上一篇講到妊娠毒血症而緊急開刀，緊急開刀後，媽媽係產房觀察了24小時。   生産後只係望咗寶寶一眼就被送到<新生嬰兒特别護理病房>，而我就送回產房作24小時觀察。期間先生可以隨時嚟探我，不過電話被收埋係啲行李裡面，要真正回病房先可以取回。呢24小時除咗休息就與世隔絕了。返回產房已經晚上10時多，先生陪伴我到11時多就到兒科睇寶寶了。   係產房渡過了人生最長的24小時，都忘記了幾小時後麻醉藥開始散，下半身開始有返感覺，開刀傷口亦開始慢慢痛起來，不過比我想像中無咁痛。每當大痛嘅時候都可以按一按制，止痛藥就會係豆位打入身體止痛。而另一隻手仍然有一個鹽水豆同一個防抽筋藥豆。   呢24小時姑娘會定時探熱，量血壓，俾止痛藥你食。因為生完開始嚟惡露，姑娘亦都會幫你清潔陰部同換衞生巾～由於醫院提倡餵母乳，姑娘都會教你點擠奶，希望可以俾最好嘅寶寶～bb唔係身邊只可以用手擠，姑娘都會落手幫你擠。最尷尬嘅事係呢度都變得正常。當擠到一滴嘅時候其實好興奮。不過太攰手又痛嘅關係，其實無咩心情繼續。   與世隔絕嘅時間過得特別漫長，訓係床上面訓下醒下，兩隻打咗三個豆嘅手，竟然痛過下腹嘅傷口。成日流流長只食咗兩次粥水，水都只係食藥嘅時候飲幾啖，全日口乾到不得了。   由於突然要生產，先生係屋企打點好先嚟醫院陪我同探寶寶。下午先生終於嚟陪下我喇。尋咗佢探咗寶寶，我終於可以睇下寶寶嘅相喇，好感動～寶寶因為早產同輕磅，要吊葡萄糖水同打抗生素。而我又未上奶，寶寶又唔係身邊，只可以飲水奶～    先生去探寶寶之後，我又自己一個喇～訓到晚上十一點幾，我終於可以返產後病房了～足足26小時去返個有人嘅地方了～安頓好後，姐姐幫我收好啲行李後拎返部電話俾我～終於可以向朋友同家人報平安了～亦可以訓返一覺。