一直以黎我都無催迫貝貝幾時要學到啲咩，幾時要做到啲咩，心態比較佛系，好多野都覺得緣份來了，自然會學識！的而且確，好多野我無教佢，都係佢自己學返黎，但有時我都難免會有好迷茫嘅時候。 例如上廁所呢回事，呢樣係令我困擾嘅事，雖然我自認自己佛系唔緊張，但其實心裡大概都知道小朋友3歲前，應該大部分小朋友都要識自己坐廁所，好多人都曾經叫我自己訓練佢，但佢對坐廁所真係好大抗拒，我已經專登買公主廁板諗住佢鐘意，點知無論軟或硬嘅方法我都試過，都係搞唔掂，總之就死都唔願意掂下個廁所板。失敗咗幾次之後，我都無勉強佢了，我曾經都擔心過，唔通到9月返學嘅時候，都仲要著尿片返學？ 點知，緣份嘅野真係話黎就黎！原來啲小朋友真係會突然開竅！有一日，我同爸爸去咗街，貝貝bubble bath嘅時候，佢自己同姐姐講話想去廁所！於是走返出嚟，自動自覺坐咗上廁板，而且係成功！第二日，佢又係相同嘅環境下，主動上演一次，今次仲係我親眼見證住佢成功，我當然讚到佢飛天，然後慢慢地佢開始好有信心，識話畀我知幾時急vv，想我帶佢去廁所，每次痾完仲識自己抹乾淨，又會好開心咁同我講：「我痾到啦，肚仔真係好舒服」依家每朝早一起身，第一時間叫我帶佢去廁所添，依家濕片嘅次數都少咗好多，終於都叫做守得雲開！ 希望藉住我呢個經歷，我可以畀多啲鼓勵同路嘅媽媽們，有啲野真係心急唔黎，我地要做嘅，應該畀多啲信心自己嘅小朋友，相信佢，佢自然會做得到！閒時就同佢睇多啲學去廁所嘅書，同埋同佢講多啲，點先可以真正成為大個女。 雖然貝貝已經大概知幾時要去廁所，但佢都仲好堅持要著住片片，唔肯就咁著底褲 ，我都唔想一下子迫住佢改變，我會同佢講我相信佢，希望等佢自己ready好晒先改，逐步逐步黎都唔緊要！等待真正成功戒片嘅一日！ 3Y1M11D —————————————— 可以加埋我MeWe啦 MeWe: https://mewe.com/p/bowl_lam FB: https://facebook.com/profile.php?id=155831361844211 IG: https://www.instagram.com/bowl_lam/