呢篇趕上市,要寫先呀, 仲有幾日就過年, 大家準備好未? 身為呃柿人,豆沙媽媽最鍾要整識整水 今次教大家同小朋友一齊整<<賀年花花樹>> 材料: 首先要有一個空白的位 畫紙一張(做背景)（可以係新年包禮物紙, 要係清清地, 如果係白底又可痴野上去,又唔怕摵唔甩,就連背景紙都唔駛） 較剪 雙面膠紙 磨砂膠紙 紅/粉紅/黃色系 4-6張 可唔同大細SIZE (手工紙/唔要的利是封/揮春/傳單/新年包禮物紙, 盡量recycle唔好買, 手工紙首選12蚊店) 簡單型狀貼紙 圓形/ 星形 （optional) 顏色筆 綠色系 數張 (手工紙/傳單/新年包禮物紙) 揮春貼紙 （optional) <<Step 1>>  首先經歷整聖誕樹的教訓, 豆沙媽媽唔再用blu tack痴係鞋櫃上面, 因為豆沙摵咗啲blu tack當泥膠咁玩 同場加映 聖誕樹親子手工作品 今次改用背景紙係底, 再用磨砂膠紙貼實係鞋櫃上面, 揀咗豆沙媽媽最鐘意的粉紫色 有咗背景紙就點整都唔會整花個櫃 <<Step 2>> 搵張綠色紙，摺起兩邊,摺成一個梯形做花盤，用雙面膠紙/磨沙膠紙貼係底 因為張背景紙有啲短，所以豆沙媽媽貼咗出界，留多啲位俾跟住的花花 但咁睇貼出界個效果都唔錯 (士旦啦) <<Step 3>> 搵啡色蠟筆/木顏色/sign pen (士旦拎起手有咩就用咩) 俾豆沙畫線條，做樹枝，盡量控制佢畫線 雖然佢間中會打圈 當然豆沙媽媽之後會自己補幾筆 <<Step 4>> 正方形紙背面，對摺再對摺，再對半，free hand 剪個花形出嚟，或者畫咗個形再剪 (畫係背面就睇唔到) 一剪就4朵，快靚正 或者係D 花紙呀, 傳單呀,包裝盒呀,上面有花就可以直接剪出嚟用 剪花花,剪得唔靚都唔緊要, 朵朵都唔同樣,一齊睇就唔覺得唔靚, 如果真係好手殘, 可以剪圓形都無問題ga <<Step 5>> 裝飾啲花花，整番個花蕊. 叫豆沙係花中間畫圈圈，雖然佢都係亂嚟 (左邊係豆沙媽媽畫的) 同埋貼貼紙係中間（搵唔到圓形貼紙，星形照殺）豆沙未必貼到好中間, 由得佢啦 <<Step 6>> 貼雙面膠紙係花花底 豆沙摵完雙面膠紙就自己走去貼, 又會貼得咁整齊 <<Step 7>> 可以剪啲樹葉去貼，或者貼啲揮春貼紙, 或者拎顏色筆畫下花呀,樹葉咁 （豆沙媽媽買錯咗玻璃貼，唯有再去買過） 跟住搵到公司有一張好耐之前買落, 諗住番去搞搞去, 點知唔記得帶番屋企 (唯有之後先加番相)   小畫家住先, 請自行腦補 <<Tips>> 想靚最緊要襯色 你控制唔到小朋友點貼,但用咩顏色其實控制到 背景做淺色底，粉紫，粉綠，粉藍都ok, 或者唔太芯的禮物花紙都得 花花就可以係紅，粉紅，桃紅，橙，紫都得 其實同樣方法可以整棵吉，將啲花花變晒做橙色圓形就ok(豆沙爸爸話唔要吉就無整到) 想靚就要有大有細 有大有細會睇落靚D, 畫畫或整scrap book 都會apply 呢個theory 唔同歲數可以有唔同程度的involvement  1歲 - 貼花芯，貼花，貼揮春貼紙 2歲 - 貼花芯，貼花，貼揮春貼紙, 畫樹枝，畫花芯，摵雙面膠紙 3歲 - 貼花芯，貼花，貼揮春貼紙, 畫樹枝，畫花芯，摵雙面膠紙, 試剪花，摺花盤 4歲 - 貼花芯，貼花，貼揮春貼紙, 畫樹枝，畫花芯，摵雙面膠紙, 摺紙剪花，摺花盤, 畫花 拜個早年先 祝大家花開富貴 身體健康!