上網睇到最近昂坪360纜車推出港人限時懷舊價$88來回。 真係好多年無去過搭360纜車啦！ 菠蘿包家琴日就出動。 我地既目標就係行昂坪市集&行上天壇大佛！ 我地買左九點既票， 可能太早唔洗排隊就可以上纜車。 初初菠蘿包媽擔心菠蘿包會驚。（我畏高呀呀呀！） 點知全程都要企係到望風景， 菠蘿包媽都驚到面青青-_- 不過風景又真係好靚既。。 睇睇下風景就無咁驚啦！ 好快就到左昂坪了！ 大家記得落左車行左出去呢到影張相打卡， 連同纜車票可以換一個銀幣去巨型扭蛋機到扭蛋。 有機會扭到大獎送出遊戲機。。 我地都係扭到懷舊玩具XD 難得黎到緊係要影下相啦！ 以前番學上堂必偷玩既東南西北， 真係兒時回憶番哂黎！ 見到開始想落雨了， 我地就放棄行市集轉戰行上有268級既天壇大佛。 菠蘿包點算？ 無錯~菠蘿包媽用揹帶揹菠蘿包行上去。 菠蘿包爸就拎bb車同背包。 真係好累好累同好累！ 不過行到上去見到咁靚既風景都係值得既！ 休息左一陣雨無咁大我地就落番去。。 菠蘿包媽一邊落樓梯一邊腳都震埋， 好彩菠蘿包爸扶住我。。 落到地下點都要為呢個痴線既成功挑戰影番張相留念。。 以前細個菠蘿包婆婆公公都係咁樣抱我地三姐 弟上去。。 今日終於體會到佢地當年既辛苦！ （腰又痛腳又痛，好似比人打左一身咁） 完成挑戰後就去食齋， 菠蘿包婆婆公公表示d 齋菜比十幾年前食過既好味左。。 食完飯再行下就聽到廣播一小時後有雷雨會影響到纜車服務， 所以我地都行快二步搭纜車走了！ 菠蘿包己經放電完畢。。。 昂坪市集有一間唔起眼既育嬰室。。 我地要搵左好耐先見到。。 問職員有d都答唔出係邊到位-_- 指示又唔清晰。。。。 終於問到原來育嬰室係上一層。。 係條拱橋個位上邊，真係滴曬汗。 可能太多人濫用門都係鎖住要打電話問佢地密碼先入到去。 留意番個優惠只係到11月10號。 建議出發前預早幾日上網買票先！ 去到就唔洗排買票既長龍！ 直接去換票個邊會快好多！ 記得每個人都要出示香港身份證先有優惠！ 記得記得記得以下呢個好重要！！！ 3-11歲既小童係要出示出世紙副本唔係出示身份證！ 詳情禁我入去360官網啦！ *****請先評估自己既體力帶bb行上大佛。 ~~~~~~~~~~~~~~~~~~~~~~ 菠蘿包媽係一位全職媽媽blogger～esdlife，mamidaily，mamibuy。歡迎合作～產品試用～幼兒試食～試用嬰兒用品～試用媽媽用品～交流育兒心得❤ Facebook: https://www.facebook.com/HectorSo512/ Email： kayyau@outlook.com