2018年12月中，我地一家人去咗台北玩。因為今次台北之旅各方面我地都幾滿意，所以整理好我地既行程俾大家參考一下。(圖片比較多，請耐心等待) 住宿：台北花園大酒店，四至五星，價位一千港幣左右，整體都ok，早餐buffet選擇都還可以，不過味道就一般喇！勝在都算方便，行去西門町大約十分鐘左右。 交通：第一日我地係租車自駕，但奉勸一句，冇喺台灣揸開車真係唔好試，我地唔知台灣人玩法，佢哋好鍾意左穿右插，我地都經歷左好幾次驚險場面。之後我地主要call uber，因為真係信唔過台灣既的士司機。台灣uber係合法既，而且司機比較後生，同埋要有良民証，駕駛記錄良好先可揸Uber架。最重要係價錢平過的士，但質素好幾十倍，有一程我地只搭左四十幾蚊港幣，但係搭到Tesla呢！ 第一日：去到酒店check in都已經下午5點幾，所以我地休息一陣就出發去美福乾式熟成牛排館 Fresh & Aged Italian steak house食飯喇！ 爸爸話要去試下杜汶澤都讚好既牛扒餐廳，所以我地一早網上訂位：https://hk.eztable.com/restaurant/9661 佢地係食半buffet，即係點主菜，沙律吧任食。不過佢地冇飯及意粉，好似我個女2歲好多野都未食得就冇乜選擇，唯有食麵包及飲湯（除非我叫全熟牛排俾佢食，但係佢食唔得幾多，食剩既又好浪費，因為呢間餐廳都唔平，平均都四五百蚊港幣一個人）我地點咗牛排，豬排同龍蝦，都係好食既。沙律吧有好多款沙律及甜品，亦都有少許熟食，我覺得呢個價錢有半buffet都ok既！ 第二日：酒店食完早餐後我地就call uber去臺北市立動物園，成人60元小朋友30元（台幣）學齡前兒童免費，咁既價錢可玩大半日，超級抵玩。 如果有小朋友比較細建議可以租定BB車（娃娃車），因為都幾多路要行，萬一小朋友唔肯行要抱就大穫喇！ 台北動物園可以見到平時香港唔會見到既動物如長頸鹿、大象、斑馬、獅子、駱駝等⋯ 園內都有餐廳既，位置喺入口，熊貓館及河馬廣場都有，唔需要擔心冇野食。我地就去咗熊貓餐廳食lunch，有d位係可以睇住熊貓進餐架！味道方面，我地叫左兩個燉飯一個pizza，估唔到燉飯都幾好味，不過pizza就一般，飲品叫左水果茶，我覺得都幾唔錯。 如果夠時間可以去埋搭纜車去埋貓空，有水車吊車車廂架！ 夜晚我地去咗台灣朋友推介既欣葉台菜創始店，喺中山區雙城街，可以預先網上訂位，因為眼見平日晚都幾full。有BB椅及餐具提供（其實3間都有，台北餐廳都幾baby friendly）我地叫咗九個餸，個人覺得三杯雞同菜脯蛋最好食，其他菜式都ok既。不過因為Jasmine鬧情緒，成餐飯我都冇乜點食，只係最記得好食既兩味餸同埋送既甜點。 之後去咗市林夜市，其實幾年前都去過，而家就冇以前咁污煙漳氣，有室內位置係乾淨左好多，都適合同小朋友嚟玩架！ 第三日：圓山花博公園門外有土產市集可以行下買手信。行入去就有親子館（類似playhouse咁，好多野玩）重點係免費入場，不過要早一日前網上預約。 預約連結：https://parent-child.taipei/?md=index&cl=preorder&at=gameroom_entry (其實我都唔清楚唔係台灣人可唔可以預約，大家想去可以不妨試下) 由於我冇預約，而且即場報名都已經滿額，所以只能睇其他人玩。 之後我地去左借娃娃車，因為怕Jasmine要午睡，喺客服中心用証件登記就可以，不過佢地要求要放低有相既証件，會所證唔接受，又冇理由放低passport 或身分證，最後放低左爸爸既國際駕駛執照，起碼唔見左都唔會影響出境先。 入少少會有一館半露天既food court，好多唔同餐飲可選，不過我地嗰日去都幾大風，加上經常有飛機經過好嘈，所以我覺得去另一邊入餐廳食可能會比較好。 食完向前行就會有個市集（開1:30pm）及迴旋木馬。 騎木馬唔使錢，不過就要like and share佢地Facebook page。 再行前d就有一間好多小朋友電動車既舖，150台幣起玩半個鐘，相當抵玩。 Jasmine 就揀左架Mini Cooper，承惠350台幣，可以喺出面既大空地玩。除咗電動車，亦都可以玩平衡車或單車。 花博公園分咗幾個區域，玩完呢part可以過馬路去遊玩區，係一個室外公園，有沙池，滑梯千秋等等，我覺得有d似屯門市鎮公園新既既設施。 夜晚去台灣當然要食火鍋，有朋友介紹無老鍋，但又有朋友話覺得湯底偏鹹，介紹我去問鼎麻辣養生鍋（西門店）不過呢間我Facebook 問可唔可以訂位，佢地話唔接受海外預訂，所以我地一到台北酒店就叫酒店幫忙預訂定兩日後既晚餐。 到咗餐廳，等待既時候，門口就有張龍椅同埋宮廷服俾大家穿著及影相。 等咗一陣就有位喇，經過仲見到可以油指甲油及兒童波波池，囡囡見到當然心心眼，不過見到既時候已經10pm，波波池收左喇。 講返食物，全部都係散點既，食材同湯底都好食呀，而且仲有Haagen Dazs任食，我地4個大人食左大約千一蚊港幣，價錢都好合理。 第四日要返香港喇，上機前我地去左三井outlet，分戶外及室內區，戶外區中座有locker 可放行李，室內也有娃娃車可租。outlet都唔細，星期六人頭湧湧，我地行左兩個鐘都行唔哂。誠品書店有兒童區俾小朋友玩及睇書，如果唔想行街都可以喺度hea下呀！ 其實我一早做咗research知道桃園機場係有d免費既遊玩設施俾小朋友玩架，不過就喺terminal 2，而我地就喺terminal 1上機，完全唔夠時間所以去唔到玩，如果大家有時間都可以上機前去放下電啊！ ↫↫↫↫ jαsmínє & mαmα ↬↬↬↬ Facebook專頁：http://www.facebook.com/jasmineandmama Instagram：http://www.instagram.com/kathryn.Jasmine Blog：http://www.jasmineandmama.blogspot.hk Beauty Exchange Blog：http://www.beautyexchange.com.hk/blog/Jasmine%20and%20Mama PressLogic - Mami親子日常專欄：http://mami.presslogic.com/author/jasminemama/ PressLogic - Girls女生日常專欄：https://pretty.presslogic.com/author/kathryn/ Ublog：http://blog.ulifestyle.com.hk/blogger/kathryn/ theZtyle：http://jasmineandmama.theztyle.com Esdlife 靚太Club：https://wow.esdlife.com/space.php?uid=29619&do=blog&view=me BK Milk：https://www.baby-kingdom.com/article/?author=550 Mami Buy：https://mamibuy.com.hk/home/7000 聯絡電郵：f.kathryn@gmail.com
