手術同食藥。過程除左出血,仲有陣痛,感覺好似經痛咁。當然最難受係心痛﹑徬徨同失望!不過,幾心痛﹑幾徬徨﹑幾失望都過去啦!因為我真係太想擁有自己既小朋友,加上唔肯認輸既性格,努力嘗試唔同方法,當然好感謝上天賜俾我地既緣份,我分別係2014同2016年誕下我既兩個寶貝Aidan同Angie!!!媽咪真係好感恩同好愛你地! 成功心得係乜﹖嗱!唔好CHER我,千真萬確,真係首先要放鬆心情!!!其實食中藥﹑針灸﹑IUI﹑食排卵等好多方法我都試過,我相信唔同方法一定有唔同好處,適合唔同人,但就真係要以平常心去面對,反而會事半功倍!我知道講就易做就難,但試問心情緊張,搵到荷爾蒙失衡,身體點會好呢﹖所以,維持輕鬆心情係必須既,好多謝當時身邊有好多好朋友同好同事聽我傾訴,幫我排解壓力! 接下來同大家分享我個人既成功方法,時間用左幾年,方法用左好多,但我自己感覺當時幫到我既係中藥同針灸!其實中醫我都睇過好多個,一次成千蚊,平均一劑藥成三百幾既都睇過,但效果一般。好感恩後來遇到一位好好既女中醫師。佢開既藥好平和,唔會有好多大補藥,所以價錢唔會太貴,而且藥力溫和,味道唔會太難接受。重要既係,我經過一段時間調理後,有以下改善﹕ 健脾﹕腸胃好左好多,無咁容易胃痛,因為中藥改善了我既脾虛,脾主腸胃。 解肝鬱﹕師話我因為生B既問題太抑壓,形成肝鬱。調理後我感覺成個人都舒服左,心情放鬆左,睡眠質素亦有提高。 補腎﹕腎主生育,補腎當然都係重點。我經調理後腰背酸痛大大減輕。估唔到原來我一直腰痛係源於婦科問題,呢個問題既改善都一個意外收穫。 此外,我當年每個星期會去做一次針灸,主要係補腎同幫助排卵。 我覺得多囊卵係一種屬性體質性既病,所以我個人選擇用中藥同針灸去調理好體質,令身體自然生產出成熟既卵子。而且陀b本來就需要有強健既體魄,我想俾一個好既環境俾bb! 不過提提大家,中藥調理係固本培源,需要好有耐性同恒心。我當時都睇左三個月先開始有明顯效果,一年先成功懷孕。 文章好似太長添,同埋第一次寫一定有好多需要改善既地方,希望大家唔好介意!患有多囊而又想懷孕既朋友,千奇唔好泄氣!最緊要保持平常心!加油呀! Follow Me Facebook : conniemamaaa IG : @conniemamaaa