[消暑湯水] - 老黃瓜粟米鬚湯 逢星期日, 我負責煮飯俾全家食, 但天氣熱, 無咩胃口, 都唔知煮咩好. 見到街市有好多夏天蔬果, 索性煮個老黃瓜粟米鬚湯消暑. 今次只有四樣食材: 老黃瓜, 粟米仔連鬚, 豆腐, 蜆肉 (因為工人姐姐唔食豬肉, 所以用豆腐同蜆肉代肉, 一樣清甜鮮味). 工人姐姐未煲過呢個湯, 見到啲食材, 好多疑問: 老黃瓜駛唔駛去皮? (唔駛). 粟米頭髮係咪唔要? (唔係, 要一齊落) 吓? 呢啲係粟米頭髮, 點可以用嚟煲湯咖? 呢啲粟米頭髮, 其實不知幾有益! 粟米鬚可以加肉煲湯, 或煲水當粟米鬚茶, 都有助消暑, 有利尿, 去濕的作用. 煲湯可以加冬瓜, 薏米, 赤小豆, 或好似我今次加老黃瓜, 連豆腐, 蜆肉, 幾乎一滴油都無. 清清甜, 我自己一個人都飲咗兩大湯碗連湯渣, 當晚餐, 飽肚又健康.