講到幼稚園面試，想話經歷咗兩年考K1，深深感覺到大細b嘅分別。 細b嘅時候，貝貝完全唔知面試係咩一回事，入去一個佢完全唔知咩黎嘅地方，佢應該心諗只係覺得有好多人排隊，見到一大堆陌生人，又會被人迫問佢好多問題…做好多task…迫佢唱歌咁… 但超大b嘅分別，佢已經知道學校係咩一回事，佢入去完全無恐懼，又會好有禮貌，提佢做咩佢都識做，又識應人，又知道排隊係做咩，知道老師考佢，佢覺得係有人同佢玩，所以佢係開心地去interview～ 不過事前事後我都會做少少野嘅，我都有些少心得分享，對貝貝黎講超級有用，我都想同大家分享，希望同大家交流下面試心得…   事前幾日就要同佢講定，畀心理準備佢，黎緊會同佢去學校，又因為我有上年經驗，我會同佢講解埋到時老師大概會做啲咩，仲會話目的係陪貝貝睇吓鐘唔鐘意呢間學校，果度有老師陪你玩，老師會睇吓貝貝叻唔叻～   諗清楚邊位家長陪入去面試，因為貝貝係幾痴我，只要佢面對陌生環境，經常都要痴實我大髀坐，咁面試無可能痴住大髀坐架嗎，所以我就嘗試放手畀爸爸陪入，佢真係勁乖肯自己分開坐櫈????，同埋仲要提醒佢起身要拍櫈，拎完老師野要講thank you，咁先叫做個乖孩子呀！   事前就要洗佢腦，只有爸爸陪佢入去，避免分離嘅時候會情緒爆發，當然佢一定問點解媽咪唔入得、當然我都會諗啲計仔，例如我會話：「貝貝想唔想同爸爸結婚呀？爸爸帶你入去結婚，結完婚出黎就會見到媽咪嗱」唔好講笑，佢真係好受落…因為佢真係好恨同爸爸結婚！   上年interview嘅時候，等候途中成日喊住叫肚餓，搞到我不斷偷偷地餵佢食餅????今年我點都會同佢食到飽晒先去in，我仲會袋住好多零食起身，搭車嘅時候不斷問佢要唔要，希望佢有咁飽得咁飽，令佢心情愉快！   呢排佢興食lollipop ，我就袋住兩支珍寶珠，同佢講定只要出黎嘅時候，爸爸話你喺入面乖乖嘅話，就會請佢食糖，之後就會帶佢sir滑梯！佢真係深深記住，每次一出黎就問我攞糖，同埋話要即刻去sir滑梯！   大概就係咁多，希望大家面試順利，考到間心儀學校～   —————————————— FB: 貝貝Alice-小寶貝夢遊日記 IG:bowl_lam