Doughnut有蛋糕base，亦有麵包base嘅酵母version。當然亦有油炸同焗嘅做法。今日呢個係蛋糕base焗version，主要係唔駛等發酵，快靚正又唔駛炸到成屋油味。 其實蛋糕base doughnut 感覺係似實D嘅蛋糕，唔用酵母，用蛋、泡打粉同梳打粉做levening。要焗cake based doughnut要有個doughnut模，今日我個模doughnut直徑大約7cm，一盆有12個。材料份量同焗嘅時間都係為呢個盆而計同試出來。如果你用更迷你size嘅doughnut模，可能可以焗多幾盆，而入爐嘅嘅時間亦要減D。如果焗完要再重用個模，記得要先攤涼個模，抹一抹再掃或噴油先好再吱蛋糕漿入個模度啊！ 今日所做嘅裝飾我用咗nutella＋星星糖花同雲利拿糖。雲利拿糖係我一路多年來醃的。只要在一大樽內放入砂糖，每次用雲利拿條取籽後個夾唔好浪費，成條放入個糖樽度，日子有功，D糖就會變成雲利拿糖㗎喇！ 材料： 牛油 70g(室溫放軟) 砂糖 45g 蛋 1隻 (室溫) 雲利拿油 半茶匙 低筋麵粉 110g 泡打粉 半茶匙 梳打粉 1/8茶匙 鹽 1/8茶匙 無糖乳酪 60g   裝飾用溶化朱古力、nutella、牛油、砂糖、裝飾糖等 適量   做法： 預熱焗爐170。C，doughnut模抹油，備用。 先將牛油和砂糖打發至顏色變淺，再加入蛋及雲利拿油拌勻。 將麵粉、泡打粉、梳打粉及鹽一同過篩放入另一大碗內。將三分一粉類加入2輕力拌勻，再加入一半乳酪輕力拌勻。然後重覆以上動作至拌入所有粉類和乳酪。 拌好後放入吱花袋(密實袋也可)。將袋角剪開，吱入模中。注意模只要約三分之二滿就夠。 入爐焗15分鐘。取出脫模放網架放涼。放涼後可在一面沾上已溶化的朱古力或nutella。如想做砂糖版，可以先薄薄在doughnut上搽上牛油溶液再沾上砂糖即成。