副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

有血有淚催生萬字文

2019年4月3日一定係我人生中最難忘嘅一日,因為我個寶貝女波豬出世啦!

2019年4月3日一定係我人生中最難忘嘅一日,因為我個寶貝女波豬出世啦! 由於波豬逾期居留一星期,所以要喺4月2日入院催生,記得2號凌晨我個肚開始痛,於是當晚同老公無瞓過覺,俾原定時間早兩粒鐘辦理入院手續,上到産前病房,其實我個肚已經無咩點痛,聽完胎心過咗無耐,就被通知可以去候産室,當時心情勁興奮,覺得自己好快就可以見到BB,加上老公可以入候産室陪住我,令我覺得成件事好舒服,喺嗰度坐咗一陣波波,醫生就檢查我宮頸成熟未,Check完夠成熟,冇耐就開始幫我種豆落催生藥,之後藥力開始發作,我終於經歷到傳說中嘅陣痛,嗰種痛開始時就係好輕微嘅M痛,因為一直有老公陪住,而姑娘亦好好咁樣問我要唔要香薰減痛,又俾精油老公幫我按摩,所以就算愈來愈痛,但我都覺得還可以,中途醫生幫我人工穿水,呢下就真係好鬼痛,如是者痛下痛下就過咗4個鐘,醫生check到我已經開咗2度,然後姑娘同我講,開頭4度係需要啲時間,之後順利嘅就平均1小時開1度,所以要再隔4個鐘後睇下開到幾多度,仲話要開到8度先落得産房,由於我已經痛到有啲面容扭曲,姑娘問我依家10分痛我會俾幾多分,我就話7分左右,但依家諗返轉頭,當時嘅痛只係2分,因為之後嘅時間我先明白咩叫痛不欲生! 老公一直陪喺我身邊,但我已經痛到講唔到野,開始忍唔住嗌出聲,同埋喊咗出嚟,老公見到之後,佢都忍唔住流眼淚,同房嘅另一位媽媽同我同一時間落催生藥,開度數慢過我,但佢已經痛到不停嗌,連姑娘都叫佢留返啖氣,我聽到佢啲凄厲叫聲之後,心情亦都愈嚟愈緊張!如是者又過咗4個鐘,醫生再check嘅時候,我只係開咗3度,即係8個鐘我都只係開咗3度,但係我已經10分痛,真係好痛好痛,有人話似啲肋骨同時俾人折斷咁痛,但人哋斷肋骨係一次性,我係每分鐘都斷一次肋骨,即係未痛完,就要再痛多次。 跟住又過咗2個鐘,我已經痛到神志不清,突然我聽到同房嗰位媽媽大嗌話下面好似有嘢痾出嚟,然後好似癲咗咁狂叫,我聽到姑娘佢哋好緊張咁幫佢過床,過咗一陣,嗰位媽媽已經開到8度,要推落產房,嗰刻我覺得同我並肩作戰嘅戰友都已經落咗產房,我都已經痛咗成10個鐘,幾時先到我?就喺呢個時候,我都覺得自己好似有嘢想痾出嚟但又痾唔到,嗰種痛苦係形容唔到,我忍唔住同姑娘講,跟住一check,原來我只係開咗4度,我已經唔記得自己點樣捱到去8度,只記得我被推入產房後,5個鐘後先出得番嚟,因為我由8度開到10度,都等咗3個鐘,期間老公要出返房門外,而我就一直吸住笑氣,每次陣痛都有嘢想痾出嚟嘅時候,姑娘都會叫我hold住,但根本hold唔住,同埋笑氣令到我有啲神志不清,真係好痛苦,終於捱過咗3個鐘,開到10度可以生啦,老公入番嚟同我打氣,仲講咗好多深情嘅說話,雖然我唔係好清醒,但都感受到佢嗰份憂心,每次諗到呢度我都好想喊! 最終我竟然push咗兩個幾鐘都生唔到,最後醫生同我講再咁落去,bb心跳唔理想,但我痛到不停話要放棄,求佢哋救我同BB,喺產房5個鐘都唔可以飲水,所以我已經脫水,加上已經超過20幾個鐘冇食過嘢,根本冇力,我只可以用自己好想死嚟形容當下感覺,就連醫生助産亦唔成功,最終要緊急簽同意書用吸盤吸個女出嚟,老公都要緊急出番房,我記得自己簽完名之後,老公已經唔見咗,然後醫生叫我用多次力,呢次我花盡畢生力氣,跟住就見到醫生同姑娘好忙,我feel到有野被拉出嚟,我以為囡囡終於被吸出嚟啦,不過醫生笑住同我講:「你得咗啦,最後唔使用吸盤!」當下我無力俾到反應,直至好耐之後,我先醒覺醫生準備用吸盤前,俾多一次機會我用力,就係呢一下我終於成功咗!原來BB重8磅幾,明明最後一次産檢評估仲係中碼B???? 姑娘幫BB抹乾淨個身之後,就擺佢喺我心口度,跟住迷糊間感覺到醫生幫我傷口聯線,唔知過咗幾耐,就叫番老公入房,老公見到我同個女,露出一個心痛又興奮嘅表情,然後就拍下我地一家三口嘅第一張合照,感恩❤️ 想知道更多有關奇異媽媽嘅日常,請like & follow  奇異之日常 https://www.facebook.com/kiwi180122/ IG: kiwi419