努力左一段時間，終於用綠D見到淺線出現，我一直以為我同Bibi爸會開心到攬埋一舊，點知果一刻來到，大家既心情平靜到好似無事發生過咁，真係睇電視劇太多。 Bibi係我地計劃之內，但我(地)都努力左好耐先成功，由一年前開始做瑜伽，半年前開始睇中醫調理，一月仲特登揀左去馬爾代夫旅行，諗住要準備既野都準備好，月經仲遲左一個星期都未黎，應該都有消息掛，結果都係食白板。當二月放完個農曆新年假後無耐，月經又係冇黎，Bibi爸催我去睇中醫，我堅決再驗綠Ｄ試下，一開始係白板，放左係廁所一陣，諗住返轉頭掉，結果就出現左好淺既線，但係淺到呢，自己都唔肯定，跟住我叫Bibi爸睇，佢反應仲衰，覺得綠D係流既，因為係淘寶貨，佢都係堅持叫我睇中醫。 上網睇人地話綠D有持續加深就係中架喇，於是我第2朝用晨尿再試，真係深色左，果一刻個人開始有少少興奮，試左3日，綠D已經好深色，我拎比Bibi爸睇，佢半信半疑咁，又係叫我睇中醫把脈。比佢哦左幾日，終於搵日收工去睇中醫，結果中醫真係把到脈搏有力，但因為太早期，佢叫我自己買驗孕棒驗下。當晚我就去左萬寧買左一支平同一支貴既ClearBlue返屋企。 綠D結果   Bibi爸當晚仲未收工，我自己試左支平野先，結果好快就有個「+」，即刻影相send比Bibi爸睇，結果佢打左句：恭喜哂恭喜哂！另一款電子版既ClearBlue會顯示胎兒週數，我留返同Bibi爸一齊驗，大約等左5分鐘左右，就彈左「Pregnant 2-3」出黎，我又以為Bibi爸會好激動咁開心攬住我，結果佢叫我執返乾淨廁所D試尿兜就返入房睇Youtube，一Ｄ都唔浪漫既男人。 不過Bibi既到來我地都係好開心既，話哂都期待左咁耐，跟住以下就係Book普通診所→公立醫院→私家醫生產檢既步驟: 1.      係屋企/公司附近求其搵左間普通既家庭醫生診所，去到驗尿跟住見醫生，佢開左張「懷孕証明」比我，有左呢張野就可以Book公立醫院。咁求其搵診所既原因係婦產科醫生係好難即時有得睇，閒閒地最快都要一個星期後先有得睇，睇婦產科醫生好處係可以即時用超聲波機照。 2.      跟住我係用政府個App「BookHA 預約通」Book公立醫院，超方便唔洗一早去醫院排隊，簡單填Ｄ個人資料，影低「身份証」、「住址証明」同「懷孕証明」，Book左之後一個星期左右就收到姑娘電話同SMS，約左係10週左右開始第一次產檢。 3.      由於我一早已經上網搵左資料，知道公立醫院第一次產檢係唔會有超聲波照，所以快快手上網再搵下邊個私家婦產科醫生好，於是就Book左係8~9週既時候照心跳。公立醫院除左係12週「度頸皮」會用到超聲波之外，冇咩事都唔會再照超聲波架，所以Book定私家一個月照一次超聲波睇下Bibi個心都定D。 搞掂哂以上步驟之後，跟住就係等待既日子，呢段日子冇咩做就上網搵下D育兒Apps，「280days」、「HApi Journey」同「Milk Time」呢幾個App我同Bibi爸都Download左，有D野睇下日子都好過D，因為跟住落來既早期妊娠反應真係令人覺得日子好難捱。   *中醫師吩咐我要注意既事: 1. 頭3個月暫停運動 2. 行路要輕力，著平底鞋，唔可以跑 3. 所有生野、寒涼野唔好食 4. 唔好彎腰拎重野 5. 食到就食，唔好冇野落肚