認識我嘅朋友都知道我係台茶控，閒逛時爾都總會想要嘆返杯。   小妮子同我一樣都喜歡台式飲品，每次行經例必比我更快發現，仲會同我講。。。 小JM: 媽咪，買茶茶呀。玩到好熱啦。 媽媽: 唔駛啦，我帶咗水俾你呀。 小JM: 唔係呀。媽咪無得飲呀，你買啦。   你話，為食嘅小朋友係咪轉數都會快啲？   最近幾個月，我同小JM都愛上咗有關香芋及紫薯嘅飲品，有時難於忍口都總會買來飲。   不過老實說，街外飲品始終糖份高，未必可以每次都做到減糖。 但為咗滿足小JM及自己嘅口腹之慾，為娘只好來個自家製！ 還好小JM都收貨，都總算無白費心機。   今次將會介紹兩款簡便自家製嘅健康飲料，好啱一家大細一齊飲架！ 分別係香芋鮮奶 及 杞子豆漿！   香芋嘅好處： 香芋含有蛋白質、鈣、磷、鐵、鉀、鎂、鈉、胡蘿蔔素、煙酸、維生素等，對人體健康甚有益處。 唔單上咁，香芋仲有以下好處添架： －　保護牙齒 －　增強免疫力 －　降低血壓 －　補中益氣 －　有助排除體內多餘嘅鈉 *參考資料來源：https://goo.gl/DL64qg*     香芋鮮奶 材料:   香芋泥材料: 香芋　　450g 砂糖　　50g 鮮奶　　100ml   鮮奶　　按個人喜好   做法: 1.) 先將香芋去皮，再切成小片備用   小貼士： 香芋嘅黏液會整到手部痕癢，可以先將香芋及手以鹽水泡浸。 之後先再慢慢去皮、切件。 如想方便的話，就可以用手套代替。       2.) 再將香芋片放入已煲滾嘅爐中蒸熟，備用。   3.) 將已蒸熟嘅香芋放入破壁機，再加入砂糖及鮮奶，並按 醬料鍵以打勻。     4.) 打勻後可以睇下細滑度，如想再幼滑啲可以按 攪拌模式輕作攪拌，即成。   5.) 將香芋泥置於杯底（可按個人喜好加多或減少香芋泥份量喔！）   6.) 將鮮奶倒入杯中，即成。 　 (如想整熱飲，可以將鮮奶稍為加熱喔！）     小分享： 因為俾小朋友飲嘅關係，所以糖份相對較少， 如有需要可按喜好加入適量嘅糖份以作調整。         杞子豆漿 材料:   黃豆　　30g 杞子　　按個人喜好 冰糖　　按個人喜好 清水 　　450ml   做法: 1.) 預先將黃豆泡浸八小時，備用   2.) 杞子稍為泡浸一下   3.) 將黃豆隔水後，放入破壁機並添加清水，並按 豆漿鍵以打勻。   4.) 完成後即可取出並以篩過濾豆渣   5.) 隔渣後可加入杞子及冰糖煮開即可飲用。       補充一下，我家用緊嘅係Mdiea 破壁機BL1188喔!