「你再唔聽話，會有壞人捉走你！」 呢句話我細個時成日都聽到啲大人講。究竟所謂嘅「唔聽話」大人又明唔明點解呢？ 大人對「唔聽話」嘅理解係... 小朋友做出一啲大人認為唔合理嘅嘢。例如：小朋友玩緊嘅時候，大人突然間話要一齊影相。叫咗幾次之後，小朋友話唔影要繼續玩！就喺呢個時候，大人覺得小朋友「唔聽話」！ 其實大人要用小朋友嘅角度去點解佢唔肯影相呢？ 可能小朋友嗰一刻未玩完，你就要佢停止玩手上嘅玩具。可能小朋友未理解到點解嗰一刻要影相，同埋影相對佢地黎講有幾重要。 解決方法 同小朋友講不如玩多5分鐘我地一齊影相吖！今日係爸爸/媽媽生日，我地影張相留念，之後曬出黎放喺廳好嗎？ 你砌得個Lego 好靚喎，我地一齊影張相等爸爸媽媽返工掛住你時可以睇吖！ 其實只要講出原因另到小朋友明白點解要做呢個動作，佢哋一定會配合。當佢哋做到時，就要有適當嘅稱讚！