上次講到Miu媽喺懷孕期有妊娠糖尿，今次同大家Share返妊娠糖尿媽咪生產過程。 因為妊娠糖尿要戒口，懷孕後期醫生話Miu miu Baby比同期BB細粒。需要提早1～2週催生（Bb出世後媽咪糖尿指數就會恢復正常，BB通過自行飲食就可快速增磅）。經過同Miu爸多方求證後（有再諮詢其他婦產科醫生同有妊娠糖尿既朋友）最後同醫生決定喺39週進行催生。因為我始終想順產，醫生就建議通過塞藥催生（塞藥入產道，令宮口提早打開，由產婦自行生產）。 前一晚食完晚飯就入院辦理登記，隨即姑娘就安排床位。我就叫Miu爸返屋企休息，當晚12點姑娘就幫我塞藥（小痛，比起懷孕後期指探已經好好多）。塞藥後個半小時左右已經感覺到穿羊水同M痛感覺，即時叫姑娘檢查。不過由於宮口未開，姑娘都無辦法，叫我嘗試休息。再過多20分鐘左右痛楚加劇，已經無法入睡。8分鐘就痛一次，維持數分鐘不等（⚠️個種痛就好似1萬隻大笨象係個肚度遊走）。 期間，幾個姑娘都有問：你咁痛，洗唔洗幫你打無痛啊？我都一一拒絕曬（1.怕無痛打落背脊後會造成傷害，因為有朋友產後腰骨經常痛。2.係驚打無痛後無知覺，無法順產）。 成晚用電話紀錄低D陣痛頻率，都唔知點捱到6點幾，姑娘話已安排好產房，叫我打電話俾先生叫佢過嚟。Miu爸到達後，隨即我就比姑娘推咗落產房。助產士幫我檢查，原來宮口已開到7、8指，同時俾笑氣叫我吸（止痛）。一聽到止痛就喺咁嗱住索，一索入去好暈好暈，好似飲醉酒咁。但真係無咗痛既感覺，所有嘢都變到好似發夢咁⋯舒服咗一陣，笑氣就慢慢無用，係咁索都無效，再次Feel到痛。 又唔知過多幾耐，助產士突然同Miu爸講：Bb心跳跌得好犀利，由百幾跌到得返80幾。我哋要即刻同你太太安排開刀，Bb宜家好危險！Miu爸同意後，就見到產房內D姑娘個個都好緊張咁準備一切，滕出滕入！無幾耐就見到醫生到咗，話我知我同Bb既情況。要我自己簽紙同意開刀，迷迷糊糊咁，簽咗個名。麻醉師就同我係背脊度消毒同注射麻醉劑(好多開刀既朋友都問我打麻醉有咩感覺，但我當時實在太痛，個支針對我真喺無感覺)，無幾耐痛楚消失。嘩，個一刻真係好似去咗天堂咁啊！！文字真喺無法形容！！ 又過咗10幾分鐘，突然就聽到Bb喊聲。朝住喊聲望過去，MiuMiu Baby出世啦！兒科醫生同姑娘都係度幫Miu Miu Baby檢查&清潔緊，而我就係度縫緊針。過咗陣，兒科醫生就將Miu Miu Baby抱過黎同我哋講：恭喜曬爸爸媽媽！我哋幫Bb檢查過，一切正常呀！跟住將Miumiu Baby放係我隔離幫我哋一家三口影咗第一張全家福！望住呢個小生命，第一感覺好細粒！好醜樣！同時又覺得好奇妙，懷胎九月突然就出現係我面前，有D未反應到！影完相後，兒科醫生就抱走Miu Miu Baby入兒科。醫生同我講，辛苦你啦，快D合埋眼抖下啦！好似俾人催眠咁，聽完呢句話，我就秒睡咗⋯ 一醒返，見到有2個姑娘問我有咩感覺。我Feel到自己勁凍，係咁同姑娘講好凍！姑娘摞咗張被黎包住我，依然好凍好凍。姑娘就再摞多幾張被比我，包實我！凍到入心入肺。都唔知點又瞓著咗，喺熱返醒既！醒咗後同姑娘講我宜家好熱啊~姑娘見我OK就推我落病房。 就喺咁樣，我就食咗一個早晨全餐（經歷順產既痛，最後又要承受開刀既痛）啦！