久唔久都有媽媽inbox問BLW初頭食咩好，兩年前分享過唯b嘅入門食物，而家加埋妹妹嗰啲，大家有興趣可以參考吓 BLW主張BB嘅食物多元化，鼓勵照顧者提供多種類食物畀BB選擇，同時嘗試不同食物嘅口感同味道。所以，只要係健康嘅食物、易於切成手指條狀（等BB容易拿捏），同埋唔係易哽塞食物就可以。 兩兄妹喺剛開始嘅頭幾日，先試菜芯莖，等佢哋掌握好拎起食物同埋放入口嘅動作。喺頭一個月，佢哋仲嘗試過以下食物： 水果： 香蕉 / 火龍果 / 士多啤梨 / 藍莓 / 牛油果 / 蒸軟咗嘅蘋果 / 提子     蔬菜： 菜心 / 南瓜 / 紅蘿蔔 / 甘筍仔 / 紫蘿蔔 / 節瓜 / 翠玉瓜 / 西蘭花 / 西蘭花苗(Broccolini) / 青瓜 / 甜椒 / 車厘茄   澱粉質食物： 蕃薯 / 薯仔 / 螺絲粉 / 飯波 / 零鈉烏冬   當佢哋開始食得好，對食物嘅興趣亦漸大，我就開始準備其他食物，包括：薯餅、Pancake、肉丸、蛋糕、饅頭，仲有唔同小食。而喺哥哥9個大左右，就開始嘗試用餐具（點解咁早？可以睇吓下面連結嘅文章）。而使用餐具嘅入門食物可以係麥皮、乳酪（一歲後）同杰粥。 初初準備食物可能都會好苦惱，但隨住佢哋食得多同好咗，其實冇想像中咁難，因為只要從大人嘅食譜減去調味，例如煮白汁意粉唔加鹽／胡椒粉，總之天然就可以   最後，無論你係俾BB以傳統餵食定係BLW 加固，都希望留意吓呢幾點啦： 1. 畀BB食圓／橢圓形食物（如提子、車厘茄），要打直切開一半甚至四份，以防哽到。 2. 唔好畀BB食太硬或易哽食物，如蘋果（可先蒸淋先畀畀BB）、果仁（可磨成粉或切細加入pancake/蛋糕）。 3. 最好進行低鈉兼無添加飲食，即係唔好加糖、鹽、豉油（BB豉油啲成份其實都唔係好健康）。 4. 一歲以下嘅BB不能食用蜜糖，以防肉毒桿菌中毒。 5. 菜葉容易「了」喉嚨，最好喺BB嘅牙齒能扯開菜葉時先俾畀。 6. 如果對致敏食物有憂慮，可以參考衛生署或其他認可網站提供嘅易致敏食物列表。   希望以上分享幫到大家更容易準備食物啦。 HAPPY BLW   三年前分享過唯b嘅進食進度，有興趣可以睇番： https://www.facebook.com/weplaynlearn/posts/1871659269525726?__tn__=-R   Source: http://www.rapleyweaning.com/assets/blwleaflet2.pdf   Please like & follow us： Facebook：https://www.facebook.com/weplaynlearn/ Instagram：https://www.instagram.com/kly.chu/