仲記得，哥哥四歲時第一次驗眼，當時驗出輕微近視，視光師話正常小朋友應該都會有少少近視，隨年紀長大會慢慢退至0度。但哥哥咁細個就已經有50至100度，意味著好大機會繼續加深。自此，我就每半年帶佢驗眼一次。   初時，加深速度唔係太快，6、7歲時維持大約200度。到8歲果年，近視度數突然飆升百幾二百度，到宜家10歲已經近500度了。視光師建議佢去睇眼科醫生，相討對策，以控制近視。因為小朋友近視，加深太快嘅話，有機會變成深近視一族，好可能出現其他眼疾。       哥哥唔打機、唔玩手機、唔睇電視，最大原因可能係太鍾意睇書。小朋友鍾意睇書係好事，但有時太沉迷而唔比眼睛休息，距離及姿勢唔好，導致近視加深。眼科醫生提出3個建議可以做到控制近視嘅效果，分別係戴矯視隱形眼鏡、DIMS離焦鏡片同埋滴阿托品眼藥水(Atropine)。     要小朋友自己戴隱形眼鏡，有一定難度，如果處理得唔好，眼睛易受感染。加上佢成日跑跑跳跳同踢波，以前已經整爛過唔少眼鏡喇，如果配副DIMS比佢，價錢唔平，容乜易又比佢撞花跌爛，肉都赤呀。所以，決定用阿托品眼藥水作近視控制嘅方法。       阿托品眼藥水需要經醫生處方，每次一支每晚臨瞓前雙眼各滴一滴，哥哥自己都可以做到；藥水會令眼球放鬆，減慢眼球拉長速度，從而減慢近視度數上升，控制近視加深嘅速度。而低濃度副作用亦較少，任何近視度數都可以用。搵到呢個方法幫哥哥，我哋又開心又放心。           有興趣可以去望下: https://www.childeyecares.com/ Facebook: https://www.facebook.com/childeyecares/