今年3月第一次同沙律B出走，地點是台北。 半年後，沙律爸媽又同沙律B出走，今次地點是布吉！ 上一次出走台北 [4D3N]，沙律媽媽記低曬個bring list [link]，日後作reference用！ 今次出走布吉 [4D3N]，沙律媽媽同樣都記低曬，原來真係好好用！ 兩次出走帶嘅野都有相同，但隨著沙律B愈來愈大個，帶嘅野又有好多唔同！ 舊文: 沙律媽媽的忙碌日常︰「媽媽日誌」小腳板走天涯の旅行應該帶啲咩？！ 舊文: 沙律媽媽的忙碌日常︰小腳板走天涯預備篇の如何選擇旅行地點，機票，酒店同其他事宜？！ 今次出走，沙律B已經歲半，可以食好多唔同種類嘅食物。 1日都係5餐。3奶 [07:30/15:00/23:30] 2固 [11:00/19:00]！ 但餐同餐之間，都會再食野，例如生果，麥皮，麵包，零食等等！ 以下就係沙律B個bring list！非常詳細！！俾日後嘅自己作一個reference。   1: 旅行奶樽 + 旅行即棄奶袋[Link] + Spare 奶樽 沙律B用美國 Playtex，旅行樽始祖。 上一次台北之旅都有用，真心方便，又好用！ 沙律媽媽只拎左一個旅行樽，連一個奶咀同樽蓋，再拎幾個奶袋就搞掂。 奶袋數量視乎BB飲奶次數，通常沙律媽媽會拎多幾個當 spare！ 加上沙律B已開始飲果汁，沙律媽媽通常都會加水開稀，但都係用呢個奶樽，勁方便！ 每次只飲完直接 dump 左個奶袋，沖洗整個樽。 奶咀再用滾水浸，又可以用番。  次次清潔完，我都會放一個奶袋入去，因為個樽穿底，驚有塵飄入個奶咀。  用完即棄，係唔環保，但勝在方人便，回程行李又會愈來愈少。 除此之外，沙律媽媽都拎多一個平時用開嘅奶樽當spare！ 今次spare奶樽都用埋，因為沙律B大個女左，旅行樽個奶咀孔太細，啜得慢。 但又未搵到牙籤開多個孔，spare奶樽就可以發揮作用啦。   2: 開奶茶數包 + 益生菌 沙律B係奶粉B，加固無耐就面臨便秘問題，10個月左右已開始飲余仁生開奶茶。 去旅行少不免會食少左菜類，為左令到便便暢順，沙律媽媽都係拎開奶茶旁身！ 開奶茶係茶包，用法簡單，用 4oz滾水浸幾分鐘，再灘至60度左右，就可以開奶。 其實或者直接飲都可以，當有味水，唔會咁寡。好彩， 沙律B一直都唔抗拒茶嘅味道！ 而益生菌，都係用來開奶用，增加腸道益菌，對爛便便好有幫助。 旅行期間咁啱遇正沙律B吽緊牙仔，痾緊牙仔屎 [爛便便] 仲要1日痾4-5次，所以益生菌都拎埋過去，以防萬一！ 3: 奶粉 [即棄奶粉袋]  沙律選用韓國牌子Mother-K即棄奶袋，千色有售，HK$49/30個！ 上一次台北之旅都有用，除左唔環保，無咩理由拒絕使用！ 用一包就dump一包，真係減輕回程行李唔少位置！ 除此之外，拎出街用都好方便，又慳位。 用法又係超簡單，奶袋2邊都有開口，一邊入奶粉，一邊出奶粉。 出發前入定平時飲開嘅份量，計好飲幾多餐奶，開奶時，摵開袋口，奶粉直接倒入樽，搞掂！    4: 零食 + 果汁 沙律媽媽拎左好多沙律B鐘意食嘅零食過去，次次大人開餐，佢都有份開餐！ 百味寶寶BB紫菜，講明低鹽，但呢個牌子啲野都有點兒小貴，一田/千色/AEON 有售！ HIPP，Pigeon 果汁，沙律媽媽習慣溝水開稀俾沙律B飲，一日飲一款！ 森永BB威化餅，沙律B最近超鐘意，但一日只可以食一包。 卡洛塔妮天然羊奶片，一日3粒左右，用左即棄奶袋袋住，勁方便！ 果蓉3包，當中有一款Prune，通便便用，最終都用唔著。 仲有Goodies 提子乾一小盒，巧虎饅頭仔一小包，餅乾一小盒包！ **Pack 行李時，要預留少少 hand carry，因為機上扭計時可以食！   5: 糧食[6餐份量] 沙律媽媽拎左3款唔同嘅粉麵，全部都係快熟類，打算旅行都自己煮！ 有和光堂烏冬，和光堂螺絲粉，Kraft Macaroni [連芝士粉]，快熟，又方便！ 去到當地，再買啲簡單食材，就可以解決一餐嘅問題。 沙律B有時都唔食我地煮嘅粉麵，有時沙律爸媽會整個簡單湯 [蕃茄蛋花] 去到餐廳再叫白飯，再撈自家湯，又一餐！ 如果超市有蕃薯，可以整蕃薯食，又健康，又飽肚，沙律B都食左2餐！     6: 雙電壓旅行煮食煲[Link] + 雙電壓旅行水煲 今次布吉之旅，沙律爸媽依然堅持煮，加上泰國都無野可以俾沙律B食！ 如果有睇下沙律媽媽blog，都知沙律媽媽有玩開代購，呢款旅行煮食煲就係我代購的。 因為煮食煲係雙電壓的，全球電壓都通用，110-240V，去到邊都可以用，真心推介！ 日本牌子，中國製，勝在夠mini，又唔重，仲要全球通，真心無得輸！ 因為沙律B仲未食街外食物，我地會煮俾佢食，所以呢個煲係must-have-item！ 除左可以煮粉麵，煮飯都無問題，但記住要拎埋1-2樣煮食用具！   除左煮食煲，沙律媽媽都係千色買左個Diamond水煲，又係雙電壓，全球電壓都通用！ 係人都知酒店嘅水煲勁污糟，所以都係用私火野安全啲！ Diamond水煲勝在夠輕，只有0.7kg，同埋可以摺埋，去旅行真係一流！     7: HIPP BB Spring Water + 香港水喉水 上一轉台北，我地無準備水，但泰國，驚沙律B會水土不服，所以生熟水都拎埋。 生水，即水喉水，拎左2大枝，主要煮野食用！ 而HIPP果2板 BB Spring Water 就可以即時飲用。 4枝水，大大話話都6L，拎到我死下死下，因為重到 high high！ 問頭以為好多，點知生水第二晚用完，HIPP第4日早上都用完。     8: Neat Solutions 矽膠餐墊[Link] + TT 矽膠口水肩[Link] 之前沙律B用 Summer Infant Tiny Dinner，因為太重，又成日啜唔實！ 所以沙律媽媽已轉用Neat Solutions，又輕又慳位，減輕手袋唔少重量！ 餐墊仲可以抵禦溫度-40度至230度！勁！ 其實餐墊好好用，每次當沙律B食野時，可以鋪上桌面，再放零食上去，超乾淨！ 除左當餐墊用，仲可以當砧板用。 因為沙律媽媽日日都會煮野食俾沙律B，酒店又無廚房，唯有用餐墊當砧板用！ 用完，搵洗潔精清洗就搞掂，方便得很！ 我之前都介紹過Tommie Tippie 矽膠口水肩，超慳位，超好用！ 捲埋就走得，個兜仔仲可以放匙羹，超正！  沙律B有兩條，由6個月開始用到宜家，用足一年，仲非常新淨。真心推介！！ 9: 萬用刀 + 食物剪 因為要煮野食，又要買生果俾沙律B，所以決定用私火工具！ 超方便，又衛生！  沙律媽媽用開Victorinox瑞士軍刀！呢個牌子啲野咁好用！   但一定要寄倉，唔可以hand carry！ 當BB大到咁上下，一定會有一把食物剪旁身，唔需要問，只要帶就得啦！ 10: 匙羹 + 有蓋碗仔 + 餐具袋 今次拎左幾款匙羹過去，當中包括學習匙叉，到時可以叫沙律B自己學習食飯！ 而碗仔，我拎左Munchkin，因為可以疊起，慳位，再上有蓋，比較乾淨！ 沙律媽媽好鐘意用IKEA zip 袋，但發覺都幾唔環保，重用幾次就dump。 於是，淘左幾款防水布番嚟，自己整左個簡單嘅防水餐具袋，好好用！ 11: 牙刷 + 水杯 + 炸橙汁器 沙律B由10個月左右，就轉左用360度嘅牙刷嚟刷牙，所以凡旅行都唔可以偷懶！ 而水杯，沙律媽媽都拎左一個，刷牙可以用，飲水又用得，裝食物又得，百搭！ 炸橙汁器都出埋，真心覺得自己好勁！哈哈！ 其實沙律媽媽喺屋企都有用開，經常都會整橙汁俾沙律B，又快又方便！ 沙律B次次都會食到3/4個，好過飲現包裝果汁！ 而事實上，沙律媽媽真係喺布吉買左橙，一個超甜嘅橙，沙律B獨吞！   12: 水樽 飲水樽非常重要， 而且仲要出門前裝滿水，隨身攜帶！ 首先，機倉會令人dehydrate，一定要俾BB飲多啲水！ 第二，如果BB開始加固，更加要多飲水，可以減低便秘機會！ 第三，如果去熱帶地區，一定要勤餵水，避免dehydrate！ 13: 奶咀[Link] + 奶咀盒[Link] +  奶咀繩[Link] 呢組items好緊要，沙律B唔可以無左佢地，因為無左佢地瞓唔到覺！ 奶咀除左安撫沙律B瞓覺次外，上到飛機，仲可以減低不適。 一起飛，就俾沙律B啜，完全無氣壓問題。 有留意沙律媽媽嘅blog都知沙律媽媽鍾情於NUBY奶咀盒，因為真係好好用！ 可以左鉤右鉤之餘唔老土！ 另外，建議用埋奶咀繩，預防啜啜下跌左落地！ 14: 暖水壺 + 暖壺 暖水壺真心重要，因為長期都要準備熱水開奶。 暖壺，沙律爸媽都拎左2個，因為第一日早機，沙律B會喺飛機上食lunch！ 而晚餐，姐姐都幫我地準備埋，第一日都係輕鬆啲好。 但呢2個暖壺好有用，因為回程當晚，沙律爸媽都準備左晚餐俾沙律B。 多得呢啲保暖用品，沙律B先可以隨時食到自家製食品！     15: 蚊帶[Link] + 蚊水[Link] + 蚊貼 沙律媽媽由5月開始，已經俾沙律B用蚊帶，沙律媽媽用美國Superband蚊帶！ 圈喺腳仔就搞掂，又方便又好用！最緊要係DEET FREE，可以放心使用。 蚊帶可以 last for 250個鐘，基本上2條就可以玩曬成個 trip！ 但沙律媽媽2日就幫沙律B換新蚊帶，因為泰國真係太多蚊，都係小心啲！ 脚仔用蚊帶，膊頭就貼左麵包超人蚊貼，左右膊頭各一，有時身上都有貼，每日換。 至於蚊水，仲未用過，而沙律B呢幾日都無被蚊針過，所以蚊帶+蚊貼已足夠防蚊！ BTW，蚊帶可以濕水，沙律B游水時都有戴住游！ 至於用完嘅蚊貼，沙律B當貼紙咁玩，貼曬喺床頭！ 16: AQ噴霧 + Econ Spray + 抗菌掛包 沙律媽媽拎左幾枝AQ噴霧試用裝，又可以噴手仔，又可以抹野，當消毒殺菌用！ 細細枝，又輕身，唔錯！拎4枝過去，4枝都用曬！ Econ Spray 離子水噴霧，沙律媽媽都唔知幾時買嘅，拎左去，就噴下間房，消毒下！ 至於抗菌掛包，又係唔知點得來的，所以我地放左喺床頭，殺菌。 17: Babyganics 搓手液[Link] + Babyganics 防曬[Link] + Pat Pat 膏 沙律媽媽一直都用開 Babyganics 泡泡搓手液，真心好用！ 次次拎出嚟，沙律B都會自動泳拎對手仔出嚟，仲學識左搓手！ 最主要原因係方便，噴一噴，搓一搓，乾淨曬，沙律媽媽習慣再用濕巾過一次，就可以拎野食！ Babyganics 泡泡搓手液有兩款味，無味，同香橙味，其實香橙味都聞唔到有味！ 而防曬沙律媽媽都係用 Babygaincs，so far 用完都覺得唔錯！ 至於pat pat 膏，已經係must have item，加上呢排痾牙仔屎 一日痾幾轉，沙律媽媽俾沙律B玩死！   18: 沖涼充氣雞仔[Link] 上一轉台北之旅都有帶，勁好用。當時沙律B 10-11個月，未企得穩！ 今次都有拎過去，但沙律B唔肯用。 因為佢已企得好穩，識行識走，下次已經唔使帶！ 但沙律媽媽依然吹漲俾佢玩，唔好浪費我山又長水又遠拎過去！ 19: Richell 兩用帶[Link] 出發前都驚布吉嘅餐廳無baby chair，點知完全出乎我意料！ 因為布吉間間餐廳都有baby chair，而唔係booster！ 仲要張張都大大張，勁安全！ 因為張張baby Chair，腿同腿之間都有條belt， 所以沙律媽媽都好放心俾沙律B自己坐而唔用Richell！ 但Richell都要長期跟身，以防萬一！  20: Pororo 音樂機 + Finger Puppets [Link] + 顏色筆 [Link] 同小B出遠門，一定要拎玩具！ 沙律媽媽一早已準備左非常handy嘅玩具，搭飛機都跟身！ Pororo 音樂機，攝張卡入部機就會唱歌，so far都可以distract 沙律B！ 顏色筆，沙律媽媽一直用開Crayola 無毒蠟筆，一盒24枝，細細盒，出門一流！ 加上沙律B上Playgroup都成日接觸，佢都好鐘意coloring！ 最新同沙律B interview PN，有啲 Nursery 都有 coloring section！ 至於Finger puppets，沙律B超鐘意，沙律媽媽自己代購的！ 次次套入手指就會配合埋唱歌，增強認知！ 21: iPad  同BB出遠門，電子奶咀真係唔少得，搭飛機好彩有佢！ 預先上YouTube download 定啲片，放入iPad，就幾時都可以睇到！ 真心方便好多架！ Download YouTube 片好易，喺hyperlink youtube 之前加 "ss" 就知點做。   22: 尿片/褲仔 + 游水片片 帶片片或者褲仔之前，一定要計下數，唔需要拎太多！ 沙律B呢排狂痾牙仔屎，完全捉唔到路， 又飲好多水，所以拎左成30片過去！ 同埋建議去街時用褲仔，因為唔使下下都瞓低換，企係度都換到！ 結果用唔曬啲褲仔，多左5條左右，預計都算準！ 如果去熱帶地區，可以游水，就要拎定游水片片，因為游池規定！ 沙律媽媽拎左3片過去，只剩1片拎回港！ 23: 洗衣盤[Link] 呢個洗衣盤已用左年半，都係時要dump，所以拎過去。 本身都打算幫沙律B洗下衫 [如果整污糟左]，結果用來裝碗碟。 因為沙律媽媽會煮野食，洗完啲野又全地方浪，所以放左入呢個盤，非常有用！ 離開前，己經遺留布吉！死得非常有價值！   24: 乾紙巾 + 濕紙巾 沙律爸媽拎左幾包tempo過去，都所剩無幾，而濕巾就拎左2包759 60片裝！ end up 係唔夠用的，因為沙律B一日痾足3-4次poo poo！ 除此之外，次次去餐廳坐低前，沙律媽媽都會用濕巾左抹右抹。 所以，喺當地買左2包GOON，寫明 Japan Quality，但簿到一個點，一啲都唔好用！ 無下次！其實沙律媽媽對GOON產品一直都好一般。 但去到異地，都係會選擇自己認識嘅牌子。     25: 草帽 因為驚曬親，去熱帶地方必定要做好防曬！ 26: 洗頭帽 出世無幾耐已買左，AEON $12店有售 但喺香港都無機會用，所以拎過去用 不過沙律B唔鐘意人地整佢個頭，所以試戴左一次就dump左！ 各位爸媽，呢款產品都幾癈，可以慳番$12蚊！ 但如果BB願意戴，你都可以買！ 27: 水泡 沙律媽媽用swim trainer，呢款適合1-3歲。 好用，好安全，又啜得好實，沙律B玩得好開心！ 28: 乾棉+棉花球 其實當沙律B大到咁上下，已好少用乾棉。 因為已用潔巾取代左，但都會拎幾片過去。 至於棉花球，主要用來搽pat pat 膏。 29: Mustela 沖涼 + Arau 洗衫[Link] + 洗潔精[Link] Mustela 當然用來沖涼啦，而Arau 就係當初打算幫沙律B洗衫而帶嘅！ 最終都有用到，但次數唔多。 呢個 container 喺淘寶買的，講明 silicone，可重覆使用，所以沙律媽媽買左！ 結果癈到一個點，因為漏到九彩，好彩我預左會漏，所以裝滿啲！ 最後，完左旅程，我留番佢地喺布吉！ 而洗潔精，都係因為煮野食，要洗碗而帶嘅！ 個 container 同樣淘寶，幾好用，因為唔漏！ 但容量唔大，只可以 for 5日4夜左右嘅旅程！     30: 舊口水肩+舊紗巾+沖涼巾 口水肩基本上沙律B都唔用，拎過去做spare！ 舊紗巾就多數用來抹野，洗碗等等！ 沖涼巾唔需要解釋啦，當然沖洗抹面用！ 以上全部用完即dump，拎舊野去，回程可以減輕行李重量！ 31: 牛牛被 + Aden Anais 紗巾包被[Link] + 沖涼浴巾 美素牛牛被，我相信好多媽媽都唔會感到陌生！ 呢款被實在太好用，又暖，又輕身，沙律B好鐘意！ 由於沙律B會瞓大床，但唔會用酒店被，因為太危險 所以要準備一張私家被！ Aden Anais 一直都係沙律媽媽鐘愛嘅牌子，佢啲muslin swaddle 無得輸！ 沙律B一直由出世用到宜家，真心覺得好用！ 因為沙律B有時要孭住瞓，瞓左都驚佢會凍 所以就會用到呢款swaddle，因為夠簿，可以左攝右攝！ 個個都個酒店嘅浴巾污糟，所以都唔敢俾沙律B用。 次次沙律媽媽都會預備私家浴巾，確保乾淨！ 32: 汗巾+襪仔 去熱帶地區，必定要帶汗巾，因為真係好有需要。 今次沙律媽媽拎左3條過去，一日換一條。 而襪仔都係一日換一對，其實沙律媽媽無俾沙律B著涼鞋仔 因為覺得得著涼鞋仔，對腳會好污糟。 33: 泳衣+游水袍 因為玩水，所以拎左一套泳衣過去。 上水時，沙律媽媽都預備左私家袍仔，非常好用！ 34: 睡衣+去街衫+睡袋 沙律爸媽有一個癖好，就係去街衫唔可以著上床瞓覺。 所以去街衫還去街衫，睡衣還睡衣，分得好開！ 衫仔，建議帶多2套，因為出汗多，又會換！ 有時食野食污糟左，又要換，漏尿，又要換！ 而睡袋，沙律媽媽都拎埋，因為沙律B夜晚鐘意踢被，拎埋安全啲！ 宜家夏天，沙律B主力用六重紗睡袋。     35: 耳溫槍 ＋小林退熱貼 ＋退燒水 + 針筒 次次出門，沙律媽媽都會預備定一堆安全藥物！ 小朋友唔舒服，多數都係發燒先，所以check溫度工具同退燒用品都要準備定！ 36: 保嬰丹+珍珠末 今次去布吉會玩水，都驚沙律B會攝親，所以拎定保嬰丹打底。 因為保嬰丹對沙律B都好work！ 其次就係珍珠末，有定驚作用，沙律B 9個月開始接觸，食完真係瞓得好啲！ 至少解決左夜喊哭問題，但大到一歲，己無食過，今次都係純粹帶！ 37: 藥水膏布 沙律B宜家識行識走，都驚佢行行下會PK，會擦損手腳！ 所以都要拎埋膏布旁身，以防萬一！   嬰兒用品系列︰ 如何選購嬰兒用品の消耗品篇！ 如何選購嬰兒用品の奶樽奶咀與配件篇！ 好物&癈物分享︰ 精明買物媽媽系列の嬰兒好物大分享 II 精明買物媽媽系列の嬰兒癈物大分享 I 精明買物媽媽系列の平靚正收納妙法！ 精明買物媽媽系列の嬰兒好物大分享 I 旅行系列︰ 小腳板走天涯の如何選擇旅行地點，機票，酒店同其他事宜？ 小腳板走天涯の10m台灣旅行應該帶啲咩！ 自家製系列︰ 自家製系列の給寶寶最好的護理—自製天然健康湯水！ 自家製系列の小兒天然止咳殺菌良方—燉紫洋蔥！ 自家製系列の打一歲針前應該煲咩儲涼湯水？！ 自家製系列の嬰兒都可以食嘅生日蛋糕—沙律B生日快樂！ 其他忙碌日常︰ 加固系列の嬰兒可以食咩零食？！ 健康系列の如何應付寶寶の便秘問題？！ 暗藏細菌系列の選用沖涼玩具時要當心！ 沙律媽媽的忙碌日常の湊B去街應該拎啲咩？！ 純粹分享の在職媽媽補身恩物—老協珍熬雞精！！