從前一直話喜歡動物比小朋友多的我，從來無諗過自己會做媽媽，即使到左依家都覺得好不可思議，唔能夠相信自己已成為人地娘親！ 經歷左19個鐘既陣痛，終於生左我寶貝少爺仔！係2018年6月18見紅，就慢慢去沖涼洗頭，食埋野先起行入院，點知等左成日都未生得⋯⋯由於我個人無乜耐性，加上少爺佢已經過期居留左幾日，我大膽問醫生，可唔可以幫我催生，點知個醫生甘鬼好人，真係幫我催生，朝早8點幾塞左藥，過左幾個鐘乜野動靜都無，終於到黃昏6點左右我覺得好似有d 冤冤痛，係醫院真係無覺好訓，抖到探病時間過左我就即刻去坐波波。到12點時候變成M痛個種痛，素來我都好怕痛，呢種痛對其他人泥講係雞毛蒜皮既事，但對我每痛一下我就需要停哂所有既野，等痛過左先郁得返！ 正當我諗住訓下覺，襯仲未係好痛就要把握時間休息，我都未訓著突然“pop”一聲，好多水流出泥，無錯，係穿羊水，d水仲係不停甘流，不知所措既我當然叫姑娘啦，姑娘協助我同時檢查胎水顏色 姑娘：咦～顏色唔太靚仔喎！ 我當然追問啦：姐係點啊？ 姑娘：胎水既顏色係綠綠地色，bb係入面屙左便便～ 我：點解既？會點嫁？ 姑娘：Bb係入面唔舒服，受壓就屙左便便囉～ 係怕bb會吸左有自己d便便既胎水。比醫生檢查左先。 如果係跟住既12個鐘宮頸開唔到，係需要開刀既，所以我都需要禁水禁食，醫生係我手背種完豆就馬上過產房，一開產房道門，無數個姑娘係到迎接我，一邊set野一邊同我解釋，同時都教我點索“笑氣”，一開始都仲work既，隨著時間一分一秒甘過陣痛亦都越來越勁，“笑氣”基本上已經無用，勁怕痛既我緊係叫姑娘啦，「我要打止痛針啊，我要打止痛啊姑娘！」個時好似只開左1度，姑娘緊係唔比啦，叫我試埋其他非藥性止痛方法先，然後比左架小型電極神經刺激系統我，哈哈 全名係經皮神經刺電刺激法，其實姐係用低頻率脈衝電流按摩分散下注意力，對我泥講完全無用但都只能死撐。 頂下頂下又過多幾個鐘，姑娘終於屈服幫我打止痛。仲陀緊少爺個陣，d friend曾經叮囑過我話：「頭1-3度既痛都好輕微，如果要打止痛就3度之後先打，因為3度之後既痛係忍唔到，而且宮頸會開得好快，支針足夠你捱到生嫁喇。」 打完姑娘隨即check下：2度。 我心諗：what!!!!!? 甘痛先得2度唔係呀話~ 都算喇～唔好理甘多，訓下先，應該可以訓返2-3個鐘，訓醒應該差唔多喇掛～ 但世事又豈如我所料啊，一個鐘就已經——痛醒，唔係掛，點解會甘快嫁！ 藥力失效既我又開始叫，痛到我典床典蓆，拗哂腰，相信大家都有睇過屍殺列車，我老公話當時係典到就似由人轉變做喪屍個個過程甘，哈哈～ 除左痛仲伴隨有種想屙既感覺，好似千年便秘甘，好想屙出泥屙出泥！ 「你放鬆你放鬆，繼續聞氣，唔好甘用力，留返d力一陣生啦！」N甘多個唔同既姑娘入到泥都係講同一句野。講就易，可以放鬆到既話你估我唔做咩～ 你估我拗哂腰，硬哂呔甘好舒服嫁！ 好唔容易捱到話醫生泥，但未等到醫生泥我已經要生，助產士姑娘：吸氣，下巴貼住心口，用力屙10秒，唔好漏氣。睇得電視多，我以為屙仔呢下係要嗌，點知原來唔係甘。用左20分鐘，少爺仔終於比我用力推左出泥！豬爸爸感動到喊左出泥????佢話：我等左少爺仔好耐喇！呢d moment我相信個個陪產既丈夫都有好深既體會。 由於少爺佢係我肚入面屙左便便既關係，怕佢會吸左d便便入肺，所以生既全程都有兒科醫生standby，少爺一出閘兒科醫生即時幫少爺吸返d胎水然後即時上左兒科病房，媽媽我同豬爸爸都只係望左少爺一眼咋～ 連個黃金一小時都無。 愛子心切既我一落得床就梗係飛去睇仔啦～ 細細粒好得意啊～ 係我個仔 我個仔，我痛左十幾粒鐘生既少爺仔～ 上得去當然唔係淨係望啊仔啦，都要試下埋身既，理論易懂，實戰難做，雖然我都好勤力上去比少爺埋身，P牌始終係P牌，雞手鴨腳就難免嫁喇，又怕自己粗手粗腳會整親佢。所以我都唔勉強，補粉算啦～ 第二日一早就上去睇少爺，順便睇下撞唔撞到醫生，好好彩比我見到醫生，醫生話觀察左少爺一晚，無發燒無氣喘肺都清，應該知吸到便便既。好感恩，少爺仔健健康康甘出院！ 頭一個月，真係人都癲，未上到奶我，好怕餓親我既寶貝少爺，所以我同豬爸決定補粉，呢頭餵完奶掃完風換完片，個頭就要泵奶，之後又要洗奶樽，我同豬爸爸根本無時間休息。由於荷爾蒙關係，心情成日都係處於一個極之低落，又緊張既狀態，即使老公同我輪班都好，係老公當更既時間我都係非常唔放心。 係岩岩生完呢段時期，係極需求休息，係呢個時候會有好多前輩長輩咩輩都好，好唔識翠甘硬係要呢d時候泥睇bb，要先睹為快，係呢堆人入面有d名義上會話泥幫你，等你可以休息，但實情又係唔係甘呢！？ 我呢個case就唔係，泥到係旁邊指指點點，爭住同少爺整呢樣整個樣，又亂執我屋企既野，而且一泥就由朝留到晚，真係極之煩人。奉勸各位新進媽媽們，如果真係唔想，要大聲說不，唔好啞忍！亦奉獻各位爸爸們識做d，要企係太太角度出發！ 坐月日子裏老公充當住半個陪月，負責我既飲食，幫下手洗下奶樽，湊下少爺甘，我係一個非常揀飲擇食既人，對我而言請陪月都係無意思。 為左要上奶，不停試試試，坊間好多野都比我試暈哂，不能一一盡錄(因為生完仔無乜記性，有d都) 老公牌魚湯 pukka上奶茶 通草 and 王不留行 - 藥材鋪買，都係加埋落炒米菜飲 黑豆茶 - 黑豆茶我買現成既，對於自己坐月自己湊仔既我泥講方便d，如果有人幫手既話可以試買黑豆，炒到微微爆開，加埋落炒米茶一齊飲 榴連- 我可以自己食哂成個 葫蘆巴子 - 焗水飲，煲水飲都得。如果焗水用一茶匙既葫蘆巴子加100度既水保溫杯到焗一陣。煲水既份量就多d，我1.7L就落2茶匙既葫蘆巴子 珍珠奶茶 其實上奶物真係因人而異。 一個月都未夠我就乳腺炎，發冷左幾日，連自己有發燒我都懵然不知，當時應該係要去健康院搵母乳姑娘就更加唔知啦~ 係老公提醒下落左樓下睇醫生，食完一個療程既藥，令本來已經未上到奶既窮媽我變得更加窮，3個鐘2邊加埋得1-2安，少得令人慘不忍睹，所以我每2個鐘泵一次奶，首先用按摩模式2分鐘，泵5分鐘，再轉返按摩模式2分鐘，再泵5分鐘，如此類推甘一路泵到停機，甘樣係為左引多d奶陣，係窮媽我努力底下，幾經辛苦從2安變3安半，再變4安。雖然我稱唔上係富媽，但想做富媽媽唔難，只要努力，休息多飲多d水，放鬆心情，就一定上到奶！仲要催眠自己，同自己講我一定有奶，泵唔出都一定係因為個泵衰???? 直到依家少爺仔就泥3個月，嘴仔大d啜得叻d，已經停左泵轉左全埋身喇～甘就過左10個月，回想起上年10月真係覺得好似係琴日既事。 以前唔太鍾意小朋友既我，依家唔捨得放手！ 準媽媽們加油！ <br />
