上胎我生和牛B冇請陪月，頭一個月喺娘家坐月。 其後要辛苦媽媽每日過嚟煮嘢我食，幫和牛B沖涼，直至我復工。 今胎同樣我都冇請陪月，自己同自己坐月。 每日我媽媽會上嚟幫BB沖涼，間中會煲愛心湯水俾我飲。 撞正爆發疫症，真係打亂我成盤計劃。 現年讀幼稚園K2嘅和牛B，放完年假直接停課唔需要返學。 所以，我每日都同和牛B、BB一齊喺屋企。 日日困獸鬥，其實都非常忙。 每日嘅食材，都係靠老公收工後去街市買返嚟俾我煮。 亦因為咁，我都變咗做廚神。每日要諗定四餐，早、午、茶點及晚餐。 間中仲有自製糖水、甜品。 間中都會食餐好嘅，不過呢次係因為妹妹滿月。 其實煮每日三餐，都唔算好難。 因為我主力整嘅餸都係可以直接跟飯一齊蒸，俾啲蒸餸大家參考一下; - 蟲草花蒸雞件 - 冬菇蒸雞件 - 紅棗蒸雞件 - 蒜蓉蒸雞件 - 冬菇蒸肉餅 - 冬菇蒸肉片 - 冬菜蒸肉片/牛肉片 - 榨菜蒸肉片/牛肉片 - 榨菜蒸肉餅 - 蒜蓉蒸肉片 - 蒜蓉蒸排骨 有時會焗下雞翼，蔬菜通常烚/焗，所以好快手。 坐月期間，撞正疫症停課，我仲要充當老師呢個身份。 同佢一齊睇學校嘅教材Powerpoint、同佢跟功課、勞作。 ^ 在家學習真係好唔容易... 一日24小時，和牛B活動時間超過12小時。 佢又已經唔瞓晏覺，所以除咗學習時間、玩玩具時間。 我都幫佢安排咗小廚師活動，等佢過得充實啲，等佢唔好不停叫我陪佢玩，俾我抖下。 無時停嘅和牛B，有時我仲會變咗佢嘅玩具… ^ 我個樣十級驚嚇，所以唯有打返個厚格 ^ 和牛B仲會同妹妹講故事 坐月期間，其實產婦係好需要休息。 不過，我一打二嘅話想瞓、坐下嘅時間都無。 但睇見和牛B咁錫妹妹，我都好開心，好安慰。 變咗廚神嘅我，和牛B同老公餐餐都食得好滋味。 我自己都好開心，辛苦都係值得嘅。 每日在家一打二嘅時間，仲快過返工。 耳仔有時嘈到溫，放空時間都無… 但你問我，鍾唔鍾意咁嘅生活?我可以唔洗諗即刻答你，我鍾意、我享受同孩子相處嘅時間。 -------------------------------------------------- 歡迎聯絡我&和牛B: chungying56@hotmail.comFacebook專頁: 和牛B嘅成長專頁 Instagram: wagyubmami              -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。