之前陀住妹豬初期，又暈又嘔，又無胃口， 淨係想食嘅 #蠔仔肉碎泡飯 ！ 今日突然又好想食喎，自己買咗斤蠔仔番屋企整！ 小b爸大讚好味，隊咗兩大湯碗！   而家天氣咁熱，胃口唔太好，來碗泡飯都唔錯，易入口，開胃啲^^   材料: 1. 蠔仔 1斤 2. 免治豬肉 15蚊 3. 飯 約3碗 4. 冬菜 35g 5. 芫茜 3棵 6. 蔥 1棵 7. 薑 2片 8. 大地魚粉 1.5湯匙 9. 蝦米/蝦皮 隨意 10. 雞湯 500ml 11. 水 1000ml 12. 胡椒粉 適量 13. 魚露 少許   醃料: 1. 生抽 1.5茶匙 2. 糖 少許 3. 粟粉 1茶匙   做法: 1) 蠔仔先用水冲洗，再加入鹽同生粉拌勻，逐隻洗去蠔殼。反覆2-3次直至乾淨。 2) 煮滾水，加入少許酒及鹽，將蠔仔略汆水，然後印乾水份備用。 3) 冬菜用清水浸10分鐘，用手揸出多餘水份，切粒備用。 4) 蝦米用清水浸30分鐘，切粒備用。(如用蝦皮，就省略此步驟) 5) 免治豬肉加入醃料醃30分鐘。 6) 薑切絲、芫荽切碎、蔥切粒。 7) 爆香薑絲、冬菜，然後加入蝦米炒香，倒入雞湯及水，煮滾後，加入大地魚粉，然後再加入肉碎煮5分鐘，加入魚露拌勻，再加入飯煮5分鐘，再加入蠔仔煮2分鐘，加上芫茜碎、蔥花及胡椒粉調味，完成。