早幾日失眠，無聊就睇返仔仔出世都而家既相 果陣既回憶就返哂黎，係又開心又痛苦 所以就想見仲記得大部分，記錄一下 仔仔文一一係早產B， 預產期2月20日，但1月26日出世 不過人地生B就3日2夜，4日3夜 而我就訓左醫院足足7日6夜 同埋好多小插曲，所以好長篇 但都希望大家可以睇哂 25/1 （36wks2d): 本身係正常如果返工，都係狂去廁所 係10點幾左右去廁所發現抹到有一點仔粉紅色 （心諗：唔會掛，都未夠期） 由於太少又唔痛，上星期試過但出現一次就無，所以無理到 之後11點幾又再去，再抹又有，今次再多少少 甘就同老公講聲先，話好似見紅不過得好少好少 不過開始有少少M痛既感覺 佢睇到就即刻叫我去醫院 我本身都唔想甘快去，但係甘比佢哦～～～ 跟住我做埋少少野就同一位同事講聲的去醫院 佢果下嚇左一嚇，然後叫我快D去 （其他同事lunch先知我原來走左）哈哈 由於老公早走可以陪我一齊去醫院 所以去上環join佢一齊食埋個lunch就去 去到真係濛下濛下，其實除左似糖水果次有黎過之外 今次係第2次黎，仲係去K座（上次S座） 由於臨時黎，咩都無帶，淨係俾左我地ID Card 登記 之後姑姑就話因為都近37週，所以點都係留院觀察 跟住叫我去換衫，發現又多左紅，老公叫左出去等 換完衫等一陣就去撿查照一照同用鴨咀鉗 第一次用鴨咀鉗，個感覺好怪但唔痛既 醫生話有落左盤，但未落哂 之後再聽一個鐘胎心就放我自由 換左第二知床位，係窗邊（正呀） 放低野搞掂後就出去搵老公 果陣都已經3點，都係間唔中有M痛 由於過哂探病時間無得入黎陪我 叫佢返公司，放工先再黎 佢走左我就不停FB, whatsapp因為真係好悶 但發現得返39%電又無尿袋 即刻whatsapp老公，借都借個返黎 小插曲： 訓左一陣，之前比班實習醫生嘈醒左 有5個實習，1男4女 開始只係話可唔可以問下我懷孕狀況 甘的又無野做，吹下水都好 問左3條普通問題就大家dead air左 靜幾廿秒就問一條，我答完又air過 我都忍唔住笑 佢地問多幾條，重複air左幾次就完左 但點知隔唔夠幾分鐘又黎搵我 好怕羞甘問可唔可以俾佢地試下摸肚 甘我又係見無野做，又俾佢地摸下 我望住佢地，摸下禁下 有人摸到好開心 有人唔識摸唔知點算好 最後搵埋老師入黎直接上左一堂 但見住佢地都好認真聽書抄notes 大家如有機會無影響下就俾佢地實習下 多D實習，但可以減少失誤 隨時將來再生既時候 佢地可能就係診治你既醫生 之後都無咩特別，6點探訪時間 6299老公都黎左探我 但當佢地走哂之後 8點幾，我開始再痛密左 感覺好似第一日M痛甘，但無規律既 本身都係玩下電話，訓下甘 去到12點幾1點，我係開始痛醒左（我好怕痛嫁） 之後全晚都訓唔到，因為好痛 大約由初初30分鐘左，到慢慢變成15－18分鐘，再到8-10分鐘 果陣係覺得而家甘痛，之後點算 就係甘無得訓挨到第二日 26/1 （36wks3d): 果陣見紅係再多左 所以我都估係尼兩日生 痛到8點幾終於叫我去檢查 都係照一照同用鴨咀鉗 話再落左同埋已經開左2度多DD （心諗：甘快2度，咪好快生得） 之後由於B鏈報告仲未出，所以我要種豆吊藥水 點知個醫生都唔知係咪玩野 吉第一次（左手）D血出到一半出唔到，話支針有問題 吉第二次（右手）直情無血出，姐係插唔中血管 吉第三次（左手）先成功 我本身已經好痛好辛苦，仲吉多幾針我歎下 有一段時間對手係用唔到力 過左2個鐘，叫姑娘幫我指探下 都係2度… 估唔到，痛苦原來係尼知個時候先係真正既開始 我由2度開到3度足足用左12個鐘 亦明白人地講所謂「好急屎」既感覺 但依然都係好唔規律甘陣痛，隔5-10分鐘不定 老公過黎既時候幫我拎埋走佬袋 佢依然係坐係出面等 我又痛到唔想出去 去到午餐我係根本無胃口食 老公陪我un波un足成個探病時間 由於我真係好怕痛，亦覺得好痛 由開頭痛會縮埋一舊 到有急屎感覺變左要坐係床邊撐住 好似頂住唔俾佢痾出黎甘 （原則我講到甘核突，但事實的確如此） 去到3度之前，我起碼有4-5次指探 最慘明明覺得痛勁左好多就係度數無開大過 2度、2度、又2度............ 問換更前個姑娘好好人唔介意 換更後個姑娘就開始係甘叫我等等先 仲要次次探完都係未到3度，差DD 尾果2次果陣我已經係乞求比我入產房 因為瑪麗係3度可以入產房，聞笑氣打止痛 就係差果少少，點解唔比我入 直到6點，99老公既家姐同妹妹都黎左 （PS： 老公家姐都係有左，預產期後我一個月左右） 見到我就黎面到青埋 一痛連野都講唔到 之後因為知我一定今晚生 所以佢地完左探病時間就係出面坐 去到8點左右，姑娘再指探，一樣無限地乞求 突然見到曙光，姑娘話宮縮果陣有3度 話可以入產房，而家甘岩有一個位 點知，當我坐左係輪椅，姑娘拎文件準備推我去對面產房 就係尼一刻，對面床既孕婦媽媽果下穿左羊水～～ 被人截左糊，要讓佢入產房先 果下即刻由天堂跌落地獄甘（心中十萬個粗口，媽媽們你明果下感受） 因為唔知要等幾耐先再有位俾我入（你知嫁啦，生仔有快有慢） 幸好，等左20分鐘就有位，但對我黎講係好慢長 即刻call老公過黎 入到去等一話即要吸笑氣 因為開始黎料，剛入去就開始痛到85 我狂聞笑氣，果下係恩物 越來越痛，又密左 扯住床邊，手都震埋，狂吸笑氣 雖然得開頭有用，但之後真係攞黎借力轉移個力 感覺上無甘專注係個痛上面 老公一直係我隔離望足全程，諗住協助我吸笑氣 但豬隊友黎，次次都對唔正，搞到我吸唔到，白白痛左幾次 頂左幾次已經要要求止痛針，真係搞唔掂，但叫左勁耐先幫我打 可惜，我打完淨係止左15分鐘就無效了 就算打左我都係一路吸笑氣 因為逢隔兩次小痛就一次大痛 之後開始慢慢變每次都大痛 其中既事係，我人手吉穿左兩次羊水 因為我羊水勁多，穿左2次羊水 第一次穿就即開到4-5度（21點左右） 第二次再穿即大到10指全開(22點半左右) 老公話返俾我知果下爆到個姑娘全身都係羊水（笑） 我已經痛到完全忍唔到，係甘由佢宮縮係甘推出黎，我痛到做哂拱橋甘 第二次穿之後，啲醫生姑娘就即跑入黎set up野準備生 我一開始因爲痛到腰彎到拱橋甘，狂比醫生鬧話生唔到 之後點痛打死都要平訓，就push左5-6次就生左 入產房3個鐘就出世，2.39kg（5.2磅） 我係無剪到會陰，係自然裂開 幸好我早產b頭仔細，所以裂得唔多，個醫生都話剪唔切 笑料： 係我push緊既時候，見到仔仔頭髮 個醫生係並問我老公睇唔睇，係甘叫佢睇 帶老公陪產真係好重要 一黎做人肉毛巾，狂擰狂鏈 二黎比佢知道生仔有幾辛苦 三黎媽媽自己唔會覺得孤單無助，過程都會順利D 好感謝老公近乎無訓過甘陪住我 暫時分享到尼到，因為已經太～長～了～ 之後會分享埋”嚴重失誤導致產後抑鬱”同”人奶之路” 有興趣可以關注我 ------------------------------------------------------------------------------------ ～～文一一的成長日記～～ Facebook Page： https://www.facebook.com/charlesmanmama/ Instagram： https://www.instagram.com/lai_hung_winnie/ 聯絡我們合作或試用產品: laihwong9@yahoo.com.hk
