自己未成為媽咪之前，同我媽咪既關係唔算話太好，好多野佢付出左我都唔知，「知道」佢對我好，同「感受」到佢對我好係兩會事。直到自己有左bb，先真正明白點解人地會話「世上只有媽媽好」。   十個月既懷孕時間唔算長，但當中出現既害喜、無胃口、腰痛、呼吸困難、擔心等等既事情，令懷孕既階段好容易出現抑鬱/心情唔好既情況。一方面擔心bb營養唔夠，另一方面又擔心自己情緒會影響bb。做既所有野都唔再以自己為中心，而係為左bb。   傷風、感冒盡可能都用自己抵抗力去好返，飲下薑茶驅下寒。始終食藥對bb都無咁好。平時中意食既刺身、雪糕、海鮮、麻辣都要忍忍忍。   心情唔好，又或者係大起大落，自己另一半都未必明白你心入面想點，有時候仲會同你「開戰」。受既都係媽媽自己一個受，無人會明白佢既傷心。   到生個陣，又要經歷十級既痛，一痛就十幾個鐘，分分鐘仲會大出血，生完命仔都無左半條，咁辛苦為既都係想子女健健康康。   到子女開始大個，又會擔心佢會唔會識到唔好既朋友、讀書叻唔叻、夠唔夠高、開唔開心⋯⋯ 「養兒一百歲，長憂九九」呢句說話到今日先深深感受到。   係自己懷孕期間，自己媽咪每日都好早起身煮飯比我拎返公司食，夜晚又會煮定飯等我，為既都我同BB健康。又專登去讀陪月課程，將來我可以安心坐月，慳返d錢請陪月。   好多我呢個年紀既同輩都未必「感受」到媽咪對佢地既愛錫，只會睇表面。直到我經歷一次媽媽既角色，我先真正咁感受到，原來做媽媽真係好偉大。你再唔係一個自私既人，而係一個為左子女而咩都會犧牲。   好希望我身邊既朋友可以「及時愛」，唔好似我，要去到人生另一個階段先知自己媽咪既偉大。當然唔係人人媽咪都做得好，但我都想你明白，佢陀住你個陣，都係真係為你付出左好多，可能教導你既方法未必岩，但對你個份愛係唔會變。 歡迎媽媽們一齊交流／了解更多90後做媽媽既點滴！將會有更多有趣，扮靚、健康、育兒等等既心得分享！ Facebook：https://www.facebook.com/90sMummy/ Instagram: https://www.instagram.com/minarainlo/