Wohohoho~~ 趁有印象分享下2胎3寶生仔過程先 由知道有左細佬後， 直到出世都非常順利，感恩感恩 因為上胎生孖b係開刀，今胎QE可以俾我揀開刀/順產。。。   當然我會繼續選擇開刀啦 我怕陣痛，又怕食全餐。。。 開刀有晒心理準備，對我感覺會好啲。 疫情關係，一早知道今胎冇探病。。| 不過老公依然每日都會拎茶湯飯黎交俾姑娘俾我。。 到我落得床時，都可以行出病房見下面 私家房餐~   上胎好早31週就俾左期開刀， 今胎35週先俾到期。。。 細佬乖乖，住足38週多先出黎 提早1日入院，疫情下要做深喉檢測， 11點左右入院，吐完口水，就留係產前獨立房等報告。。。 期間都會有醫生同麻醉師黎搵我簽同意書同講解。   下午5點左右有報告， 冇事就可以上埋二等房lu... 今次依然係2人房窗口位。。 好中意個大窗，幾日望住好舒服， 又見到維港景   預算係下午開刀，但姑娘話有機會提早， 所以我都係半夜12點開始要禁食。   前一晚訓下醒下咁，上胎會好興奮期待孖b出世， 今胎依然期待。但多左個憂心，好怕自己會出事見唔返孖b... 心情有點複雜。 而細佬最後仍然好活躍係肚內郁郁郁同媽媽加油～   細佬出世個朝好好天， 忽然9點姑娘就入黎話下個到我開刀 要即刻換衫插喉，同時通知老公黎醫院手術室門口等我。 落手術室時發生左小插曲，11樓去到9樓時冇lala架LIFT被困.... 勁驚...好彩8樓lift開左門，姑娘即推走我轉lift~~~ 順利順利~~~   大約10：15我就入左手術室，量血壓，種豆 好啦。。。前後我左右手唔知點解要插足6次先種左2支豆， 支針好粗架嘛 10：25開始麻醉，今次好快手10分鐘就麻醉完成 （上次孖b用左50分鐘）   15分鐘左右細佬就出世la繼續好感動咁喊。。 同時細佬都喊到中氣十足冇停過， 姑娘抱佢俾我對性別體重，我搞埋手尾11：35離開手術室   今次細佬冇走先（上胎孖b上房先） 我同細佬一齊留係度觀察，隻肥豬撐手撐腳又喊，好得意。 12點就正式離開手術室上病房la... 老公係手術室門口等我， 佢只可以趁呢段搭lift時間見下我同細佬， 影2張相，就要出院先再見到啦～   留意返：公院生完bb，無論大人定bb都係搭公眾lift上病房, bb又冇口罩帶，又要同其他人一齊搭 生之前多次問姑娘都唔會有特別安排。 當日由訓床既我抱住bb一齊上病房，好在張病床大張， 唔計姑娘老公，得1/2個陌生人... 我唯有搵張被盡量遮住bb...   今胎依然係麻醉後狂嘔。。。 上胎仲有屋企人理下， 今次就係咁叫姑娘拎一疊嘔吐袋俾我，不斷嘔， 嘔到攰訓左陣，下午4點幾醒左再嘔。。 都斷水斷糧咁耐，唔知點解仲有咁多野嘔。 到下午6點，姑娘叫我可以飲少少水，我將半杯水分左幾個鐘飲。。 最後10點嘔返晒出黎～ 攰到1個點，原來果晚掛左黑雨都唔知   就因為嘔得太勁，除左黃昏時，姑娘推左細佬影張相外， 我就冇見過細佬啦，交左俾姑娘湊 第2朝冇嘔，早餐飲左碗粥水，中午拔左尿喉，自己去左廁所。。。 終於可以落床啦～ 即刻叫姑娘推細佬俾我睇   當日八月十五中秋節，特登帶左個月餅入院同細佬人月兩團圓   第2胎果然好快上奶，出院日已經bomb到90ml~~~   好順利好感恩，住左5日4夜就正式出院返屋企啦