小跳豆未夠一歲，仲未識行，但係都想佢多啲親親大自然，所以就起咗推住BB車行山去呢個念頭。 推住BB車行最好揀啲交通方便便，同埋有鋪石屎嘅路，比較安全。 城門水塘交通算方便，喺荃灣地鐵站附近，兆和街同眾安街街口搭82號小巴，總站落。回程喺落車嗰度上車。 城門水塘全程要大約3-5小時，因為我推住BB車，唔會行太遠，慢慢行來回大約行左1小時左右，所以行嘅路都仲係石屎路。 城門水塘景色怡人，亦會穿過一條兩旁都種滿百千層嘅樹路，充滿詩意，不妨喺嗰度留影一下。如果想落去城門水塘旁邊嘅空地，需要行少少樓梯。落到去係一片廣闊嘅天地。 不過去城門水塘嘅話，有一樣野要好小心，因為嗰度有好多猴子，所以千祈唔好拎食物出嚟啊。有啲大啲嘅小朋友嘅話，亦都要提醒佢哋唔好走去摸或者撩佢地。 另外，郊外未必有地方換片，最好係出發前換左先，如果去到真係要換可以選擇長椅或者自行帶備尿片墊、地墊等。 多啲帶小朋友去郊外，可以等佢地吸收新鮮空氣，同埋從小感受到大自然嘅美好。爸媽亦都可以趁機放鬆一下。 謝謝閱畢！ 歡迎聯絡: jumpybeanmum@gmail.com Facebook page: 小跳豆媽育兒記 Instagram: jumpybeanmum Blogs 腳印 靚太club,My BB.com, Mamibuy