相信呢排大家都少咗係市區玩，有啲媽媽甚至話擔心公園都受污染，要搵一個安心親子放電嘅地方真係唔容易 早幾日我就同2隻小羊去搭船仔，係西貢環島遊。西貢係香港出名嘅後花園，非常之有特色。 環島遊船仔一般收費每人$50 (小童無須付費)，可能我哋果日好少人出海，船家比我哋$40已可出發去橋咀島 (yeah 賺咗雪榚錢)。坐船對小羊來講係好新鮮，住市區嘅我哋，真係甚少機會坐船；係船上除咗觀光景點 (船長會有少許講解)，仲會見到好多不同水上活動，呢個體驗都係非常有趣。 西貢橋咀島: 沙灘 x菠蘿包石 x沙洲小島 嚟到橋咀島，小朋友可以玩下沙、玩下水，親親大自然，而且可近距離接觸海洋生物。菠蘿包石係橋咀島嘅名勝，因為石頭上佈滿裂紋，形象似菠蘿包而得名，2隻小羊都話好似。 我哋抵島時剛好潮退，有緣見到沙洲，可徒步去對面小島；小島範圍係屬於香港地質公園部分嘅地方。到達小島，行大約20分鐘便上到島頂。上山嘅路唔算難行，眼見好多小朋友都自行上到島頂，個度嘅風景非常唔錯呀。 坐船回程後，可係西貢閑遊碼頭、玩下公園、逛逛市集食下小食，最後仲可以食埋海鮮餐，就滿足完結一個豐富嘅假日。   想知更多親子去玩去食/ 有關入學虎爸虎媽資訊，請讚好我嘅Facebook 專頁 https://www.facebook.com/yeungyeungmama/