石垣旅行～DAY2: 麵屋八重山STYLE、DOLPHIN FATASY親親海豚、公設市場買手信、食著名雞蛋布丁、石田屋品嚐石垣牛 麵屋八重山style 黎到石垣嘅第二日，我地瞓晏咗，大概11點幾出門口去到公設市場入面嘅「麵屋八重山style」食八重山拉麵，去到門口見到寫住謝絕小朋友入內，貝爸話照入去問下，店主有同我地示意no kid，但原來只要我地叫3碗人頭拉麵都可以俾我地入去，去到餐廳其實開門無幾耐，但都咁啱坐滿晒，等咗15分鐘位，然後我地同貝貝就各自點一個麵，雖然寫到唔想小朋友入內，但店主又有勁多貼心舉動，包括：俾咗個坐墊佢墊高啲坐；問我地要唔要將貝貝果碗改做small size，會退返100yen俾我地；跟住又主動提供晒嬰兒餐具；仲有一甖橡筋話我知可以幫小朋友紮頭髮；洗手盤又有張梯級櫈俾小朋友洗手；貝貝碗麵專登煮淋啲，又問我地落唔落蔥；臨走仲送咗包樂天熊仔餅俾貝貝。呢啲咁貼心舉動真係得日本先有。講返碗麵先，我同貝貝都係食鹽味蕎麥麵，但麵條個樣同普通拉麵差不多，不過彈牙啲，拉麵黎講我一向鐘意食湯底清多過豬骨湯拉麵，所以我覺得呢間好食，湯底清甜！唔會越食越漏！啲肉都好淋好食！貝貝都差不多食晒全碗small size，貝爸最後食咗一碗鹽味加一碗名古屋拉麵，都話好食！   麵屋八重山style  電話：0980－83－5142 ▲唔識睇日文唔緊要，店長會俾本中英對照嘅menu你睇同埋幫你手買。  ▲鹽味蕎麥麵，麵條比一般拉麵硬身，好食。肉係切上，好淋好味！  ▲太好味，貝貝食咗好多麵麵～   Dolphin Fantasy親親海豚 食完都就出發去親親海豚！係我黎石垣最期待嘅行程！因為貝貝睇「巧虎」學識咗海豚～跳！所以佢成日都好鐘意海豚咁！其實沖繩都有得睇，但果時佢仲細個，覺得佢睇完都唔識，既然佢大個咗咁多又認得海豚，今次就一於帶佢黎睇啦！ 我地join咗石垣旅行社嘅行程，因為要識聽日文先可以參加dolphin fantasy嘅活動(因為要識聽指令，語言不通會有障礙同危險喔），如果唔識就只可以跟旅行社join，導遊係講廣東話，二人成團，未滿4歲免費！如果只係參加親親海豚活動，0歲以上就可以參加，上網俾錢book就得，超方便！最重要係如果撞正落雨都可以玩，著雨褸就可以參加！我地當日去係超大風，雖然天氣都好，但係吹到我地個頭好似癲婆咁，影啲相都唔靚，女仔記得紮起頭髮！   講返個團先，先揸車去集合地方（好似一個荒島咁，但其實好近，公設市場揸過去都係十分鐘內，reception係一個貨櫃，見到寫住dolphin fantasy ），導遊會接我地入去搭一架van仔，好好彩呢日我地包團，得我地一家三口！出發前，導遊會俾個近身包我地裝貴重物品自己跟身，咁自己唔好再袋其他野去，同埋建議我地穿拖鞋，行裝有咁少得咁少。 坐5分鐘左右就到達目的地，現場就係幾個魚排咁好簡陋，坐低先係講解下周邊環境同注意事項，仲有提醒我地要除耳環，首飾，因為驚唔小心跌咗落海，海豚會唔小心食咗。跟住自由活動一陣，可以周圍睇下（但其實無野睇）影相同埋做好準備。 ▲經過呢條大橋就到集合地方啦！  ▲我地就係坐身後白色架van仔入去，手上就係導遊俾嘅近身包～ ▲條路非常不平，鄧下鄧下，坐到貝都驚????  ▲原來海豚就住係眼前2個魚排到～ ▲著埋救生衣，我地個行裝就係得咁多～ ▲大人小朋友都記得紮起頭髮！果個位好空矌，好大好大風呀！   之後就坐返低導師會介紹下海豚嘅品種，特性，問下問題，好輕鬆嘅，例如原來石垣嘅海豚會比香港海洋公園嘅海豚較深色，因為石垣長期都好猛太陽，佢地都會曬黑架！了解完一輪再穿上救生衣就出發親親海豚啦，貝貝整個就係維持住超興奮嘅狀態～  ▲第1次著救生衣～ ▲貝貝好鐘意海豚，老師拎咗隻公仔出黎講解，點知貝貝勁開心搶咗黎玩。 ▲我依家先知原來係用身長黎分別佢地係海豚定鯨魚～ ▲導遊話：「叔叔帶你睇海豚丫」貝貝就拖住咗叔叔走，完全忘記咗我地...   落去個魚排之前先要踩盤消毒水同噴噴手，跟住就可以坐低接近海豚，老實講，第一次0距離望住海豚就喺正我前面游，我都有少少驚，我feel到貝貝好似有少少驚，但佢內心係興奮，我問佢果啲係咩黎？佢都好high咁識答我：「嘩～海豚！跳！」跟住導師就會開始指示海豚做動作，例如點頭、擺尾、游水轉圈、拋圈圈、唱歌，餵魚俾海豚食...無幾耐就叫海豚俾我地摸摸，勁得意！海豚會擺好pose等我地黎摸，個身體摸起上黎好似滑嘟嘟嘅茄子，之後又會摸下魚鰭握手咁，貝貝一見到佢游到咁近就捉實我，佢開初唔敢掂，係見到爸爸媽媽摸咗幾次，加上我地全部人一齊鼓勵佢，最終我話我地一齊摸啦，跟住就敢主動伸手掂，好興奮，望住佢肯踏出呢一步，我都好安慰！ ▲一開始，其實我好驚貝貝會唔會唔肯坐定定，又有幻想過佢會唔會唔小心跌落水????點知佢坐得超定，無郁過咁制，好專心 ▲一開始係坐再高一級，warm up咗先坐到依家最低～其實海豚喺我隔離擘大口果陣，我都有啲怯，因為啲牙好恐怖～ ▲貝貝見到海豚好開心，係咁揮手say hello～  ▲貝貝都好敢摸海豚架！（因為太大風，我個頭樣衰到真係唔想出鏡????）  ▲摸完又話：「摸摸」  ▲摸完仲笑架 ▲握握手～做個好朋友 之後一直都肯繼續摸，越摸越開心，係咁捉住條鰭，但去到話要俾海豚kiss，佢就開始崩潰，佢係見到海豚錫我同爸爸先，最尾先到佢，但佢見到就已經呆咗（佢平時都好怕我地濕吻佢！）跟住爸爸就抱佢出啲，等海豚游上黎，佢見到海豚個嘴越隊越埋，佢超崩潰，應該覺得錫落去會好濕所以好驚，錫完之後，爸爸：「dolphin係咪kiss你呀？」其實貝貝第一次被錫完後，回神過後有怕醜咁答：「係呀！」跟住再話錫第二次，佢先話唔好，但我地又捉住佢，佢先再崩潰啲，佢唔想再被錫，但都係被海豚強吻咗！其實貝係無喊架，佢咁嘅樣我純粹覺得係嫌佢濕笠笠，佢喊都無眼淚...跟住無幾耐又肯繼續同海豚玩，係咁摸佢！反而去到睇海豚跳水轉圈，每跳一次，貝貝真係成個人抽搐咗一下，又的確好近距離好震撼。total玩咗一個鐘就走嗱，真係一個好難忘好開心好值得嘅體驗～下次等4歲後，就可以參加埋落水同海豚暢泳！ 石垣旅行社：官方網頁 石垣公設市場 同海豚玩完，貝貝已經好攰，我地就計劃去行公設市場買手信。事前我都search咗邊啲係必買！ ▲泡盛啫喱(無咩特別，唔係話好出色，試咗兩杯，最後都決定唔買） ▲雞蛋布丁（我覺得最rich果隻味好好食，但老公話paul lafayet好食啲，機場仲有專櫃可以有冰袋雪3個鐘返到香港，但最後我地都無買） 無影到：菠蘿蛋糕（貝貝食咗一件之後，覺得好好味，買多咗幾件預佢呢幾日小食，但返到香港先試其中一件好似鳳梨酥嘅物體，原來好好食，但我地買得一件） ▲石垣和牛仙貝（見到呢個樣係最吸引，我以為好似旺旺咁，但完全係蝦片口感，有牛肉味，都ok好食嘅！） ▲邊銀食堂辣椒油（周圍都賣呢支辣椒油，好出名，睇介紹話買激辛都唔會好辣，照跟！幾香，我依家成日食佢，但真係小心d落，落得多變得好辣好辣） ▲黎到日本，基本上我咩都由佢試，連雪糕我都終於俾佢試咗，佢勁興奮不斷講：「ice cream ice cream」 石垣公設市場 營業時間：8:00-20:00 地　　址：208 Okawa、Ishigaki, Okinawa Prefecture 907-0022、日本 電　　話：+81 980-84-3477   石田屋食石垣牛 石田屋booking事先要上個網頁（My Concierge Japan）登記，如果完成booking，佢會通知你同埋俾餐廳最低消費先可以完成booking，我地3人，我俾咗$12650yen。 石田屋有兩邊，一邊係鐵板燒，一邊係炭燒，因為我擔心鐵板燒唔知夠唔夠我地2大1小食，最後我都係揀咗炭燒～但如果無帶小朋友，我都想食鐵板燒，同埋佢地唔提供bb櫈，但會有cushion可以俾你墊高黎坐，或者可以選擇坐塌塌米。價錢黎講，好似比美崎牛平啲，但環境同服務質素呢度好得多。不過味道黎講，佢入口係仲溶過美崎牛，但係無乜肉香味！啲汁都麻麻地，的確，有少少失望。連貝貝都食少咗，走咗之後，去咗買佢至愛嘅banana，成條蕉又食得晒。   石田屋： 地址 〒907-0022 沖縄県石垣市大川2 730COURT3F 電話：0980-87-9882／官方網頁訂位 營業時間：11:30～22:00（最後點餐時間為21:00） 支付方法：預約必須事先使用信用卡完成套餐的預約支付。來店加點的菜單或飲料則為現場(信用卡或現金)結帳。 ▲石田屋就係呢棟野嘅3樓。  ▲我地揀咗食炭燒肉果邊～ ▲呢塊肉必點，好好食，全部最好食係呢塊肉 下篇會介紹第三日行程，Vanilla Deli食超juicy和牛漢堡、竹富島觀光：坐水牛車、踩單車、西棧橋，kondoi beach、fusaki beach 睇消失的日落、超好氣氛嘅居酒屋「一魚一會」，coco咖喱宵夜 重溫： 「石垣親子旅行2019～飛機篇」： https://mamibuy.com.hk/talk/article/79460 「石垣旅行～day1：美崎牛燒肉、入住art hotel、birthday、舟藏之里居酒屋，驚安Donki行街」： https://mamibuy.com.hk/talk/article/79505 「石垣旅行～day2: 麵屋八重山style、Dolphin Fatasy親親海豚、公設市場買手信、食著名雞蛋布丁、石田屋品嚐石垣牛」： https://mamibuy.com.hk/talk/article/79684 「石垣旅行～day3: Vanilla Deli食超juicy和牛漢堡、竹富島觀光：坐水牛車、踩單車、西棧橋，kondoi beach、fusaki beach 睇消失的日落、超好氣氛嘅居酒屋「一魚一會」，coco咖喱宵夜」： https://mamibuy.com.hk/talk/article/79994 「石垣之旅～day 4: fusaki beach、雞白湯拉麵、刺激到爆炸的小朋友天地BANNA PARK，encore 美崎牛燒肉」： https://mamibuy.com.hk/talk/article/80366 1Y10M10D —————————————— 喜歡我地一家三口就follow我地啦，仲要 Set 做搶先看呀～  Facbook page: 貝貝Alice-小寶貝夢遊日記 Instagram: bowl_lam