一直好想整清湯蘿蔔牛腩俾小b爸嘗嘗！ 而家留喺屋企多咗，多咗時間，想整就整吧！ 炆清湯腩其實唔係好難，只係炆嘅時間較長！ 而炆嗰過程，就足夠我整埋手工麵添^^ 我都係第一次整，都幾成功！ 小b爸同小b一路食一路話"正" ！     《清湯蘿蔔牛腩》 材料: 1. 牛腩 約900g 2. 白蘿蔔 1個 3. 雞湯 250ml 4. 水 約1100ml 5. 八角 3粒 6. 花椒 1.5茶匙 7. 香葉 3片 8. 薑片 8-10片 9. 冰糖 15g 10. 鹽 適量 11. 蔥 1棵   做法: 1. 牛腩用滾水、3-4片薑、蔥飛水，瀝乾。 2. 白蘿蔔去皮滾刀切件。 3. 除白蘿蔔及鹽外，將其餘材料放入鍋內，加蓋大火煲滾10分鐘，轉細火炆45分鐘，熄火焗30分鐘，然後加入白蘿蔔，加蓋大火滾起後，轉細火炆40分鐘，熄火焗30分鐘，加少許鹽調味，即成。     《手工麵 (2大1小份量)》 材料: 1. 中粉 300g 2. 鹽 4g 3. 水 約130-150ml   做法: 1) 所有材料攪勻，搓成麵糰，蓋上濕布靜置40分鐘。 2) 於工作枱撒上適量麵粉，用麵棍將麵糰碌壓成薄片。撒上麵粉，左右對摺，每摺撒上麵粉以免麵條黏埋，然後用刀切成麵條，粗幼按自己喜好。 3) 水滾後，加入麵條煮2-3分鐘，便可。