2020年真係無諗過會係疫情下渡過，由口罩荒到在家工作，好似經歷咗好耐咁，就咁樣又到年尾。 閉關一段時間，到年尾先敢約人出嚟聚下，適逢表妹生日，約佢出嚟傾吓偈放鬆心情。 由於仲係二人限聚令兼禁晚市堂食，於是約表妹high tea，點知有幾間已經full booking，好彩最後都book到係JW high tea。 第一次食JW 嘅Afternoon Tea，食物種類都多，鹹點同甜點一樣咁出色，而且食到最尾真係好飽。 第一層： 鮑魚撻，好驚喜有鮑魚食，鮑魚彈牙鮮甜再加上酥撻，原來都幾夾。 虎蝦春卷配甜酸汁，超推薦，香脆可口，蝦肉彈牙，加埋甜酸汁真係無得輸。 鴨肝醬配蜜瓜，其實我有啲怕鴨肝好濃味，好彩呢件鴨肝唔會好濃味，軟身加上蜜瓜好清甜易入口。 第二層： 芒果龍蝦沙律配魚子醬，份量剛剛好，爽甜嘅龍蝦肉同清甜芒果，美味唔會膩，魚子醬作點綴份外吸睛。 日本桃太郎蕃茄配話梅汁，超級開胃，蕃茄鮮甜多汁，加上話梅汁，酸酸甜甜。 西班牙黑毛豬火腿配鮮無花果布里芝士麥法包，無花果既鮮甜中和咗火腿嘅鹹味。 甜品層： 玫瑰荔枝忌廉及香草蜂蜜吉士脆餅，鑽石形啫喱非常亮眼，微甜。 綠茶柚子馬卡龍伴榛子，柚子同榛子味道互補不足，驚喜之作。 雲呢拿士多啤梨慕絲伴燴藍莓，鍾意酸酸甜甜，食完休息一陣可再食其他甜品。 青蘋果忌廉羽衣甘藍蜜蜂菠蘿卜卜米脆底，味道清新，同米脆底好夾。 甘草白朱古力忌廉及薄荷香檸餡蛋糕，另一清新之作，但味道平平，遜色一點。 黑朱古力貝殼蛋糕伴紅桑子醬，印有「JW」字樣，朱古力濃厚，略甜。 英式鬆餅 鬆餅熱上，口感鬆化，配上牛油同果醬，提升口感層次，我就鐘意原味多過提子味。   桂花香芬冰茶Welcome tea，睇番menu先知原來有桂花香芬冰茶，好可惜店員無上俾我地，而我地都留意唔到，無緣…… －－－－－－－－－－－－－－－－－－－－－－－－－－－－－－－－   The Lounge (香港JW萬豪酒店) 金鐘金鐘道88號太古廣場香港JW萬豪酒店大堂 28108366