「3歲小朋友戒YouTube大法！」暫時成功咗一個月有多，估唔到成個過程都好順利！所以都想同大家分享，不過呢篇教學，只限仲可以畀你呃，又未識咩係wifi嘅小朋友！ 其實之前一直都好想同貝貝戒睇Youtube，因為佢一睇就可以睇好耐，又唔玩玩具唔睇書，睇嘅時候又唔聽人講野，最慘有時random嘅YouTube片有少少教壞。不過就係多次都唔成功，最後因為一次機緣巧合下，唔覺意令到佢完全開唔到Youtube，只要佢一發現個YouTube無內容，佢就唔會再扭，又無發我脾氣！依家只係間中會拎我手機睇相同玩遊戲）我相信身邊一定有好多同路人，所以想分享下我嘅方法，當然未必個個一定有效，但都不妨一試！   1: 關掉電視wifi 因為之前屋企要重set過隻router，所有device嘅password要重新入過，有次貝貝喺我未醒嘅時候想睇，但姐姐開唔到，咁佢就無得睇啦！到我起身嘅時候，我索性話個YouTube壞咗，喺佢面前扮盡力咁試開幾次，再扮可憐咁講：「我都唔知點解開唔到????，可能壞咗呀！我唔識呀！」最後我就決定，等自己有需要時，先手動著返個wifi，但記得睇完要熄返佢，唔好喺小朋友面前畀佢發現你睇YouTube 呀！ 2: 關掉手機上網 解決咗電視問題，手機都一定要處理！貝貝其實撳手機已經撳得非常熟手，無論開app/揀app/關app/玩whatsapp/錄音/睇相睇video/玩遊戲，佢通通都識撳！咁到底可以點樣穩陣咁解決佢開唔到youtube？的確有個小技巧！ 去iphone setting 到熄咗youtube嘅流動數據，每次電話過佢手嘅時候，只要你熄咗個wifi，照開流動數據，你可以如常whatsapp，上網，只係開唔到youtube????如果你怕唔記得要熄邊樣，你亦都可以過佢手之前，直接熄晒wifi同data。 只要佢一開youtube，個版面剩係不斷叫你重試，但係撳唔到下一個頁面！我都估唔到呢招對貝貝好work，我：「嗱！你睇吓，個youtube唔知係咪壞咗呢，我都撳唔到，可能要等多陣，要爸爸返黎先整到」之後即刻轉移視線，同佢搵啲野玩，等佢分下心。 如事者，呃佢等下幾個鐘，等下又一日，等下再幾日，佢每日都有試下，發現都係開唔到，之後都無乜點問我了！持續咗一個月多，間中都有問過我：「YouTube幾時好返呀？爸爸仲未整返嘅？」我每次都答：「係啦，可能爸爸唔識整，要搵人整」最重要係個過程由佢試，自己都試過開唔到的話，佢就會放棄。慢慢我就發覺，佢開始enjoy搵其他野玩，而且又無唔開心。 ㊙️記住記住記住！喺佢面前都唔可以睇YouTube ，唔係就會穿煲，兜唔返架嗱！希望我嘅分享都幫到你地啦～ —————————————— 喜歡我嘅分享的話，希望你可以follow我地啦～ 依家仲可以加埋我MeWe啦???? MeWe: https://mewe.com/p/bowl_lam FB: https://facebook.com/profile.php?id=155831361844211 IG: https://www.instagram.com/bowl_lam/