週末天氣麻麻哋，唔敢plan太長時間留喺室外，於是揀咗一條輕鬆易行嘅家樂徑運動一下。 今次行嘅地方係金山家樂徑，交通好方便。 我哋先搭車去大埔公路嘅石梨貝水塘巴士站。 九巴有兩條線都經呢個站： 72 長沙灣 - 太和總站  81 佐敦 (渡華路) - 禾輋 落咗車之後向前行幾十米，去到左邊有條落斜嘅金山路，沿着行入去金山郊野公園。 之後會先經過九龍水塘，可以影吓相，好天嘅時候一片綠油油湖光山色都幾靚㗎。 過咗水塘之後左邊會見到金山樹木研習徑，我哋就沿着右邊嘅斜路（金山路）行，右邊就會見到金山家樂徑入口。 金山家樂徑全長一公里，一開始要上樓梯，不過唔會話太辛苦，行吓唱吓歌大約15分鐘就行完樓梯去到最高點，之後就開始落斜，輕輕鬆鬆去到出口。沿途嘅樓梯同埋山路都好企理、容易行，一路又有樹陰，就算曬都唔使驚。 完成     不過沿途冇小食亭，要自己帶定水同食物；沿途亦冇乜垃圾桶，一路食嘅零食糖果包裝紙就要自己帶走～ 行金山家樂徑之後，可以沿着金山路行返去石梨貝水塘巴士站，搭車離開。前後總共用咗大約兩個鐘，輕輕鬆鬆嘅行山咁就完成~ 注意呢個附近會有馬騮出沒，大家盡量唔好拎住食物喺手，同埋唔好餵佢哋食嘢啊！ #親子活動 #行山 #健康啲 #輕鬆行 #擁抱大自然 #金山郊野公園 #金山家樂徑 #馬騮山 #親子行山   喜歡我嘅分享嘅話，記住like同follow我個Facebook page呀:) https://www.facebook.com/natalie.nathan.mum/