由知道有左Matt豬之後, 我好快就決定去私家醫院分娩了~ 因為之前係浸會做完畸胎瘤手術，對私家醫院感覺良好！個時已經諗第時都想係私家生，好想比自己同BB 有個較安心既環境中分娩！ 懷孕期到而家25 weeks, 感恩我身體狀況正常！但因為我太驚順產生時會有突發事好難預計，感覺開刀定左日子出世較易掌握，所以最後都決定選擇剖腹分娩。好啦！剖腹生B過程要留待Matt豬出世後先再詳細報告 今次係想分享下由懷孕初期各樣檢查到揀私家醫院生B程序。 首先屋企驗孕後，再去普通診所/搵婦科醫生再檢查一次確實懷孕（如超星波最好等到6-8weeks 先先會照到閃閃），醫生會出信轉介你去就近政府醫院登記先（有些人如果一早決定好私家生，就會刪減去政府做登記，但亦好多人都照樣政府登記，因為私家醫院係唔接38週前早產case, 所以唔怕一萬，只怕萬一早產政府都會收你就登記左左先） 拎左信之後我大概8-9weeks 就去左屯門仁愛堂健康院登記約期做第一次檢查，當日下午再去埋屯門醫院做登記+約期做唐氏綜合症測試（亦即度頸皮）, 唔好太遲去登記，因為早期唐氏要係11-13週6前做，遲左就約唔到期架喇！或者好多人都選擇出去私家做T21 / nifty 測試更準確同全面面，可以驗血知埋bb性別呀！ 除左唐氏測試去屯門醫院會照超聲波度頸皮睇到BB之外，其他檢查我都係去健康院的，第一次產檢會抽血，驗小便，度高磅重，見醫生聽BB心跳，係無超星波照的。之後每4-6星期 去一次都係驗小便，聽心跳，度下bb size 同見姑娘睇返你各樣情況。 當然每月都會去私家產檢 照超星波睇BB啦，畢竟係第一胎，唔見下都唔安心又會好掛住！而我自己睇左三個醫生，最後係揀左劉珮琪醫生 佢好nice又有耐性照bb比你睇，每次檢查都有講有笑，所以開刀生B都係搵佢（李蘊兩胎都係搵佢接生的）！ 另外一樣重要檢查係「照結構」，睇返bb身體發育是否健全/胎位置/胎水等，要係19-22 weeks照。除左高齡/高危的孕婦，否則政府醫院係唔會提供的。要自己出去搵醫生照呀（價錢2xxxx 至 6xxxx 睇返醫生收費）！ 要決定去政府定私家生，多數等過左唐氏同照結構關之後再諗都未遲，因為太早醫生都未必幫你約期！而我就係照結構後就返去同劉醫生約期，BB足38週後就可以出世。比我自己揀邊日再同佢夾返，我揀左法國醫院（都要睇返你既醫生邊間醫院有駐診再定）程序如下： 1. 診所姑娘會幫我send去法國醫院拎booking no. (2-3日回覆） 2. 收到booking no. 一星期內親身去醫院交留位訂金$6000 （任何情況無得退） 3. 交完訂金打返去同姑娘約開刀日子 4. 下一次產檢時拎返收據&文件比醫生睇 私家醫院預約就完成喇！放鬆左小小，因為定左醫院同日子開刀，煩小一樣野  哈哈！又可以期待一下同bb見面   一般私家醫院分娩價錢計算： 1. 醫生費  2. 基本醫院病房收費 （剖腹/順產不同） 3. 麻醉師費 （開刀） 4. 兒科醫生費 （bb出世後） 5. 每日房費 **緊急醫生費/緊急手術費/揀時辰出世 另計 法國醫院5日4夜剖腹package: 法國醫院4日3夜順產package:    詳細收費資料可以禁去下link: http://www.sth.org.hk/download/zh/DeliveryPackage.pdf     以上純粹本人意見, 沒有廣告成份的~ 大家可以自行評估適合/不適合喔~~(如有問題, 歡迎PM我)   MATT豬媽媽日常生活可關注: INSTAGRAM   歡迎產品試用/活動邀請: EMAIL chuimei_chung@yahoo.com.hk