成日都歌頌媽媽偉大  媽媽係superwomen 但其實媽媽都是凡人，都會有陰暗面 我自己有時都會覺得湊B生活會忙會攰會苦悶 但經過今次囡囡大獲地病左一場之後 真心明白到只要佢健健康康 可以依依吖吖有笑容肯周身郁 已經係好大o既祝福！   事緣係….. 一早已計畫女兒在準備踏入一歲時帶佢接觸playgroup 等佢可以活動下唱下歌，同其他小朋友相處下 11月頭o既一個星期六 上完playgroup第二朝我就發現自己有點喉嚨唔舒服 我知自己病一定會同個囡隔離，但潛伏期已同個囡有接觸 已心知不妙 而囡囡果然都開始咳咳同埋面仔有點紅 加上有少少低燒於是即刻帶佢睇普通家庭醫生 當時醫生比左藥佢，食左3日開始好轉 點知到第4日情況突然轉差，無厘精神加開始失聲氣喘，訓教時訓10分鐘就宅醒根本訓不到 老公果斷地決定帶個女去法國醫院睇夜診 去到一探熱38.5度 我即刻喊左出黎, 又擔心又自責, 所有負面情緒都出晒黎 好不容易等左個幾鐘終於見到醫生 而我女係極度怕醫生, 醫生埋去掂佢或準備聽診佢都已經係咁喊同避開, 表現很不合作 於是醫生只係草草地聽診不夠半分鐘, 就斷定我女係一般感冒, 氣不算太喘 建議聞氣加塞肛退燒藥加食藥 我囡極度恐慌，全晚都喊傻左 唔夠一歲人仔突然潛能大爆發，第一次聽到佢識不停講"唔好"同埋不斷搖頭   好不容易捱過呢晚亦退左燒 接住落黎三日每次餵藥都係折磨 我地行去拎藥個囡已好懂性咁喊定先 幾日都無見佢笑過加上仍然失聲 我情緒完全陷入黑洞   接落黎果三日 聲仍然未開，夜晚又間中低燒，食量又少左一半 總覺得有唔妥 雖然藥未食晒但都決定再次帶佢睇多次醫生 果刻真係好擔心，撇除食藥辛苦 最大問題係都咁多日啦，情況都係咁反覆冇好轉 雖然我唔係醫生，但直覺話我知一定有唔妥   今次好好彩，終於在仁安診所巧遇好醫生 雖然我囡都係唔合作，但佢好細心用好多方法去聽診問診 蔡醫生好果斷地話我女要留院 係急性支氣管炎，情況係中度，再差就到嚴重就大件事 問我入邊間醫院，如仁安可即時幫我keep床位 一聽到個女咁樣已好亂，一時間決定唔到，佢就幫我寫晒公家同私家o既reference letter 同埋清晰地講入院後要做三樣野 聞氣+照肺+抽鼻涕去驗 (最終醫院真係自動做齊呢幾樣) 所以我覺得蔡醫生判斷得好正確   由於打去法國同浸會醫院床位都full晒, 唯有去最近o既將軍澳醫院 即時聞氣令佢氣管放鬆 (果刻諗番起法國醫院時個女聞氣果個掙扎樣+擔心, 我又再一次崩潰喊左出黎) 照肺片, 第一個醫生話好似有少少花, 之後兒科醫生解釋話其實有機會係血管, 唔係明顯花痕其實唔洗擔心 (真係比第一個醫生嚇死)   問診完一大輪醫生就得出結論 話囡囡有三個可能性: 急性支氣管炎 / 哮喘 /嘶吼症 (總之唔係一般感冒咁簡單) 我當時最擔心係哮喘, 因為哮喘難斷尾而且係遺傳, 而老公細個曾經有輕微哮喘 醫生話要用藥去試究竟係咩事，於是又帶左個女去聞氣 用藥後有個貌似高級D o既醫生同我解釋 話確定我女係嘶吼症 第一次聽乜野係嘶吼症 原來係有細菌打撃呼吸道同埋喉嚨 會導致呼吸困難 佢形容支氣管就好似樹枝咁有好多支, 一支發炎的話都仲有其他 而喉嚨呼吸道就只有一個, 如果腫左就會呼吸困難, 窒息就麻煩 所以要留院駁機check住心跳, 因為怕佢訓覺窒息唔知道 而唯一慶幸o既係, 呢個病一日只需食一劑, 而且通常食一次就見效 果然食左之後就明顯好轉 當然仲有咳同未開聲，但已冇氣喘同發燒 起碼知佢改善中都冇咁擔心   所以最緊要對症下藥 呢件事令我深切體會到一個好o既兒科醫生係好重要 小朋友有咩唔舒服又唔識講出口 加上大部份醫生都認為小朋友一般感冒都唔建議用藥，用番自己抗體去打仗 但往往因為咁而斷錯症就會令小病變大病   而如果唔係今次經歷，都唔知乜野係嘶吼症 希望呢篇文章可以令媽媽了解多一點 到發生事的話都可以有個概念