疫情下，少咗外出用餐！ 日日就喺屋企煮足3餐，中、西、台、日、韓、星馬泰、上海菜都煮勻，真係煮到有點懷疑人生！ 今次就整葡國雞，好惹味！ 每次整呢味菜式，都一定要煮重米！因為好鬼好送飯！ 唔該，添飯丫^^ 材料: 1. 雞髀肉 2-3塊 2. 洋蔥 1個 3. 薯仔 1大個 4. 甘筍 1條 5. 黃薑粉 少許 6. 椰漿 300ml   醃料: 1. 生抽 1湯匙 2. 紹興酒 1茶匙 3. 鹽 少許 4. 黃薑粉 1.5茶匙 5. 胡椒粉 少許 6. 糖 1茶匙 7. 粟粉 1茶匙   做法: 1) 雞髀肉切件，加入醃料醃30分鐘或以上。 2) 薯仔、甘荀、洋蔥切件備用。 3) 燒熱油鑊，加入雞髀肉煎至兩邊金黃，盛起備用。 4) 原鑊下洋蔥炒香，再加入薯仔同甘筍炒勻，雞髀肉回鑊，加入黃薑粉炒勻，倒入少許水，滾起後，轉細火煮15分鐘，期間要炒勻雞髀肉，最後加入椰漿煮約5分鐘，加少許鹽調味，完成！ (如想醬汁杰一點，可以加少許生粉水)   Note: 1) 煮好後，可加上椰絲或芝士於面，然後放入焗爐，200度焗15分鐘。唔加直接焗都得！