我屋企冇請工人，所以基本上都係自己一手一腳包辦照顧屋企，講真，真係身心疲累。最近見到網上有招聘職位，冇收入冇假放24小時工作極有愛心等等，講緊個職位就係媽媽，都係要黎話比大家知媽媽有幾偉大，要大家愛錫媽媽同老婆，我覺得出發點係好，不過講黎都嘥氣，未做過人阿媽根本唔會因爲睇左你一段精心設計嘅文章或短片就會體會到做媽媽嘅辛苦然後就好似轉死性咁對呢個角色嘅人愛護有加。 大家都知道照顧一個小朋友係幾咁損耗精力，喺男人角度永遠覺得女人唔洗做日日喺屋企幾咁嘆！又會覺得自己返工揾錢係幾咁偉大，要承受工作同經濟壓力，所以喺屋企自己做左個大爺係理所當然嘅事。錯！錯！錯！大錯特錯！如果你係愛錫自己嘅老婆就唔應該咁諗！ 你地做男人嘅返工辛苦我地做女人嘅點會唔明，喺香港地我地呢啲普通家庭出身嘅女人結婚生仔前有邊個係未做過野未打過工丫。放工有個乾淨整齊嘅屋企比你休息，有新鮮滾熱辣嘅飯餸比你食，乜都準備得妥妥當當，咪又係屋企個女人做。返工咪又係辛苦果10個鐘8個鐘，我地做足24個鐘又點計，講真，同隻小魔怪單拖博鬥左一日，見到老公返到黎想佢幫下手好正常姐，又話好累好眼訓，其實又唔係要做啲咩，都係拎張紙巾呀，倒下垃圾啲簡單野之嘛，都唔得嘅。 今晚阿女為左要睇電視唔肯沖涼，沖涼時發哂脾氣，到着衫時我真係忍唔住大聲喝佢一下，因為博鬥左一日情緒要爆喇，就比老公話返轉頭，其實我咁大聲喝個女自己都唔想，好心痛架！老公話我唔識照顧個女，小小野就黑面忟哂全家人，不如返出黎做野仲好啦！其實你有冇了解過我關心過我？我想講我點解要喝個女係因為我唔想佢覺得佢一扭我地就會就住佢，仲有就係老公都好寵個女，如果我都係下下就住佢就會變左溺愛，你唔做醜人咪我做囉，又唔得！仲要叫我學下婆婆咁EQ高啲，做婆婆嘅就緊係EQ高啦，錫哂個孫架嘛！ 講真，當我做到累心情唔好時都只係想老公攬下自己講幾句説話哄下自己，但係一直以黎只有渴望，從來冇實現過。