由有左蠔豉妹妹後，我同老公最關注既問題就係邊個湊小朋友~ 以前既我無諗過要為小朋友辭職...所以我地商量左好耐，有諗過請保姆、鐘點，但就一直唔想請工人姐姐... 其實我地知請工人姐姐最化算，但因為住屋問題，同唔想有外人係屋企，所以一直都拖字訣~~ 直到真係妹妹出世生嗰一日先叫老公去簽約 :p   請工人姐姐時，我同老公有以下要求: 1. 要有湊初生BB經驗 2. 唔怕貓，但不用照顧貓咪 3. 願意同婆婆share房間 4. 已婚，有小朋友   其他非必需條件有: 1. 識廣東話或國語(方便同婆婆溝通)   其實前後agent都俾左3、4個姐姐我望，最後得一個合眼緣，拿，有時真係好講眼緣，話晒同一屋簷下，唔啱既真係好難過嫁...   工人姐姐係蠔豉3個月大既時候黎到~ (當時因爲工人姐姐未到，我多請左一個月no pay leave照顧妹妹~) 一開始我聽過太多朋友話工人差既事情，所以我都好驚，但好彩暫時工人姐姐黎左半年都幾好~   其實同工人姐姐既相處之道無話啱定錯，不過我係用以下方式~ (姐姐有周不時話我知好多謝我，覺得我地好好，話會俾心機做，當然唔知真定假:p)   1. 唔好要求姐姐又要做家務、又要煮飯、又要湊B！ (大佬，如果有咁完美樣樣都做得好，其實世上得兩個人有可能，就係你自己同你阿媽 :p)   2. 當姐姐係家人 講真，姐姐離鄉別井黎香港打工，最親既暫時就係僱主一家，一齊同枱食飯，問下佢想食乜，買甜品時問一句食唔食，其實有幾難？   3. 要有禮貌 工人姐姐其實只係你僱員，世上無左奴隸好耐，麻煩人地幫你時，講句唔該、Thanks其實係必須！ (順便教埋小朋友要有禮貌~)   4. 講明工作範圍 雖然我當姐姐係家人，不過第一日我就話到明有乜工作範圍~ 例如照顧妹妹係最主要工作，有時間就每日要掃地、抹地、煮飯~ 換床單、洗廁所、廚房呢啲就一星期一次就可以~ 而買餸、照顧貓貓、同蠔豉沖涼、氹訓覺、陪玩都唔洗工人姐的做~ (你返工第一日我相信你老闆都有話你知job duty係乜，無人係你心入面條蟲，你唔好以為有人會自動波同你做晒所有野~~)   5. 每月review 每個月出糧時都係一個好時機讚下工人姐姐有乜做得好，有乜可以做更好~ (作為一個HR，你唔個個月加人工俾個staff，唔該你都用言語上作出獎勵，你可能覺得無乜用，但我信可以令對方更有歸屬感~)   6. 互相體諒 有時我第二日要好早起身工作，我會同工人姐姐講麻煩今晚蠔豉妹妹如果半夜扭計要幫手睇睇~ 如果前一晚妹妹好扭搞到工人姐姐無得訓，我會叫婆婆下午幫手，等姐姐下午可以休息多一、兩個鐘~ (工人姐姐係工人，但都要休息係咪？大家做人媽媽，其實好知晚上無覺好訓既感受~~)   其實仲有好多相處之道，我成日都信，你對人好，人對你好~ 如果我對人好，人地都對我唔好，咁就唔係我問題啦~ 我想多個人照顧同錫妹妹，而唔係請個人返黎對妹妹差嘛~ 都係嗰句，你有做過打工仔，你都想有個好老闆，就算錢唔多，但做得happy~   我終於都幫蠔豉妹妹開左FB la~大家想睇佢日常無聊事就可以睇下:p 蠔豉妹妹之貓奴生活   Facebook : 80後的人妻「旅」友  Instagram : https://www.instagram.com/wingring 合作／邀稿 : wingring417@gmail.com / wingring@ymail.com