由大囡出世果陣，我哋一直無打算請工人姐姐，因為始終覺得屋企多左陌生人唔知點咁⋯直到上年有左小公主妹妹，大公主又開始返K1，婆婆表示投降唔能夠同時間兼顧，於是響我坐月期間我哋就開始物色請工人姐姐。 根據自己經驗，我覺得請工人首先要揀一間信得過嘅Agency。本身坐月果陣諗住自己請唔經agency,經啲apps or FB group 搵一啲完約在港工人，但係揀揀下一來質素參差，二來身邊朋友圈提醒經Agent 始終有short list 過，好過自己大海撈針⋯⋯  本身老公朋友介紹左我哋去一間agency,果陣一入到去見到有幾個姐姐響度等，以為有得見真人咁有效率，點知果班姐姐唔係約左我哋嘅⋯  因為我哋都係第一次請姐姐，完全唔識，個agent 即場幫我哋打WhatsApp 去同遠方嘅姐姐做video interview, 全程我哋自行對答，講完就俾返個電話agent, 感覺怪怪地，好似點解我要俾agency fee 佢哋呢？感覺唔係好pro咁⋯ 另一邊箱媽媽谷有媽媽介紹另一間agency 俾我，我又即管同時間問下啦⋯ 嘩！完全兩回事！ 好快已經根據我哋嘅要求shortlisted 3個potentials 嘅interview clips 俾我，呢樣我真係好欣賞。因為對於我哋呢類新手僱主咩都唔識，佢嘅interview clips 已經問哂好多刁鑽問題,睇到啲姐姐嘅即時反應對答，完全唔似夾好左咁。 睇完片好快我哋已經揀好左，完全無諗過要自己都in 下傾下計，（我都係後來先知原來係可以同姐姐私下傾下計先confirm 的），就係咁經過兩個月左右嘅時間我哋先親身同我家Jane姐姐見真身。 數數手指Jane 已經嚟到我哋屋企7個月有多，少不免當中都經歷過磨合階段，期間agency 都有介入一齊協調，唔會話個姐姐到埗就唔再理你。現家尚算一切安好，大家建立左默契。 5月嘅時候因爲我哋要出席海外婚禮所以俾Jane 提早放年假順便返去慶祝佢細仔生日，對於好多有工人姐姐嘅僱主都覺得我哋傻傻地，做左幾個月就俾工人姐姐放假？！一直我哋都係抱住你點對人，人點對你嘅心態，我哋視Jane 為家庭嘅一份子，所有大小家庭活動都會預佢一份，因為佢係嚟幫我哋手嘅helper而唔係奴隸。 直到早兩星期佢屋企有急事，要急於返去處理小朋友問題，我哋都係選擇相信佢，俾佢請假返去處理左先，唔洗等佢心掛掛。好多人問我驚唔驚佢今次話急事突然間返去唔再返嚟？其實我唔擔心，不過唔知從何來嘅信心。 因為Jane 都好交帶，一到埗轉機都有報平安；雖然有幾日失聯，不過我選擇唔主動搵佢，始終係佢嘅假期，佢有好多野等住佢去處理⋯但係估唔到係佢一收到network 就打video call 俾我，仲話好掛住大小公主，驚婆婆湊唔掂又擔心小公主返嚟唔認得佢⋯果一刻有點莫名奇妙嘅感動。 我哋寄語大公主待人真誠，心存希望，小公主如瑰寶珍貴，待人溫柔有禮，所以我哋都要身教，為大小公主做好榜樣。因為我相信Helper 離鄉背井嚟你屋企打工，你對佢好=對自己好。 不如由今日起改變一下諗法，不要只顧挑剔helper 的不足，嘗試欣賞一下佢做得好嘅地方呀！最重要都係要大家多溝通，坦誠相待，用人勿疑，疑人勿用。 一直好想為記低分享一下我嘅請Helper 初體驗，就響Jane 生日的一天記錄下來。 03·09·2019