出街玩咗成日, 冇電煮3餸一湯, 返屋企時叫老公湊米豬返去沖涼先, 我快掃一轉街市~~ 休漁期似乎完咗, 檔檔d海鮮都好靚~ <3 就整個鮮茄海鮮意粉全家一齊食啦~   趕住開飯, 冇咩影到相, 今集大家將就一下~ 運用想像力~ 乖~~   材料: (2大1小份量) 鮮蝦 1份(約十隻) 鮮魷 3隻(唔計鬚有手板咁長) 花甲 半斤 三文魚扒 1件 大蕃茄 2個 洋蔥 1個 長通粉 1/3包 (suggest al dente時間係9 3/4分鐘)   調味: lemon pepper 1.5湯匙 糖 2茶匙 蒜鹽 1茶匙(大人0個份先落)   做法: 先煮湯底: 1. 洋蔥切碎, 蕃茄底界十字, 放滾水淥3分鐘後取出沖凍水, 去皮後去蒂切粒 2. 响煲落1湯匙油, 爆香洋蔥, 洋蔥開始透就落埋蕃茄, 狂兜, 兜勻晒就落糖, 加水蓋過蕃茄面, 煲滾後加蓋轉細火煲多10分鐘 煲湯其間準備食材: 3. 花甲買返嚟之後浸鹽水吐沙, 魷魚去衣起骨切圈 (拉d腳出嚟後, 個魷筒中間有條透明骨ga~) <--想哭......... 平時買魷魚都係自己劏, 今日個叔叔幫我劏開咗.... 我冇得整魷魚圈, 唯有界花... 一樣咁好味但我覺得冇咁靚囉~ 4. 三文魚扒去皮切大粒, 略煎 5. 三文魚變晒色後, 落埋魷魚炒炒佢 6. 同時間隔離0個煲蕃茄湯滾夠十分鐘, 落長尖通, 加水到尖通面, 冚蓋煮3分鐘 7. 開始變淋就落lemon pepper, 撈勻 8. 所有海鮮倒晒落煲, 冚蓋煮8分鐘 9. 海鮮熟晒, 尖通淋到啱食就可以不起小朋友0個碗先, 然後大人0個煲落蒜鹽兜勻, 食之前再灑小小香草响面頭~ prefecto~   煮食小貼士: 1. 記得唔好比海鮮叔叔劏隻魷魚呀~~ 留返嚟切圈呀~~ (嗚~ 冇咗魷魚圈覺得成個粉美味指數低咗十分....) 2. 煮粉ge時間比包裝多1-2分鐘會入味d, 但想al dente d就照返包裝指示時間啦~ 3. 如果你買到甜d(熟d) ge蕃茄, 可以唔落糖 4. 花甲吐沙可以落鹽水, 或落隻辣椒落水都可以   米豬豬的page~ 每日都update~  歡迎各位like&follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/