馬鞍山係區外人好少會去既地方。成日聽人話馬鞍山好舒服，去過先知原來該區人口密度較低，而且綠化做得好好，處身個度真係成個人會感覺輕鬆D!當中既馬鞍山公園，康妮媽覺得係週末帶小朋友既放電好去處！不過，話就話公園，點只公園咁簡單！等康妮媽根據平時我地一家去玩既經驗，同大家分享一下個度既五個特色啦！ 公園內設施豐富 馬鞍山海濱長廊，靚景!康妮媽Like! 單車徑，沿途美景 CaSa Cafe & Bistro 康妮媽Like! 烏溪沙沙灘  康妮媽﹑爸爸同Aidan﹑Angie通常自己揸車去，沿途風景都唔錯，而且車少，駕駛者可以同時享受駕駛樂!   大家可以睇下呢幅圖，先了解下馬鞍山公園既佈局同設施。康妮媽一家通常會去4、9同10號區! (網上截圖:https://goo.gl/images/gSqMVw) 首先公園內有好多綠色草地可以俾大家野餐，俾小朋友跑跑跳跳，玩下波波，吹下泡泡。當然唔少得兒童遊樂場，而且分兩區，都算幾大架！其中頗有特色既有一個遊戲組合屋，好得意呀！Aidan 同 Angie 都好中意！   差點忘記話俾大家知，呢度仲有個迷宮添！ (網上截圖: https://goo.gl/images/WXyMR5) 第二個特色就係馬鞍山海濱長廊。其實公園就係海濱盡頭，所以去開公園當然要去一去，呢度係康妮媽最鍾意既一個point!因為呢個海濱特別乾淨，特別寧靜，前臨沙田海，遠眺八仙嶺，真係令人心曠神怡！通常我地玩到黃昏，仲可以睇埋日落添！如果小朋友瞓左教，又或者小朋友比較定既，仲可以同老公黎個幾分鐘的約會，散散步，傾下計，拍下拖。正！   想運動量再大D? 無問題！呢度其實有條單車徑。整條單車徑係沿著海旁，途上風景叫人難忘！建議可從沙田城門河起步，沿吐露港東岸騎行，進入馬鞍山，並以烏溪沙石灘及公眾碼頭為終點。因為呢條路線比沙田至大埔段較短，但景色一點也不比其遜色！ 另外，康妮媽為大家介紹馬鞍山公園旁的一間cafe - CaSa Cafe & Bistro！我好鍾意呢間cafe。因為我係愛咖啡之人，呢間咖啡唔錯。有時玩到攰入去品嚐一杯咖啡，都已經係一大樂事！我覺得湊住小朋友雖然開心，但其實都幾辛苦架，所以一定要識得為自己尋找更多個中既樂趣！而且，Aidan同Angie都好鍾意呢度，因為佢既野食都好吸引，尤其係甜品。大家去開不妨試試！ 如果天氣許可，大家仲可以考慮同小朋友去烏溪沙石灘玩下。由馬鞍山公園沿單車徑步行約十分鐘左右便可到烏溪沙海灘。唔少人特地黎呢度欣賞石灘上既心形石堆 - 海之心。黃昏時分去仲可以欣賞埋日落，湊住小朋友都一樣可以咁浪漫! (網上截圖: https://goo.gl/images/Dazbkx) 最後，其實馬鞍山公園旁仲有個公共圖書館同體育館。體育館內有個奇趣礦洞為主題既兒童遊戲室，費用全免，都係一個唔錯既放電之選！ (網上截圖:https://goo.gl/images/38QQgQ) 馬鞍山公園一帶真係好多野玩架，可以同小朋友有好多唔同既體驗，而且康妮媽鍾意佢既設施好集中，爸爸媽媽帶住小朋友就無咁辛苦啦！康妮媽誠意推薦俾大家！ 公園位置 地址 ： 沙田馬鞍山鞍駿街十二號 開放時間：06:30AM-11:00PM 交通 鐵路 馬鞍山港鐵站A出口 步行約十分鐘 巴士 A41P, 40X, 85M, 85X, 99, 99R, 86C, 86K, 86S, 87D, 87K, 89D, 286C, 286M, 680, 680X, 681, 682, 682A, 885 小巴 26, 803, 805S, 807A, 807B, 807K, 807P, 808, 810, 811S 駕車：可泊馬鞍山泳池，馬鞍山廣場或新港城中心。 我地通常泊公園附近既爛地停車場，價錢平D，又一定有位! 大家可以考慮下。   馬鞍山兒童遊戲室  主題：奇趣礦洞 面積：130平方米 開放時間：早上8時至晚上9時50分（不包括上午11時25分至12時）  Follow Me⬇️ IG : @conniemamaaa FB : @conniemamaaa