聯合生產篇 12小時西瓜妹終於出世 下   繼上回12點檢查後 開左2度,因為我知第一胎度數會開好慢 所以我叫老公落去食飯先 因為無咁快同埋我地黎之前咩都無食,本身佢唔肯走 我都係鬧一鬧佢 佢先肯行 而我一個人係房到keep住咁痛 仲頂到,但12-1探訪時間 奶奶竟然黎左...我開始痛到搵野捉 佢又係咁拉住我隻手 我無理由鍊佢隻手架嘛 之後又不斷講野 係搞到我仲炆...同埋咁狼狽既樣 當刻係唔想有人係到。。(老公們好好勸家屬 生左先好黎。。) - 4:30pm 6度 眨下眼 到檢查時間 開始有d痛到癲左既感覺 之後姑娘宮探 我見到佢手上有血，佢話 媽媽好叻 開到6度啦 1個鐘開1度算快，下一次檢查8:30！ 之後d羊水都係一陣一陣咁流出黎 - 7:30pm 痛到以為生得 係呢段時間 我係有好幾次痾屎既感覺,痛到連呼吸亂唒 搞到bb心跳一齊亂 之後姑娘比氧氣我聞。因為不斷鼻吸口呼 我痛一次飲一啖水 係開頭都有放盤比我小便 但到後段真係痛到我以為痾尿會痾埋個b出黎 所以去到生完之前 姑娘幫我插喉放尿(生完痾尿會陰陰痛 )，我有幾下痛到叫左出黎 叫姑娘幫我睇 點知係咁叫我等8:30  - 8:20pm 開唒！生得 成班姑娘助產仕檢查 終於開唒 之後佢地極速準備 叫埋老公著衫，8:25正式開始 姑娘就話:痛就試下用力,忍住度氣 推第一次 第一次推見到少少 但我嗌左一下 搞到入番去，(呢個時候真係要跟住指示做 咁就會好順利)，第二次都係失敗左 之後姑娘本身話幫我唔知打咩針 咁岩第三次陣痛黎 試多一次 用力!之後出左少少 姑娘就立即話:bb出左少少 依家幫你剪少少。一剪 用多少少力就sir左出黎 最後係用15分鐘出左黎 一出黎bb身上好少血/唔係好濕 之後姑娘放左係我心口 軟綿綿細細粒既 因爲剪左下面要鏠針 所以就叫左我老公出去,姑娘就叫我聞笑氣 我就話唔要 因為想嘔 。之後佢就叫我攬住bb 就開始鏠 鏠之前就打左2枝針係下面 之後一直撩我下面 推d血出黎(過程仲痛過生)但姑娘話一定要推 忍一下 如果唔係鏠完會有瘀血積聚 容易發炎，我一直問鏠幾針 姑娘一直答 我地一針過 所以無分架 佢一邊仔細鏠一邊教隔離個個 然後隔離個個實習生不停安撫我 仲有1-2針咋 好快 最後半個鐘左右搞掂 之後姑娘推bb出去比老公影張相  - 10:00pm 生完要留係產房1個鐘觀察,無事就由姐姐推上房後房 要自己過床 好似條蟲咁慢慢躝過去..一開產房門 老公幫我打比媽咪，生完個刻都無喊 但個刻終於忍唔住喊出黎 ,上到房 好餓 叫老公買飯比我食，(雖然過左探訪時間 但係可以叫屋企人買上黎放底比姑娘拎入房,所以生完餓 即管放心叫人買飯 幾點都食得)。 - 11:00 bb番黎第一次獨處 產後8小時唔可以落床 所以bb駁完機就推過黎床邊，終於可以仔細望到呢個小朋友 之後要親餵 姑娘就教打側身訓比佢吸啜，唔啜都比佢訓係你身邊貼住你❤️餵完就會推走 2個鐘後番黎再餵，我就把握時間食飯 因為我知道要食飽飲夠先有奶！ - 好啦 希望黎緊準備生既媽咪都一樣順利 記得乖乖跟指示同練習下呼吸